4. пат̣хамасена̄санасиккха̄падаван̣н̣ана̄

110. ‘‘еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хотӣ’’ти вачанато, парива̄ре ‘‘ека̄ пан̃н̃атти, ека̄ анупан̃н̃аттӣ’’ти (пари. 226) вачанато ча идха аттхи анупан̃н̃аттӣти сиддхам̣. кин̃ча̄пи сиддхам̣, ‘‘еван̃ча пана, бхиккхаве, имам̣ сиккха̄падам̣ уддисеййа̄тха̄’’тиа̄дина̄ пана пан̃н̃аттит̣т̣ха̄нам̣ на пан̃н̃а̄йати, кевалам̣ ‘‘ануджа̄на̄ми, бхиккхаве, ат̣т̣хама̄се…пе… никкхипиту’’нти еттакамева вуттам̣, там̣ касма̄ти че? пат̣хамапан̃н̃аттийам̣ вуттанайенева ваттаббато ависесатта̄ на вуттам̣. йади евам̣ ка̄ еттха анупан̃н̃аттӣти? аджджхока̄сети. айаманупан̃н̃атти пан̃н̃аттийампи аттхӣти че? аттхи, там̣ пана ока̄саматтадӣпанам̣, дутийам̣ ча̄тувассикама̄сасан̇кха̄така̄ладӣпанам̣. йасма̄ убхайампи екам̣ ка̄лока̄сам̣ екато катва̄ ‘‘аджджхока̄се’’ти вуттанти дӣпенто бхагава̄ ‘‘ануджа̄на̄ми, бхиккхаве…пе… никкхипиту’’нти а̄ха̄ти ведитаббам̣. тенева ма̄тика̄т̣т̣хакатха̄йам̣ (кан̇кха̄. ат̣т̣ха. пат̣хамасена̄санасиккха̄падаван̣н̣ана̄) вуттам̣ ‘‘йаттха ча йада̄ ча сантхаритум̣ на ват̣т̣ати, там̣ саббамидха аджджхока̄сасан̇кхйамева гатанти ведитабба’’нти. хемантака̄ласса ана̄паттисамайатта̄ идам̣ сиккха̄падам̣ нида̄на̄напеккханти сиддхам̣, татха̄ хи аджджхока̄сападаса̄маттхийена айам̣ висесо – васса̄нака̄ле овассакат̣т̣ха̄не аджджхока̄се, ман̣д̣апа̄димхи ча на ват̣т̣ати. хемантака̄ле пакатиаджджхока̄се на ват̣т̣ати, саббамидха овассакепи ман̣д̣апа̄димхи ват̣т̣ати, тан̃ча кхо йаттха химавассена сена̄санам̣ на темети, гимхака̄ле пакатиаджджхока̄сепи ват̣т̣ати, тан̃ча кхо ака̄ламегха̄дассанейева̄ти айам̣ висесо ‘‘ат̣т̣ха ма̄се’’ти ча ‘‘авассикасан̇кете’’ти ча етесам̣ двиннам̣ пада̄нам̣ са̄маттхийатопи сиддхо.

кин̃ча бхиййо – ат̣т̣хакатха̄йам̣ сандасситависесова. чамма̄дина̄ онаддхако ва̄ навава̄йимо ва̄ на сӣгхам̣ винассати. ка̄йа̄нугатикатта̄ти ка̄йе йаттха, таттха гататта̄. сан̇гхикаман̃ча̄димхи ка̄йам̣ пхуса̄петва̄ вихаритум̣ на ват̣т̣атӣти дхаммасириттхеро. ‘‘сан̇гхикам̣ пана ‘аджджхока̄сапарибхогена парибхун̃джатха, бханте, йатха̄сукха’нти да̄йака̄ денти сена̄санам̣, еварӯпе ана̄паттӣ’’ти андхакат̣т̣хакатха̄йам̣ вачанато, идха ча пат̣иккхепа̄бха̄вато ват̣т̣ати. ‘‘ан̃н̃ан̃ча еварӯпанти апаре’’ти вуттам̣. ‘‘па̄дат̣т̣ха̄на̄бхимукха̄ти нисӣдантасса па̄дапатанат̣т̣ха̄на̄бхимукха̄’’ти ликхитам̣. саммаджджантасса па̄дат̣т̣ха̄на̄бхимукханти а̄чарийасса такко.

111. ‘‘па̄дуддха̄рена̄ти бахиупача̄ре т̣хитатта̄’’ти ликхитам̣. гаччханти, дуккат̣ам̣ дхаммакатхикасса вийа. касма̄ на па̄читтийам̣? паччха̄ а̄гатехи вуд̣д̣хатарехи ут̣т̣ха̄петва̄ гахетаббато. дхаммакатхикасса пана анут̣т̣хапетаббатта̄. ‘‘ана̄н̣аттийа̄ пан̃н̃аттийампи тасса бха̄ро’’ти вуттам̣.

112. парихаран̣ейева̄ти еттха гахетва̄ вича̄ран̣ети дхаммасириттхеро. аттано сантакакаран̣ети упатиссаттхеро. бӣджанӣпаттакам̣ чатурассабӣджанӣ.

113. ‘‘йо бхиккху ва̄ са̄ман̣еро ва̄…пе… ладжджӣ хотӣ’ти вуттатта̄ аладжджим̣ а̄пуччхитва̄ гантум̣ на ват̣т̣атӣ’’ти ваданти. па̄т̣хе ‘‘кеначи палибуддхам̣ хотӣ’’ти ча ат̣т̣хакатха̄йам̣ ‘‘палибуддха’’нти ча сена̄санам̣йева сандха̄йа вуттам̣, тасма̄ татха̄пи аттхӣти гахетаббам̣. ‘‘ана̄пуччхам̣ ва̄’’ти па̄т̣хо.

пат̣хамасена̄санасиккха̄падаван̣н̣ана̄ нит̣т̣хита̄.