9. са̄сан̇касиккха̄падаван̣н̣ана̄

652. ‘‘тин̣н̣ам̣ чӣвара̄нам̣ ан̃н̃атарам̣ чӣваранти идам̣ тичӣваре ева айам̣ видхи, итарасмим̣ йатха̄сукханти дассанаттхам̣ вутта’’нти ваданти. ‘‘атирекачха̄раттам̣ виппавасантӣ’’ти тасмим̣йева сена̄сане ва̄со на виппава̄соти катва̄ вуттам̣. касма̄? чӣвараппаваттиджа̄нанато. еттха кин̃ча̄пи ‘‘а̄ран̃н̃акам̣ на̄ма сена̄санам̣ пан̃чадханусатикам̣ паччхима’’нти вачанато атирекатопи вуттам̣, а̄ран̃н̃акамева пана сена̄санам̣ хоти, дхутан̇гам̣ раккхати чӣвараппаваттиджа̄нанапалибодхасамбхавато.

653. ‘‘га̄вутато атирекаппама̄н̣ена лабхатӣ’’ти йам̣ вуттам̣, там̣ катхам̣ пан̃н̃а̄йатӣти че? ‘‘сийа̄ ча тасса бхиккхуно кочидева паччайо тена чӣварена виппава̄са̄йа̄’’ти вачанато. йоджанаппама̄н̣епи сийа̄ти че? на, ‘‘пуна га̄масӣмам̣ оккамитва̄ васитва̄ паккаматӣ’’ти ана̄паттива̄ре анун̃н̃а̄татта̄. йади евам̣ ‘‘йоджанаппама̄н̣е на лабхатӣ’’ти идам̣ кинти? идам̣ нибаддха̄ва̄савасенева вуттам̣. таттха дхутан̇гам̣ бхиджджатӣти? на бхиджджати, кинту на идха дхутан̇га̄дхика̄ро аттхӣти. атха касма̄ ‘‘айам̣ дхутан̇гачороти ведитаббо’’ти вуттанти? асамбхавато. катхам̣ пан̃н̃а̄йатӣти? ан̇гесу абха̄вато. дхутан̇гадхарасса патирӯпасена̄санадӣпанато дхутан̇гадхарата̄ тасса сиддха̄. вачанаппама̄н̣атоти че? на, вачанаппама̄н̣ато ча па̄л̣ийева пама̄н̣ам̣. ‘‘ана̄патти пуна га̄масӣмам̣ оккамитва̄ васитва̄ паккаматӣ’’ти хи вуттам̣. га̄масӣма̄ никкхамитва̄ киттакам̣ ка̄лам̣ васитва̄ паккамитаббанти че? пунадивасейева, тасма̄ ат̣т̣хамо арун̣о нибаддха̄ва̄се ва̄ гантаббат̣т̣ха̄не ва̄ ут̣т̣хетабботи еке. анточха̄раттанти еке. йа̄ва нибаддха̄ва̄сам̣ на каппетӣти еке. йа̄ва маггапариссамавинодана̄ти еке. сати антара̄йе анточха̄раттам̣ васати, ана̄патти. нибаддха̄ва̄сакаппане сати арун̣уггамане а̄патти. саче там̣саттамо дивасо, тадахева никкхиттачӣварам̣ гахетаббам̣, паччуддхаритаббам̣ ва̄ти еке. саче антара̄ навамаггапа̄тубха̄вена ва̄ навага̄масаннивесена ва̄, там̣ сена̄санам̣ ан̇гасампаттито париха̄йати. тадахева чӣварам̣ гахетаббам̣ ва̄ паччуддхаритаббам̣ ва̄. чха̄раттам̣ виппавасантасса че париха̄йати, ана̄патти анун̃н̃а̄тадивасатта̄ти еке. а̄патти ева анан̇гасампаттитоти еке. йуттатарам̣ панеттха вича̄ретва̄ гахетаббам̣. саче дхутан̇гадхаро хоти, га̄масӣма̄йам̣ аваситва̄ паччхимаппама̄н̣айутте т̣ха̄не васитва̄ паккамитаббам̣. пат̣хамам̣ баддхаавиппава̄сасӣмо че га̄мо хоти, ан̃н̃асмимпи ма̄се антосӣма̄йа васато ана̄патти. пора̄н̣аган̣т̣хипаде ‘‘йатха̄вуттасена̄сане васантена̄пи чха̄раттамева чӣварам̣ га̄ме никкхипитаббанти адхиппа̄йена ан̃н̃ам̣ анточха̄раттампи ан̃н̃ампи васато а̄паттийева̄’’ти вуттам̣.

са̄сан̇касиккха̄падаван̣н̣ана̄ нит̣т̣хита̄.