३. उदपानवग्गो

२७१. उदपानदूसकजातकं (३-३-१)

६१. आरञ्ञिकस्स इसिनो, चिररत्तं तपस्सिनो;

किच्छाकतं उदपानं, कथं सम्म अवाहसि [अवाहयि (सी. पी.), अपाहसि (स्या.)].

६२. एस धम्मो सिङ्गालानं, यं पित्वा ओहदामसे;

पितुपितामहं धम्मो, न तं [न नं (सी. पी.)] उज्झातुमरहसि.

६३. येसं वो एदिसो धम्मो, अधम्मो पन कीदिसो;

मा वो धम्मं अधम्मं वा, अद्दसाम कुदाचनन्ति.

उदपानदूसकजातकं पठमं.

२७२. ब्यग्घजातकं (३-३-२)

६४. येन मित्तेन संसग्गा, योगक्खेमो विहिय्यति;

पुब्बेवज्झाभवं तस्स, रुक्खे अक्खीव पण्डितो.

६५. येन मित्तेन संसग्गा, योगक्खेमो पवड्ढति;

करेय्यत्तसमं वुत्तिं, सब्बकिच्चेसु पण्डितो.

६६. एथ ब्यग्घा निवत्तव्हो, पच्चुपेथ [पच्चमेथ (सी. पी.)] महावनं;

मा वनं छिन्दि निब्यग्घं, ब्यग्घा माहेसु निब्बनाति.

ब्यग्घजातकं दुतियं.

२७३. कच्छपजातकं (३-३-३)

६७. को नु उद्धितभत्तोव [उद्दितभत्तोव (सी.), वड्ढितभत्तोव (स्या.)], पूरहत्थोव ब्राह्मणो;

कहं नु भिक्खं अचरि, कं सद्धं उपसङ्कमि.

६८. अहं कपिस्मि दुम्मेधो, अनामासानि आमसिं;

त्वं मं मोचय भद्दन्ते, मुत्तो गच्छेय्य पब्बतं.

६९. कच्छपा कस्सपा होन्ति, कोण्डञ्ञा होन्ति मक्कटा;

मुञ्च कस्सप कोण्डञ्ञं, कतं मेथुनकं तयाति.

कच्छपजातकं ततियं.

२७४. लोलजातकं (३-३-४)

७०. कायं बलाका सिखिनी, चोरी लङ्घिपितामहा;

ओरं बलाके आगच्छ, चण्डो मे वायसो सखा.

७१. नाहं बलाका सिखिनी, अहं लोलोस्मि वायसो;

अकत्वा वचनं तुय्हं, पस्स लूनोस्मि आगतो.

७२. पुनपापज्जसी सम्म, सीलञ्हि तव तादिसं;

न हि मानुसका भोगा, सुभुञ्जा होन्ति पक्खिनाति.

लोलजातकं चतुत्थं.

२७५. रुचिरजातकं (३-३-५)

७३. कायं बलाका रुचिरा, काकनीळस्मिमच्छति;

चण्डो काको सखा मय्हं, यस्स [तस्स (सी. पी.)] चेतं कुलावकं.

७४. ननु मं सम्म जानासि, दिज सामाकभोजन;

अकत्वा वचनं तुय्हं, पस्स लूनोस्मि आगतो.

७५. पुनपापज्जसी सम्म, सीलञ्हि तव तादिसं;

न हि मानुसका भोगा, सुभुञ्जा होन्ति पक्खिनाति.

रुचिरजातकं पञ्चमं.

२७६. कुरुधम्मजातकं (३-३-६)

७६. तव सद्धञ्च सीलञ्च, विदित्वान जनाधिप;

वण्णं अञ्जनवण्णेन, कालिङ्गस्मिं निमिम्हसे [विनिम्हसे (स्या.), वनिम्हसे (क.)].

७७. अन्नभच्चा चभच्चा च, योध उद्दिस्स गच्छति;

सब्बे ते अप्पटिक्खिप्पा, पुब्बाचरियवचो इदं.

