3. татийакатхинасиккха̄падаван̣н̣ана̄

497. наппахотӣти ла̄макапариччхедам̣ на па̄пун̣а̄ти, тенева тичӣварасса мут̣т̣хипан̃чака̄дила̄макапариччхедова та̄ва вутто. чӣваре пачча̄са̄ чӣварапачча̄са̄. тенетам̣ дӣпети – там̣ чӣварам̣ паччха̄ лаббхату ва̄ ма̄ ва̄, йа̄ва са̄ пачча̄са̄ чхиджджати, та̄ва идам̣ мӯлачӣварам̣ т̣хапетум̣ ануджа̄на̄мӣти. ‘‘чӣварапачча̄са̄’’ти марийа̄даттхе ниссаккавачанам̣, бхумматтхе ва̄ паччаттавачанам̣ катам̣.

499-500. нит̣т̣хитачӣварасмим̣ …пе… чӣвара̄са̄ ва̄ упаччхинна̄тиа̄димхи тӣсу чӣваресу ан̃н̃атарам̣ катам̣ хоти, сеса̄ аттхи, раккхати. чӣварапалибодхасса упаччхеде, уббхатасмин̃ча катхине самайе ва̄ хемантасса самайе ва̄ ака̄лачӣварам̣ уппаджджеййа, кхиппамева ка̄ретаббам̣. сати па̄рипӯрийа̄ пачча̄са̄ на раккхати, асати наттхи че пачча̄са̄, на раккхати. ‘‘анаттхате катхине ека̄дасама̄се уппанна’’нти вачанато апаракаттика̄ аттхате ва̄ анаттхате ва̄ самайова. хеманто сийа̄ самайо аттхате, сийа̄ асамайо анаттхате. тато парам̣ екам̣сато асамайо ва̄ти. ‘‘а̄дисса динна’’нти идам̣ идха алаббхама̄нампи аттхуддха̄равасена вуттам̣ бхиккхунӣнам̣ дутийаниссаггийе (па̄чи. 738 а̄дайо) сесам̣ ака̄лачӣварам̣ вийа. таттха хи бхиккхунисан̇гхасса ‘‘сампатта̄ бха̄джентӯ’’ти евам̣ а̄дисса диннамева ‘‘ака̄лачӣварам̣ ка̄лачӣвара’’нти адхит̣т̣хахитва̄ бха̄джентийа̄ ниссаггийам̣. татха̄ хи таттха йатха̄ ‘‘ака̄лачӣварам̣ на̄ма анаттхате катхине ека̄дасама̄се уппаннам̣, аттхате катхине саттама̄се уппанна’’нти идам̣ аттхуддха̄равасена вуттам̣, евам̣сампадамидам̣. йади евам̣ ‘‘екапуггаласса идам̣ туйхам̣ дамхӣти динна’’нти идам̣ киматтхам̣ вуттам̣, на хи там̣ бха̄джанӣйанти че? абха̄джанӣйаса̄ман̃н̃ато вуттам̣ хоти. йатха̄ сан̇гхасса а̄дисса диннам̣ аттхатакатхинехи ева бхиккхӯхи абха̄джанӣйатта̄ ака̄лачӣварам̣ на̄ма джа̄там̣, евам̣ пуггаликампи итарехӣти аттхо. евам̣ сантепи кассачи сийа̄ ‘‘а̄дисса диннампи даса̄хамева париха̄рам̣ лабхатӣ’’ти. тассетам̣ па̄т̣икан̇кхам̣. пат̣хамакатхине ‘‘нит̣т̣хитачӣварасмим̣ бхиккхуна̄ уббхатасмим̣ катхине’’ти идан̃хи нираттхаканти. ануббхатасмимпи хи катхине даса̄хапарамамева дха̄ретаббанти вин̃н̃а̄татта̄ ана̄дисса диннамева сандха̄йетам̣ вуттам̣ сийа̄ти че? евам̣ сантепи ана̄дисса диннампи анаттхатакатхина̄нам̣ апаракаттика̄йа даса̄хамева париха̄рам̣ лабхати ‘‘нит̣т̣хитачӣварасмим̣ бхиккхуна̄ уббхатасмим̣ катхине’’ти вуттатта̄. а̄манта̄ти че? ‘‘анаттхате катхине ека̄дасама̄се уппанна’’нти вачанена вируджджхати, тасма̄ йатха̄вуттанайеневеттха саннит̣т̣ха̄нам̣ гантаббам̣.

