३२७. काकवतीजातकं (४-३-७)

१०५. वाति चायं [वायं (क.)] ततो गन्धो, यत्थ मे वसती पिया;

दूरे इतो हि काकवती [काकाती (सी.), काकाति (स्या. पी.)], यत्थ मे निरतो मनो.

१०६. कथं समुद्दमतरी, कथं अतरि केपुकं [केबुकं (सी. पी.)];

कथं सत्त समुद्दानि, कथं सिम्बलिमारुहि.

१०७. तया समुद्दमतरिं, तया अतरि केपुकं [केबुकं (सी. पी.)];

तया सत्त समुद्दानि, तया सिम्बलिमारुहिं.

१०८. धिरत्थुमं महाकायं, धिरत्थुमं अचेतनं;

यत्थ जायायहं जारं, आवहामि वहामि चाति.

काकवतीजातकं सत्तमं.