7. ел̣акаломадхова̄панасиккха̄падаван̣н̣ана̄

581. кин̃ча̄пи пура̄н̣ачӣварадхованасиккха̄паде чӣварам̣ т̣хапетва̄ ‘‘ан̃н̃ам̣ париккха̄рам̣ дхова̄петӣ’’ти (па̄ра̄. 507) ана̄паттива̄ре вуттам̣. имасса пана сиккха̄падасса уппаннака̄лато пат̣т̣ха̄йа ел̣акаломадхова̄пана̄дина̄ а̄паттӣти еке. са̄ ва̄ ана̄патти мӯла̄паттито ева, на имамха̄ти еке. ел̣акалома̄нам̣ апариккха̄ратта̄ бхат̣т̣хам̣ аггахан̣амева̄ти еке. имасса антиманайасса аттхаппака̄санаттхам̣ идам̣ пан̃ха̄каммам̣ – ‘‘дхова̄петӣ’’ти идам̣ раджа̄панавиджат̣а̄панаггахан̣ена ниппадесава̄чипадам̣, уда̄ху аггахан̣ена саппадесава̄чипадам̣. кин̃четтха йади ниппадесава̄чипадам̣, саббаттха идамева ваттаббам̣, на итара̄ни. атха саппадесава̄чипадам̣, ‘‘авутта̄ дховати, апарибхуттам̣ дхова̄петӣ’’ти еттха виродхо. ‘‘авутта̄ раджати виджат̣ети, ниссаггийа’’нти анит̣т̣хаппасан̇гатоти? десана̄вила̄саматтам̣ бхагавато вачанам̣, каттхачи тикападавачанам̣, каттхачи екападавачанам̣, ниппадесападамева те вадантӣти. саче ‘‘катабхан̣д̣ам̣ дхова̄петӣ’’ти еттха пат̣ивиродхо, ‘‘катабхан̣д̣ам̣ виджат̣а̄пети, ана̄паттӣ’’ти анит̣т̣хаппасан̇гато ана̄патти ева̄ти че? на, акатабхан̣д̣асса суддхаломасса виджат̣а̄панам̣ ито ва̄ да̄таббам̣. удака̄дидхованавасена пин̣д̣етва̄ т̣хита̄нам̣ виджат̣а̄панам̣ лаббхатӣти че? пура̄н̣асантхатасса виджат̣а̄пане ана̄паттийа̄ бхавитаббам̣, на ча там̣ йуттам̣ ‘‘апарибхуттам̣ дхова̄петӣ’’ти вачанато. тена парибхуттам̣ дхова̄пети раджа̄пети виджат̣а̄пети, ниссаггийамева̄ти сиддхам̣ хоти, тан̃ча парибхуттам̣ на̄ма катабхан̣д̣амева хоти. на хи сакка̄ ел̣акалома̄ни парибхун̃джитум̣, ан̃н̃атха̄ ‘‘парибхуттам̣ дхова̄петӣ’’ти вачанам̣ нираттхакам̣ хоти. на хи еттха ‘‘пура̄н̣а̄ни ел̣акалома̄ни дхова̄пеййа ва̄’’ти вачанам̣ аттхи пура̄н̣ачӣварасиккха̄паде вийа. таттха а̄диннакаппавасена, идха там̣ ликхитам̣. лекхадосоти че? на, висесахетуно абха̄ва̄, пура̄н̣ачӣварасиккха̄паде апарибхуттам̣ катабхан̣д̣ам̣ на̄ма, ‘‘камбалакоджавасантхата̄ди’’нти вачанато ча. кин̃ча̄пи имина̄ саддена айаматтхо сиддхо, ‘‘дхова̄петӣ’’ти идам̣ пана сийа̄ ниппадесам̣. сийа̄ саппадесам̣. тан̃хи ‘‘авутта̄ дховатӣ’’тиа̄дӣсу ниппадесам̣. ‘‘катабхан̣д̣ам̣ дхова̄петӣ’’ти еттха саппадесам̣. ‘‘акатабхан̣д̣ам̣ дхова̄пети раджа̄пети, ана̄паттӣ’’ти ‘‘виджат̣а̄пети, ана̄паттӣ’’ти вачанаппама̄н̣ато ана̄патти ева̄ти че? на, вачанаппама̄н̣ато ева а̄паттӣти а̄паджджанато. ‘‘апарибхуттам̣ дхова̄петӣ’’ти вачанамева хи там̣ апарибхуттам̣ сантхатам̣ виджат̣а̄пентасса ана̄паттӣти дӣпети че? сиддхам̣ парибхуттам̣ виджат̣а̄пентасса а̄патти ева̄ти.

ел̣акаломадхова̄панасиккха̄падаван̣н̣ана̄ нит̣т̣хита̄.