४१४. जागरजातकं (७-२-९)

१३५. कोध जागरतं सुत्तो, कोध सुत्तेसु जागरो;

को ममेतं विजानाति, को तं पटिभणाति मे.

१३६. अहं जागरतं सुत्तो, अहं सुत्तेसु जागरो;

अहमेतं विजानामि, अहं पटिभणामि ते.

१३७. कथं जागरतं सुत्तो, कथं सुत्तेसु जागरो;

कथं एतं विजानासि, कथं पटिभणासि मे.

१३८. ये धम्मं नप्पजानन्ति, संयमोति दमोति च;

तेसु सुप्पमानेसु, अहं जग्गामि देवते.

१३९. येसं रागो च दोसो च, अविज्जा च विराजिता;

तेसु जागरमानेसु, अहं सुत्तोस्मि देवते.

१४०. एवं जागरतं सुत्तो, एवं सुत्तेसु जागरो;

एवमेतं विजानामि, एवं पटिभणामि ते.

१४१. साधु जागरतं सुत्तो, साधु सुत्तेसु जागरो;

साधुमेतं विजानासि, साधु पटिभणासि मेति.

जागरजातकं नवमं.