७. सुनिक्खित्तवग्गो

१. चित्तलताविमानवत्थु

१११४. ‘‘यथा वनं चित्तलतं पभासति, उय्यानसेट्ठं तिदसानमुत्तमं;

तथूपमं तुय्हमिदं विमानं, ओभासयं तिट्ठति अन्तलिक्खे.

१११५. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

१११६. सो देवपुत्तो अत्तमनो…पे… यस्स कम्मस्सिदं फलं.

१११७. ‘‘अहं मनुस्सेसु मनुस्सभूतो, दलिद्दो अताणो कपणो कम्मकरो अहोसिं;

जिण्णे च मातापितरो अभारिं [अभरिं (सी. स्या.)], पिया च मे सीलवन्तो अहेसुं;

अन्नञ्च पानञ्च पसन्नचित्तो, सक्कच्च दानं विपुलं अदासि.

१११८. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

चित्तलताविमानं पठमं.

२. नन्दनविमानवत्थु

११२०. ‘‘यथा वनं नन्दनं [नन्दनं चित्तलतं (सी. स्या. क.), नन्दवनं (क.)] पभासति, उय्यानसेट्ठं तिदसानमुत्तमं;

तथूपमं तुय्हमिदं विमानं, ओभासयं तिट्ठति अन्तलिक्खे.

११२१. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

११२२. सो देवपुत्तो अत्तमनो…पे… यस्स कम्मस्सिदं फलं.

११२३. ‘‘अहं मनुस्सेसु मनुस्सभूतो, दलिद्दो अताणो कपणो कम्मकरो अहोसिं;

जिण्णे च मातापितरो अभारिं, पिया च मे सीलवन्तो अहेसुं;

अन्नञ्च पानञ्च पसन्नचित्तो, सक्कच्च दानं विपुलं अदासिं.

११२४. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

नन्दनविमानं दुतियं.

३. मणिथूणविमानवत्थु

११२६. ‘‘उच्चमिदं मणिथूणं विमानं, समन्ततो द्वादस योजनानि;

कूटागारा सत्तसता उळारा, वेळुरियथम्भा रुचकत्थता सुभा.

११२७. ‘‘तत्थच्छसि पिवसि खादसि च, दिब्बा च वीणा पवदन्ति वग्गुं;

दिब्बा रसा कामगुणेत्थ पञ्च, नारियो च नच्चन्ति सुवण्णछन्ना.

११२८. ‘‘केन तेतादिसो वण्णो…पे…वण्णो च ते सब्बदिसा पभासती’’ति.

११३०. सो देवपुत्तो अत्तमनो…पे…यस्स कम्मस्सिदं फलं.

११३१. ‘‘अहं मनुस्सेसु मनुस्सभूतो, विवने पथे सङ्कमनं [चङ्कमनं (सी.), चङ्कमं (स्या.), समकं (क. सी.)] अकासिं;

आरामरुक्खानि च रोपयिस्सं, पिया च मे सीलवन्तो अहेसुं;

अन्नञ्च पानञ्च पसन्नचित्तो, सक्कच्च दानं विपुलं अदासिं.

११३२. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

मणिथूणविमानं ततियं.

४. सुवण्णविमानवत्थु

११३४. ‘‘सोवण्णमये पब्बतस्मिं, विमानं सब्बतोपभं;

हेमजालपटिच्छन्नं [हेमजालकपच्छन्नं (सी.)], किङ्किणि [किङ्कणिक (स्या. क.), किङ्किणिक (पी.)] जालकप्पितं.

११३५. ‘‘अट्ठंसा सुकता थम्भा, सब्बे वेळुरियामया;

एकमेकाय अंसिया, रतना सत्त निम्मिता.

११३६. ‘‘वेळुरियसुवण्णस्स, फलिका रूपियस्स च;

मसारगल्लमुत्ताहि, लोहितङ्गमणीहि च.

