२१०. कन्दगलकजातकं (२-६-१०)

११९. अम्भो को नाम यं रुक्खो, सिन्नपत्तो [सीनपत्तो (सी. पी.)] सकण्टको;

यत्थ एकप्पहारेन, उत्तमङ्गं विभिज्जितं [विसाटिकं (सी. स्या. पी.), विघाटितं (सी. निय्य)].

१२०. अचारि वतायं वितुदं वनानि, कट्ठङ्गरुक्खेसु असारकेसु;

अथासदा खदिरं जातसारं [जातिसारं (क.)], यत्थब्भिदा गरुळो उत्तमङ्गन्ति.

कन्दगलक [कन्दलक (क.)] जातकं दसमं.

नतंदळ्हवग्गो छट्ठो.

तस्सुद्दानं –

दळ्हबन्धन हंसवरो च पुन, विरूपक्ख सविट्ठक मच्छवरो;

सकुरुङ्ग सअस्सक अम्बवरो, पुन कुक्कुटको गरुळेन दसाति.