ануган̣т̣хипаде вуттам̣ ‘‘пат̣хамасиккха̄паде саббачӣвара̄нам̣ йа̄вадаттхачӣваравасена катхинама̄саббхантаре даса̄ха̄тиккамепи ана̄патти париха̄расса диннатта̄. йатха̄ катхинама̄саббхантаре а̄дисса диннамака̄лачӣварам̣ ка̄лачӣварапариха̄рамева лабхати, татха̄ итарама̄сепи лабхатӣти ведитаббам̣. тасма̄ евам̣ ‘нит̣т̣хитачӣварасмим̣ бхиккхуна̄ уббхатасмим̣ катхине бхиккхуно панева чӣварам̣ уппаджджеййа̄’тиа̄дина̄ сиккха̄паде сиддхепи анаттхатакатхина̄нам̣ паччхимакаттикама̄сам̣ ануджа̄нантена ‘ака̄лачӣварам̣ уппаджджеййа̄’ти вуттам̣. еван̃хи авутте ака̄лачӣварам̣ на̄ма ‘анаттхате катхине ека̄дасама̄се уппанна’нти на сакка̄ ваттум̣. еван̃хи вачанато анаттхатакатхина̄нам̣ аттхатакатхина̄нам̣ вийа саббачӣвара̄нам̣ паччхимакаттикама̄се даса̄ха̄тиккаме ниссаггийам̣ на хотӣ’’тиа̄ди.

бхиййопи евам̣ вуттам̣ – йам̣ пана майа̄ ‘‘пат̣хамакатхине даса̄хапарамам̣ атирекачӣварам̣ дха̄ретабба’’нти анун̃н̃а̄там̣, тампи катхинама̄сато бахи уппаннамева, на антоти айаматтхо дӣпито хоти. катхам̣? атирекачӣварасса даса̄хапариха̄рато уддхам̣ а̄паджджитабба̄паттим̣ ‘‘нит̣т̣хитачӣварасмим̣ бхиккхуна̄ уббхатасмим̣ катхине’’ти анупан̃н̃аттийа̄ катхинаббхантаре ва̄ретва̄ тато уддхам̣ уппаннесу даса̄ха̄тиккаме а̄паджджитабба̄паттим̣ имина̄ сиккха̄падена ва̄ретум̣ ‘‘ака̄лачӣварам̣ уппаджджеййа̄’’тиа̄ди вуттам̣. тена ‘‘ка̄лепи а̄дисса диннам̣, етам̣ ака̄лачӣварам̣ на̄ма̄’’ти вачанато катхинуббха̄рато уддхам̣ даса̄хапариха̄рам̣ на лабхатӣти дӣпитам̣ хоти, техи саддхим̣ пуна катхинуббха̄рато уддхам̣ пан̃ча диваса̄ни лабхатӣти пасан̇гопи ‘‘нит̣т̣хитачӣварасмим̣ бхиккхуна̄ уббхатасмим̣ катхине бхиккхуно панева ака̄лачӣварам̣ уппаджджеййа…пе… кхиппамева ка̄ретабба’’нти ака̄лачӣварасса уппаттика̄лам̣ нийаметва̄ вуттатта̄ нива̄рито хоти, тадубхайена катхинаббхантаре уппанначӣварам̣ катхинуббха̄рато уддхам̣ екадивасампи париха̄рам̣ на лабхатӣти сиддхам̣ хоти. евам̣ апаре вадантӣти.

