३७२. मिगपोतकजातकं (५-३-२)

११६. अगारा पच्चुपेतस्स, अनगारस्स ते सतो;

समणस्स न तं साधु, यं पेतमनुसोचसि.

११७. संवासेन हवे सक्क, मनुस्सस्स मिगस्स वा;

हदये जायते पेमं, न तं सक्का असोचितुं.

११८. मतं मरिस्सं रोदन्ति, ये रुदन्ति लपन्ति च;

तस्मा त्वं इसि मा रोदि, रोदितं मोघमाहु सन्तो.

११९. रोदितेन हवे ब्रह्मे, मतो पेतो समुट्ठहे;

सब्बे सङ्गम्म रोदाम, अञ्ञमञ्ञस्स ञातके.

१२०. आदित्तं वत मं सन्तं, घतसित्तंव पावकं;

वारिना विय ओसिञ्चं, सब्बं निब्बापये दरं.

१२१. अब्बहि वत मे सल्लं, यमासि हदयस्सितं;

यो मे सोकपरेतस्स, पुत्तसोकं अपानुदि.

१२२. सोहं अब्बूळ्हसल्लोस्मि, वीतसोको अनाविलो;

न सोचामि न रोदामि, तव सुत्वान वासवाति.

मिगपोतकजातकं दुतियं.