६. नतंदळ्हवग्गो

२०१. बन्धनागारजातकं (२-६-१)

१०१. न तं दळ्हं बन्धनमाहु धीरा, यदायसं दारुजपब्बजञ्च [बब्बजञ्च (सी.)];

सारत्तरत्ता मणिकुण्डलेसु, पुत्तेसु दारेसु च या अपेक्खा.

१०२. एतं दळ्हं बन्धनमाहु धीरा, ओहारिनं सिथिलं दुप्पमुञ्चं;

एतम्पि छेत्वान वजन्ति धीरा, अनपेक्खिनो कामसुखं पहायाति.

बन्धनागारजातकं पठमं.

२०२. केळिसीलजातकं (२-६-२)

१०३. हंसा कोञ्चा मयूरा च, हत्थयो [हत्थिनो (सी.), हत्थियो (स्या. पी.)] पसदा मिगा;

सब्बे सीहस्स भायन्ति, नत्थि कायस्मि तुल्यता.

१०४. एवमेव मनुस्सेसु, दहरो चेपि पञ्ञवा;

सो हि तत्थ महा होति, नेव बालो सरीरवाति.

केळिसीलजातकं दुतियं.

२०३. खण्डजातकं (२-६-३)

१०५. विरूपक्खेहि मे मेत्तं, मेत्तं एरापथेहि मे;

छब्यापुत्तेहि मे मेत्तं, मेत्तं कण्हागोतमकेहि च.

अपादकेहि मे मेत्तं, मेत्तं द्विपादकेहि मे;

चतुप्पदेहि मे मेत्तं, मेत्तं बहुप्पदेहि मे.

मा मं अपादको हिंसि, मा मं हिंसि द्विपादको;

मा मं चतुप्पदो हिंसि, मा मं हिंसि बहुप्पदो.

सब्बे सत्ता सब्बे पाणा, सब्बे भूता च केवला;

सब्बे भद्रानि पस्सन्तु, मा कञ्चि [किञ्चि (स्या. क.)] पापमागमा.

१०६. अप्पमाणो बुद्धो, अप्पमाणो धम्मो;

अप्पमाणो सङ्घो, पमाणवन्तानि सरीसपानि [सिरिसपानि (सी. स्या. पी.)];

अहिविच्छिकसतपदी, उण्णनाभि [उण्णानाभि (सी. स्या. पी.)] सरबूमूसिका.

कता मे रक्खा कता मे परित्ता, पटिक्कमन्तु भूतानि;

सोहं नमो भगवतो, नमो सत्तन्नं सम्मासम्बुद्धानन्ति.

खण्डजातकं ततियं.

२०४. वीरकजातकं (२-६-४)

१०७. अपि वीरक पस्सेसि, सकुणं मञ्जुभाणकं;

मयूरगीवसङ्कासं, पतिं मय्हं सविट्ठकं.

१०८. उदकथलचरस्स पक्खिनो, निच्चं आमकमच्छभोजिनो;

तस्सानुकरं सविट्ठको, सेवाले पलिगुण्ठितो मतोति.

वीरकजातकं चतुत्थं.

२०५. गङ्गेय्यजातकं (२-६-५)

१०९. सोभति मच्छो गङ्गेय्यो, अथो सोभति यामुनो [सोभन्ति मच्छा गङ्गेय्या, अथो सोभन्ति यामुना (स्या. पी.)];

चतुप्पदोयं पुरिसो, निग्रोधपरिमण्डलो;

ईसकायत [ईसमायत (क.)] गीवो च, सब्बेव अतिरोचति.

११०. यं पुच्छितो न तं अक्खासि [अक्खा (सी. स्या. पी.)], अञ्ञं अक्खासि [अक्खाति (स्या. पी.)] पुच्छितो;

अत्तप्पसंसको पोसो, नायं अस्माक रुच्चतीति.

गङ्गेय्यजातकं पञ्चमं.

२०६. कुरुङ्गमिगजातकं (२-६-६)

१११. इङ्घ वद्धमयं [वद्धमयं (सी. स्या. पी.)] पासं, छिन्द दन्तेहि कच्छप;

अहं तथा करिस्सामि, यथा नेहिति लुद्दको.

११२. कच्छपो पाविसी वारिं, कुरुङ्गो पाविसी वनं;

सतपत्तो दुमग्गम्हा, दूरे पुत्ते अपानयीति.

कुरुङ्गमिगजातकं छट्ठं.

२०७. अस्सकजातकं (२-६-७)

११३. अयमस्सकराजेन, देसो विचरितो मया;

अनुकामय कामेन [अनुकामयवनुकामेन (सी. पी.)], पियेन पतिना सह.

११४. नवेन सुखदुक्खेन, पोराणं अपिधीयति [अपिथीयति (सी. पी.), अपिथिय्यति (स्या.)];

तस्मा अस्सकरञ्ञाव, कीटो पियतरो ममाति.

अस्सकजातकं सत्तमं.

२०८. सुसुमारजातकं (२-६-८)

११५. अलं मेतेहि अम्बेहि, जम्बूहि पनसेहि च;

यानि पारं समुद्दस्स, वरं मय्हं उदुम्बरो.

११६. महती वत ते बोन्दि, न च पञ्ञा तदूपिका;

सुसुमार [सुंसुमार (सी. स्या. पी.)] वञ्चितो मेसि, गच्छ दानि यथासुखन्ति.

सुसुमारजातकं अट्ठमं.

२०९. कुक्कुटजातकं (२-६-९)

११७. दिट्ठा मया वने रुक्खा, अस्सकण्णा विभीटका [विभेदका (स्या. क.)];

न तानि एवं सक्कन्ति, यथा त्वं रुक्ख सक्कसि.

११८. पुराणकुक्कुटो [कक्करो (सी. स्या. पी.)] अयं, भेत्वा पञ्जरमागतो;

कुसलो वाळपासानं, अपक्कमति भासतीति.

कुक्कुट [कक्कर (सी. स्या. पी.)] जातकं नवमं.

२१०. कन्दगलकजातकं (२-६-१०)

११९. अम्भो को नाम यं रुक्खो, सिन्नपत्तो [सीनपत्तो (सी. पी.)] सकण्टको;

यत्थ एकप्पहारेन, उत्तमङ्गं विभिज्जितं [विसाटिकं (सी. स्या. पी.), विघाटितं (सी. निय्य)].

१२०. अचारि वतायं वितुदं वनानि, कट्ठङ्गरुक्खेसु असारकेसु;

अथासदा खदिरं जातसारं [जातिसारं (क.)], यत्थब्भिदा गरुळो उत्तमङ्गन्ति.

कन्दगलक [कन्दलक (क.)] जातकं दसमं.

नतंदळ्हवग्गो छट्ठो.

तस्सुद्दानं –

दळ्हबन्धन हंसवरो च पुन, विरूपक्ख सविट्ठक मच्छवरो;

सकुरुङ्ग सअस्सक अम्बवरो, पुन कुक्कुटको गरुळेन दसाति.