пунапи вуттам̣ – а̄чарийа̄ пана евам̣ вадеййум̣ ‘‘нит̣т̣хитачӣварасмим̣ бхиккхуна̄ уббхатасмим̣ катхине бхиккхуно панева ака̄лачӣварам̣ уппаджджеййа̄’’ти еттха ‘‘нит̣т̣хитачӣварасмим̣ бхиккхуна̄ уббхатасмим̣ катхине’’ти ваданто евам̣ вин̃н̃а̄пети ‘‘еттхантаре тин̣н̣аннампи ака̄лачӣвара̄нам̣ уппатти абха̄ва’’нти. касма̄ пана падабха̄джане виттха̄рита̄нӣти? вуччате – идам̣ сиккха̄падам̣ адхит̣т̣ха̄нам̣ сандха̄йа вуттам̣, кинту пат̣хаме даса̄хам̣ ануджа̄нитва̄ тасмим̣ аппахонте саче пачча̄са̄ аттхи, тамева вад̣д̣хетва̄ ма̄сам̣ ануджа̄нанто имампи аттхависесам̣ дӣпети ака̄лачӣварам̣ на̄ма саммукхӣбхӯтена бха̄джетаббантипи дӣпети. там̣ пана ‘‘а̄кан̇кхама̄нена бхиккхуна̄ пат̣иггахетабба’’нти имина̄ сиккха̄падена вад̣д̣хетва̄ вуттанти, тасма̄ тӣн̣ипи падабха̄джане виттха̄рита̄нӣти.

‘‘кхиппамева ка̄ретаббанти даса̄ха̄ ка̄ретабба’’нти идам̣ пана пахонакабха̄ве пуримасиккха̄падалаккхан̣ена̄ти дӣпетум̣ вуттам̣, тасма̄ ‘‘евам̣ сӣгханти ва̄ лахунти ва̄’’тиа̄дина̄ аватва̄ ‘‘даса̄ха̄’’ти вуттам̣. аттхатакатхинасса евам̣ хоту, анаттхате пана катхине катханти вутте анаттхатасса пат̣иккхепатам̣ дассетӣти вутто апассанто вигха̄там̣ а̄паджджатӣти. екатим̣се арун̣уггамане ниссаггийанти махантенапи пачча̄са̄чӣварена саха гхат̣итампи таббха̄вам̣ анупатитва̄ ниссаггийам̣ хоти сати паччхимаппама̄н̣асамбхаве, асати на хоти, пуна гхат̣ите хоти, ан̃н̃ена гхат̣ите на хоти. чхиннам̣ ан̃н̃аваттху хоти. пуббапариччхедам̣ атиккантам̣ гхат̣итам̣ пуна ан̃н̃апариччхедам̣ лабхатӣти еке, упапариккхитва̄ гахетаббам̣. ан̃н̃атарасмим̣ ган̣т̣хипаде пана ‘‘сан̇гхасса ва̄ идам̣ ака̄лачӣваранти уддисса динна’нти еттха сан̇гхасса динне а̄патти на̄ма наттхи, ‘сотасса рахо’тиа̄дӣсу вийа падуддха̄рена вуттам̣, тасса ла̄бхам̣ сандха̄йа̄ти че? сан̇гхато ва̄ уппаджджеййа̄ти анена сиддхатта̄ адхикамева̄’’ти ча ‘‘сан̇гхо чӣвара̄ни лабхиссати ган̣о ва̄’тиа̄дина̄пи па̄т̣хо аттхӣ’’ти ча вуттам̣. ган̣т̣хипаде косаллаттхам̣ пана майа̄ саббам̣ ликхитам̣, сут̣т̣ху вича̄ретва̄ катхетаббам̣.

татийакатхинасиккха̄падаван̣н̣ана̄ нит̣т̣хита̄.