३१७. मतरोदनजातकं (४-२-७)

६५. मतं मतं एव [मतमतमेव (सी. स्या. पी.)] रोदथ, न हि तं रोदथ यो मरिस्सति;

सब्बेपि [सब्बेव (सी. स्या. पी.)] सरीरधारिनो, अनुपुब्बेन जहन्ति जीवितं.

६६. देवमनुस्सा चतुप्पदा, पक्खिगणा उरगा च भोगिनो;

सम्हि [यम्हि (स्या.), अस्मिं (पी. क.)] सरीरे अनिस्सरा, रममानाव जहन्ति जीवितं.

६७. एवं चलितं असण्ठितं, सुखदुक्खं मनुजेस्वपेक्खिय;

कन्दितरुदितं निरत्थकं, किं वो सोकगणाभिकीररे.

६८. धुत्ता च सोण्डा [धुत्ता सोण्डा (सी.), धुत्ता सोण्डा च (स्या.)] अकता, बाला सूरा अयोगिनो [बाला सूरा वीरा अयोगिनो (पी.)];

धीरं मञ्ञन्ति बालोति, ये धम्मस्स अकोविदाति.

मतरोदनजातकं सत्तमं.