३२१. कुटिदूसकजातकं (४-३-१)

८१. मनुस्सस्सेव ते सीसं, हत्थपादा च वानर;

अथ केन नु वण्णेन, अगारं ते न विज्जति.

८२. मनुस्सस्सेव मे सीसं, हत्थपादा च सिङ्गिल [सिङ्गाल (क.), पिङ्गल (टीका)];

याहु सेट्ठा मनुस्सेसु, सा मे पञ्ञा न विज्जति.

८३. अनवट्ठितचित्तस्स, लहुचित्तस्स दुब्भिनो [दूभिनो (पी.)];

निच्चं अद्धुवसीलस्स, सुखभावो [सुचिभावो (सी.), सुखभागो (?)] न विज्जति.

८४. सो करस्सु आनुभावं, वीतिवत्तस्सु सीलियं;

सीतवातपरित्ताणं, करस्सु कुटवं [कुटिकं (सी. स्या.)] कपीति.

कुटिदूसक [सिङ्गालसकुण (क.)] जातकं पठमं.