११३७. ‘‘चित्रा मनोरमा भूमि, न तत्थुद्धंसती रजो;

गोपाणसीगणा पीता, कूटं धारेन्ति निम्मिता.

११३८. ‘‘सोपाणानि च चत्तारि, निम्मिता चतुरो दिसा;

नानारतनगब्भेहि, आदिच्चोव विरोचति.

११३९. ‘‘वेदिया चतस्सो तत्थ, विभत्ता भागसो मिता;

दद्दल्लमाना आभन्ति, समन्ता चतुरो दिसा.

११४०. ‘‘तस्मिं विमाने पवरे, देवपुत्तो महप्पभो;

अतिरोचसि वण्णेन, उदयन्तोव भाणुमा.

११४१. ‘‘दानस्स ते इदं फलं, अथो सीलस्स वा पन;

अथो अञ्जलिकम्मस्स, तं मे अक्खाहि पुच्छितो’’.

११४२. सो देवपुत्तो अत्तमनो…पे… यस्स कम्मस्सिदं फलं.

११४३. ‘‘अहं अन्धकविन्दस्मिं, बुद्धस्सादिच्चबन्धुनो;

विहारं सत्थु कारेसिं, पसन्नो सेहि पाणिभि.

११४४. ‘‘तत्थ गन्धञ्च मालञ्च, पच्चयञ्च [पच्चग्गञ्च (सी.), पच्चग्घञ्च (?)] विलेपनं;

विहारं सत्थु अदासिं, विप्पसन्नेन चेतसा;

तेन मय्हं इदं लद्धं, वसं वत्तेमि नन्दने.

११४५. ‘‘नन्दने च वने [नन्दने पवने (सी. स्या.)] रम्मे, नानादिजगणायुते;

रमामि नच्चगीतेहि, अच्छराहि पुरक्खतो’’ति.

सुवण्णविमानं चतुत्थं.

५. अम्बविमानवत्थु

११४६. ‘‘उच्चमिदं मणिथूणं विमानं, समन्ततो द्वादस योजनानि;

कूटागारा सत्तसता उळारा, वेळुरियथम्भा रुचकत्थता सुभा.

११४७. ‘‘तत्थच्छसि पिवसि खादसि च, दिब्बा च वीणा पवदन्ति वग्गुं;

दिब्बा रसा कामगुणेत्थ पञ्च, नारियो च नच्चन्ति सुवण्णछन्ना.

११४८. ‘‘केन तेतादिसो वण्णो…पे… वण्णो च ते सब्बदिसा पभासती’’ति.

११५०. सो देवपुत्तो अत्तमनो…पे… यस्स कम्मस्सिदं फलं.

११५१. ‘‘गिम्हानं पच्छिमे मासे, पतपन्ते [पतापन्ते (स्या.), पतापेन्ते (क.)] दिवङ्करे;

परेसं भतको पोसो, अम्बाराममसिञ्चति.

११५२. ‘‘अथ तेनागमा भिक्खु, सारिपुत्तोति विस्सुतो;

किलन्तरूपो कायेन, अकिलन्तोव चेतसा.

११५३. ‘‘तञ्च दिस्वान आयन्तं, अवोचं अम्बसिञ्चको;

साधु तं [साधुकं (क.)] भन्ते न्हापेय्यं, यं ममस्स सुखावहं.

११५४. ‘‘तस्स मे अनुकम्पाय, निक्खिपि पत्तचीवरं;

निसीदि रुक्खमूलस्मिं, छायाय एकचीवरो.

११५५. ‘‘तञ्च अच्छेन वारिना, पसन्नमानसो नरो;

न्हापयी रुक्खमूलस्मिं, छायाय एकचीवरं.

११५६. ‘‘अम्बो च सित्तो समणो च न्हापितो, मया च पुञ्ञं पसुतं अनप्पकं;

इति सो पीतिया कायं, सब्बं फरति अत्तनो.

