10. парин̣атасиккха̄падаван̣н̣ана̄

657. детха̄вусо амха̄канти еттха акатавин̃н̃атти хоти на хотӣти? хоти, йади евам̣ ан̃н̃а̄такавин̃н̃аттисиккха̄падасса ча имасса ча ким̣ на̄на̄каран̣анти? там̣ ан̃н̃а̄такааппава̄ритейева вин̃н̃а̄пентасса, идам̣ н̃а̄такапава̄ритепи, там̣ аначчхинначӣварассева, идам̣ тассапи, там̣ чӣварам̣йева вин̃н̃а̄пентасса, идам̣ ачӣварампи. евам̣ санте идам̣ там̣ антокатва̄ т̣хитам̣ хоти, тасма̄ двиннампи ан̇гасампаттийа̄ сати кена бхавитаббанти? имина̄ бхавитаббам̣ имасса ниппадесатоти еке. двӣхипи бхавитаббам̣ убхиннампи ан̇гасиддхитоти еке. има̄ни тасса ан̇га̄ни викаппанупагачӣварата̄, самайа̄бха̄во, ан̃н̃а̄такавин̃н̃атти, та̄йа ча пат̣ила̄бхоти чатта̄ри. имасса пана сан̇гхе парин̣атабха̄во, н̃атва̄ аттано парин̣а̄манам̣, пат̣ила̄бхоти тӣн̣и. еттха пат̣хамо ва̄до айутто катва̄пи ока̄сам̣ ат̣т̣хакатха̄йам̣, парива̄ре ча авича̄ритатта̄. йади евам̣ таттха ан̇гесу ‘‘анан̃н̃апарин̣атата̄’’ти ваттаббанти че? на ваттаббам̣, аттхато сиддхатта̄. парин̣атасиккха̄пададвайасиддхито, парин̣атасан̃н̃ито, а̄паттисамбхавато ча ‘‘майхампи детха̄’’ти вадати, ‘‘ват̣т̣атӣ’’ти ануддит̣т̣хам̣, ‘‘амха̄кампи аттхӣ’’ти вуттатта̄ ват̣т̣ати. ‘‘сан̇гхасса парин̣атам̣…пе… а̄патти дуккат̣асса̄’’ти еттха ‘‘пуггаласса̄’’ти на вуттам̣, йато суддхапа̄читтийавасена а̄гататта̄. ‘‘ан̃н̃ачетийасса̄’’ти на вуттам̣ сан̇гхасса ачетийатта̄, тасма̄йева ‘‘четийасса парин̣атам̣…пе… а̄патти дуккат̣асса̄’’ти еттха̄пи ‘‘ан̃н̃асан̇гхасса ан̃н̃апуггаласса̄’’ти на вуттам̣. ‘‘йато татха̄ идха ча ‘пуггаласса парин̣атам̣…пе… а̄патти дуккат̣асса̄’ти еттха ча ‘аттанопӣ’ти кин̃ча̄пи на вуттам̣, татха̄пи самбхаватӣ’’ти ваданти. там̣ пана идха аттано парин̣а̄мана̄дхика̄ратта̄ имасса сиккха̄падасса на вуттанти еке. татуттарисиккха̄паде ‘‘ан̃н̃ассаттха̄йа̄’’ти (па̄ра̄. ат̣т̣ха. 2.526) падам̣ вийа̄ти еке. там̣ на, еттха пуггалапарин̣а̄манасиккха̄паде авуттатта̄. дхаммасириттхеро пана̄ха –

‘‘аттано ан̃н̃ато ла̄бхам̣, сан̇гхассан̃н̃асса ва̄ натам̣;

парин̣а̄меййа ниссагги, па̄читтийампи дуккат̣а’’нти.

тассаттхо – сан̇гхасса парин̣атам̣ аттано парин̣а̄меййа ниссаггийам̣. тадева ан̃н̃ато парин̣а̄меййа па̄читтийам̣. ан̃н̃асса парин̣атам̣ аттано ва̄ парасса ва̄ парин̣а̄меййа дуккат̣анти, тасма̄ ан̃н̃а̄такавин̃н̃аттиа̄дӣсу вутта̄паттисамбхавато идха парин̣атадвайе ‘‘аттано’’ти падам̣ на вуттам̣. тасмин̃хи вутте дуккат̣аматтаппасан̇го сийа̄, авутте панетесу вутта̄паттӣнам̣ йатха̄гамаман̃н̃атара̄ ча идха авуттасиддхи дуккат̣ан̃ча̄ти две а̄паттийо екато хонтӣти винайадхара̄нам̣ анавасесан̃а̄н̣асса ока̄со като хотӣти.

ити тим̣сакакан̣д̣ам̣ са̄раман̣д̣ам̣,

аламетам̣ винайасса са̄раман̣д̣е;

идха нит̣т̣хитасаббаса̄раман̣д̣ам̣,

винайавасена пуна̄ти са̄раман̣д̣анти.

парин̣атасиккха̄падаван̣н̣ана̄ нит̣т̣хита̄.

нит̣т̣хито паттавагго татийо.

ниссаггийаван̣н̣ана̄ нит̣т̣хита̄.