२८०. पुटदूसकजातकं (३-३-१०)

८८. अद्धा हि नून मिगराजा, पुटकम्मस्स कोविदो;

तथा हि पुटं दूसेति, अञ्ञं नून करिस्सति.

८९. न मे माता वा पिता वा, पुटकम्मस्स कोविदो;

कतं कतं खो दूसेम, एवं धम्ममिदं कुलं.

९०. येसं वो एदिसो धम्मो, अधम्मो पन कीदिसो;

मा वो धम्मं अधम्मं वा, अद्दसाम कुदाचनन्ति.

पुटदूसकजातकं दसमं.

उदपानवग्गो [अरञ्ञवग्गो (सी. पी. क.)] ततियो.

तस्सुद्दानं –

उदपानवरं वनब्यग्घ कपि, सिखिनी च बलाक रुचिरवरो;

सुजनाधिपरोमकदूस पुन, सतपत्तवरो पुटकम्म दसाति.