११५७. ‘‘तदेव एत्तकं कम्मं, अकासिं ताय जातिया;

पहाय मानुसं देहं, उपपन्नोम्हि नन्दनं.

११५८. ‘‘नन्दने च वने रम्मे, नानादिजगणायुते;

रमामि नच्चगीतेहि, अच्छराहि पुरक्खतो’’ति.

अम्बविमानं पञ्चमं.

६. गोपालविमानवत्थु

११५९. ‘‘दिस्वान देवं पटिपुच्छि भिक्खु, उच्चे विमानम्हि चिरट्ठितिके;

आमुत्तहत्थाभरणं यसस्सिं [आमुत्तहत्थाभरणो यसस्सी (स्या. पी. क.)], दिब्बे विमानम्हि यथापि चन्दिमा.

११६०. ‘‘अलङ्कतो मल्यधरो [मालभारी (सी.), मालधरी (क.)] सुवत्थो, सुकुण्डली कप्पितकेसमस्सु;

आमुत्तहत्थाभरणो यसस्सी, दिब्बे विमानम्हि यथापि चन्दिमा.

११६१. ‘‘दिब्बा च वीणा पवदन्ति वग्गुं, अट्ठट्ठका सिक्खिता साधुरूपा;

दिब्बा च कञ्ञा तिदसचरा उळारा, नच्चन्ति गायन्ति पमोदयन्ति.

११६२. ‘‘देविद्धिपत्तोसि महानुभावो, मनुस्सभूतो किमकासि पुञ्ञं;

केनासि एवं जलितानुभावो, वण्णो च ते सब्बदिसा पभासती’’ति.

११६३. सो देवपुत्तो अत्तमनो…पे… यस्स कम्मस्सिदं फलं.

११६४. ‘‘अहं मनुस्सेसु मनुस्सभूतो, सङ्गम्म रक्खिस्सं परेसं धेनुयो;

ततो च आगा समणो ममन्तिके गावो च मासे अगमंसु खादितुं.

११६५. ‘‘द्वयज्ज किच्चं उभयञ्च कारियं, इच्चेवहं [इच्चेवं (क.)] भन्ते तदा विचिन्तयिं;

ततो च सञ्ञं पटिलद्धयोनिसो, ददामि भन्तेति खिपिं अनन्तकं.

११६६. ‘‘सो मासखेत्तं तुरितो अवासरिं, पुरा अयं भञ्जति यस्सिदं धनं;

ततो च कण्हो उरगो महाविसो, अडंसि पादे तुरितस्स मे सतो.

११६७. ‘‘स्वाहं अट्टोम्हि दुक्खेन पीळितो, भिक्खु च तं सामं मुञ्चित्वानन्तकं [मुञ्चित्व नन्तकं (सी.), मुञ्चित्वा अनन्तकं (स्या.)];

अहासि कुम्मासं ममानुकम्पया [ममानुकम्पिया (पी. क.), ममानुकम्पाय (स्या.)], ततो चुतो कालकतोम्हि देवता.

११६८. ‘‘तदेव कम्मं कुसलं कतं मया, सुखञ्च कम्मं अनुभोमि अत्तना;

तया हि भन्ते अनुकम्पितो भुसं, कतञ्ञुताय अभिपादयामि तं.

११६९. ‘‘सदेवके लोके समारके च, अञ्ञो मुनि नत्थि तयानुकम्पको;

तया हि भन्ते अनुकम्पितो भुसं, कतञ्ञुताय अभिवादयामि तं.

११७०. ‘‘इमस्मिं लोके परस्मिं वा पन, अञ्ञो मुनी नत्थि तयानुकम्पको;

तया हि भन्ते अनुकम्पितो भुसं, कतञ्ञुताय अभिवादयामि त’’न्ति.

गोपालविमानं छट्ठं.

