३२२. दुद्दुभजातकं (४-३-२)

८५. दुद्दुभायति [दद्दभायति (सी. पी.)] भद्दन्ते, यस्मिं देसे वसामहं;

अहम्पेतं न जानामि, किमेतं दुद्दुभायति.

८६. बेलुवं पतितं सुत्वा, दुद्दुभन्ति [दद्दभन्ति (सी.)] ससो जवि;

ससस्स वचनं सुत्वा, सन्तत्ता मिगवाहिनी.

८७. अप्पत्वा पदविञ्ञाणं, परघोसानुसारिनो;

पनादपरमा बाला, ते होन्ति परपत्तिया.

८८. ये च सीलेन सम्पन्ना, पञ्ञायूपसमे रता;

आरका विरता धीरा, न होन्ति परपत्तियाति.

दुद्दुभजातकं [दद्दभजातकं (सी. पी.)] दुतियं.