4. чхаббассасиккха̄падаван̣н̣ана̄

562. навам̣ на̄ма каран̣ам̣ упа̄да̄йа̄ти идам̣ а̄дикаран̣ато пат̣т̣ха̄йа вассаган̣анам̣ дӣпети. каритва̄ ва̄ти вачанам̣ нит̣т̣ха̄надивасато пат̣т̣ха̄йа̄ти дӣпети. дха̄ретаббанти вачанам̣ пана парибхогато пат̣т̣ха̄йа̄ти дӣпети, йасма̄ ладдхасаммутикасса гатагатат̣т̣ха̄не чханнам̣ чханнам̣ васса̄нам̣ оратова ката̄ни бахӯнипи хонти, тасма̄ ан̃н̃ам̣ наванти ким̣ катато ан̃н̃ам̣, уда̄ху дха̄ритато ан̃н̃анти? кин̃четтха йади катато ан̃н̃ам̣, тесу ан̃н̃атарам̣ дуккатам̣ ва̄ парибхогаджин̣н̣ам̣ ва̄ пуна ка̄тум̣ ват̣т̣ати, тан̃ча кхо вина̄пи пура̄н̣асантхатасса сугатавидаттхим̣ аппат̣исиддхапарийа̄паннатта̄. катато хи ан̃н̃ам̣ пат̣исиддхам̣, идан̃ча пуббакатанти тато анантарасиккха̄падавиродхо хоти. атха дха̄ритато ан̃н̃ам̣ на̄ма, саммути нираттхика̄ а̄паджджати, пат̣хамакатам̣ че апарибхуттам̣, сатийа̄пи саммутийа̄ ан̃н̃ам̣ навам̣ на ват̣т̣атӣти адхиппа̄йо? татридам̣ саннит̣т̣ха̄нанидассанам̣ – нит̣т̣ха̄надивасато пат̣т̣ха̄йа чханнам̣ чханнам̣ васса̄нам̣ париччхедо ведитаббо. таттха ча саттаме вассе сампатте чхаббасса̄ни парипун̣н̣а̄ни хонти. тан̃ча кхо ма̄сапариччхедавасена, на вассапариччхедавасена. саттаме парипун̣н̣ан̃ча ӯнакан̃ча вассам̣ на̄ма, тасма̄ виппакатассева саче чхаббасса̄ни пӯренти, пуна нит̣т̣ха̄надивасато пат̣т̣ха̄йа чхаббасса̄ни лабханти. тан̃ча кхо парибхуттам̣ ва̄ хоту апарибхуттам̣ ва̄, дха̄ритамева на̄ма. йасма̄ ‘‘навам̣ на̄ма каран̣ам̣ упа̄да̄йа вуччатӣ’’ти вуттам̣, тасма̄ чханнам̣ васса̄нам̣ парато тамева пуббакатам̣ дуккатабха̄вена, парибхогаджин̣н̣ата̄йа ва̄ виджат̣етва̄ пуна кароти, нит̣т̣ха̄надивасато пат̣т̣ха̄йа чхаббассапарамата̄ дха̄ретаббам̣, атирекам̣ ва̄. анто че кароти, тадева ан̃н̃ам̣ навам̣ на̄ма хоти каран̣ам̣ упа̄да̄йа, тасма̄ ниссаггийам̣. ан̃н̃атха̄ ‘‘навам̣ на̄ма каран̣ам̣ упа̄да̄йа̄’’ти имина̄ на кочи висесо аттхи. евам̣ санте ким̣ хоти? ат̣т̣хуппаттӣти. ‘‘йа̄чанабахула̄ вин̃н̃аттибахула̄ вихарантӣ’’ти хи таттха вуттам̣, тан̃ча ан̃н̃асса каран̣ам̣ дӣпети. йади евам̣ там̣ ниббисесамева а̄паджджатӣти? на̄паджджати. айам̣ панасса висесо, йасма̄ ‘‘ан̃н̃ена катам̣ пат̣илабхитва̄ парибхун̃джати, ана̄паттӣ’’ти вуттаттхо висесоти. ким̣ вуттам̣ хоти? ‘‘навам̣ на̄ма каран̣ам̣ упа̄да̄йа вуччатӣ’’ти вутте атирекачӣварасса уппатти вийа пат̣ила̄бхенасса уппатти навата̄ а̄паджджати. тато пат̣иладдхадивасато пат̣т̣ха̄йа чхаббассапарамата̄ дха̄ретаббам̣. орена че чханнам̣ васса̄нам̣…пе… ка̄ра̄пеййа, ниссаггийанти а̄паджджати, тасма̄ навам̣ на̄ма каран̣амева упа̄да̄йа вуччати, на пат̣ила̄бхам̣. орена чханнам̣ васса̄нам̣ аттано ануппаннатта̄ ‘‘нава’’нти сан̇кхйам̣ гатам̣, аппат̣иладдхам̣ че ка̄ра̄пеййа, йатха̄ ла̄бхо, татха̄ кареййа ва̄ ка̄ра̄пеййа ва̄ти ча на хоти. касма̄? йасма̄ ан̃н̃ена катам̣ пат̣илабхитва̄ парибхун̃джати, ана̄паттӣти висесоти.

чхаббассасиккха̄падаван̣н̣ана̄ нит̣т̣хита̄.