७. कण्डकविमानवत्थु

११७१. ‘‘पुण्णमासे यथा चन्दो, नक्खत्तपरिवारितो;

समन्ता अनुपरियाति, तारकाधिपती ससी.

११७२. ‘‘तथूपमं इदं ब्यम्हं, दिब्बं देवपुरम्हि च;

अतिरोचति वण्णेन, उदयन्तोव रंसिमा.

११७३. ‘‘वेळुरियसुवण्णस्स, फलिका रूपियस्स च;

मसारगल्लमुत्ताहि, लोहितङ्गमणीहि च.

११७४. ‘‘चित्रा मनोरमा भूमि, वेळूरियस्स सन्थता;

कूटागारा सुभा रम्मा, पासादो ते सुमापितो.

११७५. ‘‘रम्मा च ते पोक्खरणी, पुथुलोमनिसेविता;

अच्छोदका विप्पसन्ना, सोवण्णवालुकसन्थता.

११७६. ‘‘नानापदुमसञ्छन्ना, पुण्डरीकसमोतता [समोत्थता (क.), समोगता (स्या.)];

सुरभिं सम्पवायन्ति, मनुञ्ञा मालुतेरिता.

११७७. ‘‘तस्सा ते उभतो पस्से, वनगुम्बा सुमापिता;

उपेता पुप्फरुक्खेहि, फलरुक्खेहि चूभयं.

११७८. ‘‘सोवण्णपादे पल्लङ्के, मुदुके गोणकत्थते [चोलसन्थते (सी.)];

निसिन्नं देवराजंव, उपतिट्ठन्ति अच्छरा.

११७९. ‘‘सब्बाभरणसञ्छन्ना, नानामालाविभूसिता;

रमेन्ति तं महिद्धिकं, वसवत्तीव मोदसि.

११८०. ‘‘भेरिसङ्खमुदिङ्गाहि, वीणाहि पणवेहि च;

रमसि रतिसम्पन्नो, नच्चगीते सुवादिते.

११८१. ‘‘दिब्बा ते विविधा रूपा, दिब्बा सद्दा अथो रसा;

गन्धा च ते अधिप्पेता, फोट्ठब्बा च मनोरमा.

११८२. ‘‘तस्मिं विमाने पवरे, देवपुत्त महप्पभो;

अतिरोचसि वण्णेन, उदयन्तोव भाणुमा.

११८३. ‘‘दानस्स ते इदं फलं, अथो सीलस्स वा पन;

अथो अञ्जलिकम्मस्स, तं मे अक्खाहि पुच्छितो’’.

११८४. सो देवपुत्तो अत्तमनो…पे… यस्स कम्मस्सिदं फलं.

११८५. ‘‘अहं कपिलवत्थुस्मिं, साकियानं पुरुत्तमे;

सुद्धोदनस्स पुत्तस्स, कण्डको सहजो अहं.

११८६. ‘‘यदा सो अड्ढरत्तायं, बोधाय मभिनिक्खमि;

सो मं मुदूहि पाणीहि, जालि [जाल (सी.)] तम्बनखेहि च.

११८७. ‘‘सत्थिं आकोटयित्वान, वह सम्माति चब्रवि;

अहं लोकं तारयिस्सं, पत्तो सम्बोधिमुत्तमं.

११८८. ‘‘तं मे गिरं सुणन्तस्स, हासो मे विपुलो अहु;

उदग्गचित्तो सुमनो, अभिसीसिं [अभिसिंसिं (सी.), अभिसीसि (पी.)] तदा अहं.

११८९. ‘‘अभिरूळ्हञ्च मं ञत्वा, सक्यपुत्तं महायसं;

उदग्गचित्तो मुदितो, वहिस्सं पुरिसुत्तमं.

११९०. ‘‘परेसं विजितं गन्त्वा, उग्गतस्मिं दिवाकरे [दिवङ्करे (स्या. क.)];

ममं छन्नञ्च ओहाय, अनपेक्खो सो अपक्कमि.