२७०. उलूकजातकं (३-२-१०)

५८. सब्बेहि किर ञातीहि, कोसियो इस्सरो कतो;

सचे ञातीहि अनुञ्ञातो [ञातीहनुञ्ञातो (सी. पी.)], भणेय्याहं एकवाचिकं.

५९. भण सम्म अनुञ्ञातो, अत्थं धम्मञ्च केवलं;

सन्ति हि दहरा पक्खी, पञ्ञवन्तो जुतिन्धरा.

६०. न मे रुच्चति भद्दं वो [भदन्ते (क.)], उलूकस्साभिसेचनं;

अक्कुद्धस्स मुखं पस्स, कथं कुद्धो करिस्सतीति.

उलूकजातकं दसमं.

पदुमवग्गो दुतियो.

तस्सुद्दानं –

पदुमुत्तम नागसिरिव्हयनो, स-महण्णव यूप खुरप्पवरो;

अथ भद्दली कुञ्जर रुक्ख पुन, खरवाच उलूकवरेन दसाति.