1. бхӯтага̄масиккха̄падаван̣н̣ана̄

89. пхарасум̣ ниггахетум̣ асакконтоти дасситабха̄вам̣ джа̄на̄пети. касма̄ айам̣ пхарасум̣ уггирӣти че? манусса̄нантиа̄ди тасса париха̄ро. ‘‘а̄кот̣еси чхиндӣти ча вачанато руккхадевата̄нам̣ хаттха̄ни чхиджджанти, на ча̄тумаха̄ра̄джика̄дӣнам̣ вийа аччхеджджа̄нӣ’’ти ваданти.

90-92. бхаванти ахувун̃ча̄ти двика̄лико бхӯтасаддо. йади бӣджато ниббаттена бӣджам̣ дасситам̣, тадева сантакам̣ йадидам̣. сова куккут̣о мам̣симаккхитоти айамева хи париха̄ро. ат̣т̣хакатха̄супи хи ‘‘бӣдже бӣджасан̃н̃ӣ’’ти ликхитам̣. йам̣ бӣджам̣ бхӯтага̄мо на̄ма хоти, тасмим̣ бӣдже бхӯтага̄мабӣджети йоджетва̄. амӯлакатта̄ кира сампун̣н̣абхӯтага̄мо на хоти, ‘‘самӯлапатто ева хи бхӯтага̄мо на̄ма̄’’ти ка̄ран̣ам̣ ваданти. ‘‘абхӯтага̄мамӯлатта̄ти бхӯтага̄мато ануппаннатта̄ абхӯтага̄мамӯлам̣, бхӯтага̄масса амӯлакатта̄ ва̄. на хи тато ан̃н̃о бхӯтага̄мо уппаджджатӣ’’ти двидха̄пи ликхитам̣. пийан̇гу асанаруккхо вад̣д̣ханаттачо кхаджджапхало, ‘‘пӣтаса̄ло’’типи вуччати. амӯлакабхӯтага̄ме сан̇гахам̣ гаччхатӣти на̄л̣икерассева̄йам̣. гхат̣апит̣т̣хиджа̄татта̄, бӣджага̄ма̄нуломатта̄ ча дуккат̣аваттху. на ва̄сетаббам̣ ‘‘дурӯпачин̣н̣атта̄’’ти ликхитам̣, ‘‘йесам̣ руккха̄нам̣ са̄кха̄ рухатӣти вачанато йесам̣ на рухати, тесам̣ са̄кха̄йа каппийакаран̣акиччам̣ наттхӣти сиддха’’нти вуттам̣. муддатин̣анти тасса на̄мам̣. ‘‘мун̃джатин̣анти па̄т̣хо’’ти ликхитам̣.

саман̣акаппехӣти саман̣авоха̄рехи, тасма̄ ваттаббам̣ бхиккхуна̄ ‘‘каппийам̣ карохӣ’’ти. тасса а̄н̣аттийа̄ каронтена̄пи са̄ман̣ера̄дина̄ ‘‘каппийа’’нти ватва̄ва аггипариджитам̣ ка̄таббанти сиддхам̣. аггипариджита̄дӣни вийа каппийатта̄ абӣджаниббат̣т̣абӣджа̄нипи ‘‘пан̃чахи саман̣акаппехӣ’’ти (чӯл̣ава. 250) еттха павит̣т̣ха̄ни, йатха̄ла̄бхато ва̄ саман̣акаппавачанам̣ гахетаббам̣. ‘‘каппийа’нти ваттука̄мо ‘каппа’нти че вадати, ‘ват̣т̣атӣ’ти вадантӣ’’ти вуттам̣. ‘‘каппийа’нти вачанам̣ сакасакабха̄са̄йапи ват̣т̣атӣ’’ти ваданти. ‘‘каппийанти ватва̄’’ти вуттатта̄ бхиккхуна̄ ‘каппийам̣’иччева ваттаббам̣, ‘‘итарена пана йа̄йа ка̄йачи бха̄са̄йа̄’’ти ваданти, вӣмам̣ситаббам̣. ‘‘уччхум̣ каппийам̣ карисса̄мӣти да̄рум̣ виджджхатӣ’’ти вачанато каппийам̣ ка̄таббам̣ сандха̄йа вираддхети вуттам̣ хоти, а̄чарийа̄ пана ‘‘каппийам̣ ка̄ретаббам̣ сандха̄йа каппийанти ситтха̄дим̣ ка̄рети, ват̣т̣атӣ’’ти ваданти, тасса ка̄ран̣ам̣ ваданта̄ ка̄тум̣ ват̣т̣анабха̄венева вираджджхитва̄ катепи каппийам̣ джа̄там̣. йади на ват̣т̣еййа, ситтха̄димхи кате на ват̣т̣еййа̄ти, упапариккхитаббам̣. ут̣т̣хитасева̄лагхат̣ам̣ а̄тапе никкхипитум̣ ват̣т̣ати, викопетука̄мата̄йа сати дуккат̣ам̣ йуттам̣ вийа. ‘‘пуппхараджджубха̄джанагатика̄, тасма̄ на ват̣т̣ати. на̄л̣е ва̄ баддхапуппхакала̄пе на̄л̣асмим̣ катепи ват̣т̣ати тасмим̣ пуппхасса аттхита̄йа̄’’ти ваданти. пора̄н̣аган̣т̣хипаде ‘‘бӣджага̄мена бхӯтага̄мо дассито анавасесапарийа̄да̄наттха’’нти вуттам̣.

бхӯтага̄масиккха̄падаван̣н̣ана̄ нит̣т̣хита̄.