4. пура̄н̣ачӣварасиккха̄падаван̣н̣ана̄

503-505. бхаттависсагганти бхаттакичча̄дхит̣т̣ха̄нам̣. бхаттакичча̄дхит̣т̣ха̄навибха̄ганти пора̄н̣а̄. таттха на̄ма тванти таттха тайа̄ катакамме евам̣ акаттаббе сати дхова̄писсаси на̄ма. атха ва̄ со на̄ма тванти аттхо. убхатосан̇гхе упасампанна̄ти бхиккхӯнам̣ сантике упасампада̄йа пат̣иккхиттатта̄ таданупасан̇габхайа̄ евам̣ вуттанти ведитаббам̣. ‘‘пура̄н̣ачӣвара’’нти еттха пура̄н̣абха̄вадӣпанаттхамева ‘‘саким̣ ниваттхампи саким̣ па̄рутампӣ’’ти вуттам̣, тасма̄ ‘‘чӣварам̣ на̄ма чханнам̣ чӣвара̄нам̣ ан̃н̃атарам̣ чӣварам̣ викаппанупагам̣ паччхима’’нти вачанасса ока̄со на джа̄тоти еке. йасма̄ викаппанупагапаччхимам̣ идха на̄дхиппетам̣, нива̄санапа̄рупанупагамева̄дхиппетам̣, тенева нисӣданапаччаттхаран̣е дуккат̣ам̣ вуттам̣, тасма̄ на вуттанти еке. джа̄типпама̄н̣а̄вачанато йам̣ кин̃чи пура̄н̣аваттхам̣ дхова̄пентасса ниссаггийамева, тенева ‘‘ана̄патти чӣварам̣ т̣хапетва̄ ан̃н̃ам̣ париккха̄рам̣ дхова̄петӣ’’ти вуттам̣. тхавикампи хи асучимаккхитам̣ парибхуттам̣ дхова̄пети, ниссаггийамева ол̣а̄рикатта̄, аппатирӯпатта̄ ча. тенева кан̇кха̄витаран̣ийам̣ имасмим̣ т̣ха̄не чӣварапариччхедо на вуттоти еке, вича̄ретва̄ йуттатарам̣ гахетаббам̣. ‘‘раджитва̄ каппам̣ катва̄ти каппийам̣ катамева нива̄сетум̣, па̄рупитум̣ ва̄ ват̣т̣ати, нетара’’нти вуттам̣. имина̄ ча маджджхиматтхерава̄до упаттхамбхито хоти, нопаттхамбхито. раджитва̄тиа̄ди пана винайавидхидассанаттхам̣ вуттанти мама такко. йатха̄ ан̃н̃а̄тика̄йа ан̃н̃а̄тикасан̃н̃ӣва̄ре тӣн̣и чатукка̄ни, евам̣ вематикан̃а̄тикава̄ресу ча̄ти нава чатукка̄ни хонти. еттха̄ха – екава̄рам̣ дховитва̄ дхованесу дхурам̣ никкхипитва̄ пуна ‘‘дуддхота’’нти ман̃н̃ама̄на̄ дховати, ана̄паттийа̄ бхавитаббам̣, дутийава̄рам̣ авутта̄ дховати на̄ма хотӣти? вуччате – саче бхиккху ‘‘алам̣ етта̄вата̄ дхотена̄’’ти пат̣иккхипати, пуна дховантӣ авутта̄ дховати на̄ма̄ти йуджджати. но че, вутта̄ва хотӣти ведитаббам̣. бхиккхусса лин̇гапариваттане екатоупасампанна̄йа васена а̄патти са̄кийа̄нӣнам̣ вийа.

506. екена ваттхуна̄ти йена кеначи пат̣хамена. ‘‘тин̣н̣ам̣ чатукка̄нам̣ васена̄’’ти па̄т̣хо. бхиккхӯнам̣ сантике ат̣т̣хава̄чика̄йа упасампанна̄йа па̄кат̣атта̄ там̣ аватва̄ са̄кийа̄нийова вутта̄ апа̄кат̣атта̄.

пура̄н̣ачӣварасиккха̄падаван̣н̣ана̄ нит̣т̣хита̄.