३३६. ब्रहाछत्तजातकं (४-४-६)

१४१. तिणं तिणन्ति लपसि, को नु ते तिणमाहरि;

किं नु ते तिणकिच्चत्थि, तिणमेव पभाससि.

१४२. इधागमा ब्रह्मचारी, ब्रहा छत्तो बहुस्सुतो;

सो मे [सो वे (क.)] सब्बं समादाय, तिणं निक्खिप्प गच्छति.

१४३. एवेतं होति कत्तब्बं, अप्पेन बहुमिच्छता;

सब्बं सकस्स आदानं, अनादानं तिणस्स च. ( ) [(तिणस्स चाटीसु गतो, तत्थ का परिदेवना) (सी. स्या.) (चाटीसु पक्खिपित्वान, तत्थ का परिदेवना) (क.)]

१४४. सीलवन्तो न कुब्बन्ति, बालो सीलानि कुब्बति;

अनिच्चसीलं दुस्सील्यं [दुस्सीलं (पी.)], किं पण्डिच्चं करिस्सतीति.

ब्रहाछत्तजातकं छट्ठं.