३३५. जम्बुकजातकं (४-४-५)

१३७. ब्रहा पवड्ढकायो सो, दीघदाठो च जम्बुक;

न त्वं तत्थ कुले जातो, यत्थ गण्हन्ति कुञ्जरं.

१३८. असीहो सीहमानेन, यो अत्तानं विकुब्बति;

कोत्थूव [कुट्ठूव (सी.), कुत्थुव (स्या. पी)] गजमासज्ज, सेति भूम्या अनुत्थुनं.

१३९. यसस्सिनो उत्तमपुग्गलस्स, सञ्जातखन्धस्स महब्बलस्स;

असमेक्खिय थामबलूपपत्तिं, स सेति नागेन हतोयं जम्बुको.

१४०. यो चीध कम्मं कुरुते पमाय, थामब्बलं अत्तनि संविदित्वा;

जप्पेन मन्तेन सुभासितेन, परिक्खवा सो विपुलं जिनातीति.

जम्बुकजातकं पञ्चमं.