३१८. कणवेरजातकं (४-२-८)

६९. यं तं वसन्तसमये, कणवेरेसु भाणुसु;

सामं बाहाय पीळेसि, सा तं आरोग्यमब्रवि.

७०. अम्भो न किर सद्धेय्यं, यं वातो पब्बतं वहे;

पब्बतञ्चे वहे वातो, सब्बम्पि पथविं वहे;

यत्थ सामा कालकता [कालङ्कता (क.)], सा मं आरोग्यमब्रवि.

७१. न चेव सा कालकता, न च सा अञ्ञमिच्छति;

एकभत्तिकिनी [एकभत्ता किर (सी. स्या.), एकभत्तकिनी (पी.)] सामा, तमेव अभिकङ्खति.

७२. असन्थुतं मं चिरसन्थुतेन [असन्धतं मं चिरसन्धतेन (क.)], निमीनि सामा अधुवं धुवेन;

मयापि सामा निमिनेय्य अञ्ञं, इतो अहं दूरतरं गमिस्सन्ति.

कणवेरजातकं अट्ठमं.