७८. ददामि वो ब्राह्मणा नागमेतं, राजारहं राजभोग्गं यसस्सिनं;

अलङ्कतं हेमजालाभिछन्नं, ससारथिं गच्छथ येन कामन्ति.

कुरुधम्मजातकं [कुरुधम्मजातकं (सी. स्या. पी.)] छट्ठं.

२७७. रोमकजातकं (३-३-७)

७९. वस्सानि पञ्ञास समाधिकानि, वसिम्ह सेलस्स गुहाय रोमक;

असङ्कमाना अभिनिब्बुतत्ता [अभिनिब्बुतचित्ता (स्या. क.)], हत्थत्त [हत्थत्थ (स्या.)] मायन्ति ममण्डजा पुरे.

८०. ते दानि वक्कङ्ग किमत्थमुस्सुका, भजन्ति अञ्ञं गिरिकन्दरं दिजा;

न नून मञ्ञन्ति ममं यथा पुरे, चिरप्पवुत्था अथ वा न ते इमे.

८१. जानाम तं न मयं सम्पमूळ्हा [न मय’मस्म मूळ्हा (सी. पी.)], सोयेव त्वं ते मयमस्म नाञ्ञे;

चित्तञ्च ते अस्मिं जने पदुट्ठं, आजीविका [आजीवक (सी. स्या.), आजीविक (पी.)] तेन तमुत्तसामाति.

रोमकजातकं सत्तमं.

२७८. महिंसराजजातकं (३-३-८)

८२. किमत्थ [कमत्थ (सी. पी.)] मभिसन्धाय, लहुचित्तस्स दुब्भिनो [दूभिनो (सी. पी.)];

सब्बकामददस्सेव [दुहस्सेव (सी. स्या. पी.), रहस्सेव (क.)], इमं दुक्खं तितिक्खसि.

८३. सिङ्गेन निहनाहेतं, पदसा च अधिट्ठह;

भिय्यो [भीयो (सी.)] बाला पकुज्झेय्युं, नो चस्स पटिसेधको.

८४. ममेवायं मञ्ञमानो, अञ्ञेपेवं [अञ्ञम्पेवं (सी. स्या. पी.)] करिस्सति;

ते नं तत्थ वधिस्सन्ति, सा मे मुत्ति भविस्सतीति.

महिंसराजजातकं [महिसजातकं (सी. स्या. पी.)] अट्ठमं.

२७९. सतपत्तजातकं (३-३-९)

८५. यथा माणवको पन्थे, सिङ्गालिं वनगोचरिं;

अत्थकामं पवेदेन्तिं [पवदन्तिं (पी.)], अनत्थकामाति मञ्ञति;

अनत्थकामं सतपत्तं, अत्थकामोति मञ्ञति.

८६. एवमेव इधेकच्चो, पुग्गलो होति तादिसो;

हितेहि वचनं वुत्तो, पटिगण्हाति वामतो.

८७. ये च खो नं पसंसन्ति, भया उक्कंसयन्ति वा [च (सी. पी.)];

तञ्हि सो मञ्ञते मित्तं, सतपत्तंव माणवोति.

सतपत्तजातकं नवमं.

२८०. पुटदूसकजातकं (३-३-१०)

८८. अद्धा हि नून मिगराजा, पुटकम्मस्स कोविदो;

तथा हि पुटं दूसेति, अञ्ञं नून करिस्सति.

८९. न मे माता वा पिता वा, पुटकम्मस्स कोविदो;

कतं कतं खो दूसेम, एवं धम्ममिदं कुलं.

९०. येसं वो एदिसो धम्मो, अधम्मो पन कीदिसो;

मा वो धम्मं अधम्मं वा, अद्दसाम कुदाचनन्ति.

पुटदूसकजातकं दसमं.

उदपानवग्गो [अरञ्ञवग्गो (सी. पी. क.)] ततियो.

तस्सुद्दानं –

उदपानवरं वनब्यग्घ कपि, सिखिनी च बलाक रुचिरवरो;

सुजनाधिपरोमकदूस पुन, सतपत्तवरो पुटकम्म दसाति.