३७१. दीघीतिकोसलजातकं (५-३-१)

११०. एवंभूतस्स ते राज, आगतस्स वसे [वसो (पी. क.)] मम;

अत्थि नु कोचि परियायो, यो तं दुक्खा पमोचये.

१११. एवंभूतस्स मे तात, आगतस्स वसे तव;

नत्थि नो कोचि परियायो, यो मं दुक्खा पमोचये.

११२. नाञ्ञं सुचरितं राज, नाञ्ञं राज सुभासितं;

तायते मरणकाले, एवमेवितरं धनं.

११३. अक्कोच्छि मं अवधि मं, अजिनि मं अहासि मे;

ये च तं उपनय्हन्ति, वेरं तेसं न सम्मति.

११४. अक्कोच्छि मं अवधि मं, अजिनि मं अहासि मे;

ये च तं नुपनय्हन्ति, वेरं तेसूपसम्मति.

११५. न हि वेरेन वेरानि, सम्मन्तीध कुदाचनं;

अवेरेन च सम्मन्ति, एस धम्मो सनन्तनोति.

दीघीतिकोसलजातकं पठमं.