४०९. दळ्हधम्मजातकं (७-२-४)

९८. अहं चे दळ्हधम्मस्स [दळ्हधम्माय (पी.)], वहन्ति नाभिराधयिं;

धरन्ती उरसि सल्लं, युद्धे विक्कन्तचारिनी.

९९. नून राजा न जानाति [न ह नून राजा जानाति (सी. पी.)], मम विक्कमपोरिसं;

सङ्गामे सुकतन्तानि, दूतविप्पहितानि च.

१००. सा नूनाहं मरिस्सामि, अबन्धु अपरायिनी [अपरायिणी (सी.), अपरायणी (?)];

तदा हि [तथा हि (पी.)] कुम्भकारस्स, दिन्ना छकणहारिका.

१०१. यावतासीसती पोसो, तावदेव पवीणति;

अत्थापाये जहन्ति नं, ओट्ठिब्याधिंव खत्तियो.

१०२. यो पुब्बे कतकल्याणो, कतत्थो नावबुज्झति;

अत्था तस्स पलुज्जन्ति, ये होन्ति अभिपत्थिता.

१०३. यो पुब्बे कतकल्याणो, कतत्थो मनुबुज्झति;

अत्था तस्स पवड्ढन्ति, ये होन्ति अभिपत्थिता.

१०४. तं वो वदामि भद्दन्ते [भद्दं वो (सी. स्या. पी.)], यावन्तेत्थ समागता;

सब्बे कतञ्ञुनो होथ, चिरं सग्गम्हि ठस्सथाति.

दळ्हधम्मजातकं चतुत्थं.