२६७. कक्कटकजातकं (३-२-७)

४९. सिङ्गीमिगो आयतचक्खुनेत्तो, अट्ठित्तचो वारिसयो अलोमो;

तेनाभिभूतो कपणं रुदामि, मा हेव मं पाणसमं जहेय्य [जहेय्या (पी.) जहा’य्ये (?)].

५०. अय्य न तं जहिस्सामि, कुञ्जरं सट्ठिहायनं [कुञ्जर सट्ठिहायन (सी. पी.)];

पथब्या चातुरन्ताय, सुप्पियो होसि मे तुवं.

५१. ये कुळीरा समुद्दस्मिं, गङ्गाय यमुनाय [नम्मदाय (सी. पी.)] च;

तेसं त्वं वारिजो सेट्ठो, मुञ्च रोदन्तिया पतिन्ति.

कक्कटक [कुळीर (क.)] जातकं सत्तमं.