1.химавантасуттаван̣н̣ана̄

182. буджджхати чатусаччам̣ арийаса̄вако ета̄йа̄ти бодхам̣, дхаммаса̄маггӣ, арийаса̄вако пана чатусаччам̣ буджджхатӣти бодхи. ан̇га̄ти ка̄ран̣а̄. йа̄йа дхаммаса̄маггийа̄ти самбандхо. тан̣ха̄васена патит̣т̣ха̄нам̣, дит̣т̣хивасена а̄йӯхана̄. сассатадит̣т̣хийа̄ патит̣т̣ха̄нам̣, уччхедадит̣т̣хийа̄ а̄йӯхана̄. лӣнавасена патит̣т̣ха̄нам̣, уддхаччавасена а̄йӯхана̄. ка̄масукха̄нуйогавасена патит̣т̣ха̄нам̣, аттакиламатха̄нуйогавасена а̄йӯхана̄. огхатаран̣асуттаван̣н̣ана̄йам̣ (сам̣. ни. 1.1) –

‘‘килесавасена патит̣т̣ха̄нам̣, абхисан̇кха̄равасена а̄йӯхана̄. тан̣ха̄дит̣т̣хӣхи патит̣т̣ха̄нам̣, авасесакилеса̄бхисан̇кха̄рехи а̄йӯхана̄, сабба̄кусала̄бхисан̇кха̄равасена патит̣т̣ха̄нам̣, саббалокийакусала̄бхисан̇кха̄равасена а̄йӯхана̄’’ти –

вуттесу пака̄ресу идха авутта̄нам̣ васена ведитаббо. килесасанта̄нанидда̄йа ут̣т̣хахатӣти етена сикха̄паттавипассана̄сахагата̄нампи сатиа̄дӣнам̣ боджджхан̇габха̄вам̣ дассети. чатта̄рӣтиа̄дина̄ маггапхалена сахагата̄нам̣. саттахи боджджхан̇гехи бха̄витехи саччапат̣иведхо хотӣти катхамидам̣ джа̄нитаббанти чоданам̣ сандха̄йа̄ха ‘‘йатха̄ха̄’’тиа̄ди. джха̄нан̇гамагган̇га̄дайо вийа̄ти етена бодхибоджджхан̇гасадда̄нам̣ самуда̄йа̄вайавависайатам̣ дассети. сенан̇гаратхан̇га̄дайо вийа̄ти етена пуггалапан̃н̃аттийа̄ авиджджама̄напан̃н̃аттибха̄вам̣ дассети.

бодха̄йа сам̣ваттантӣти боджджхан̇га̄ти вуттам̣ ‘‘ка̄ран̣аттхо ан̇гасаддо’’ти. буджджхатӣти бодхи, бодхийа̄ ева ан̇га̄ти боджджхан̇га̄ти вуттам̣ ‘‘буджджхантӣти боджджхан̇га̄’’ти. випассана̄дӣнам̣ ка̄ран̣а̄нам̣ буджджхитабба̄нам̣ сачча̄нам̣ анурӯпам̣ паччаккхабха̄вена пат̣имукхам̣ авипарӣтам̣ самма̄ буджджхантӣти евам̣ ваттхувисесадӣпакехи упаримаггехи анубуджджхантӣтиа̄дина̄ вуттабодхисаддехи ниппадесена вуттам̣ ‘‘буджджханата̄са̄ман̃н̃ена сан̇ган̣ха̄тӣ’’ти. еттха ча лӣнапатит̣т̣ха̄на-ка̄масукхаллика̄нуйога-уччхеда̄бхинивеса̄нам̣ дхаммавичайа-вӣрийапӣтипадха̄на-дхаммаса̄маггӣ пат̣ипаккхо. уддхачча̄йӯханааттакиламатха̄нуйога-сассата̄бхинивеса̄нам̣ пассаддхисама̄дхи-упеккха̄падха̄на-дхаммаса̄маггӣ пат̣ипаккхо. сати пана убхайаттха̄пи иччхитабба̄. татха̄ хи са̄ саббаттхика̄ вутта̄.

сам̣-саддо пасам̣са̄йам̣. пунадева сундаро ча аттхопӣти а̄ха ‘‘пасаттхо сундаро ча боджджхан̇го’’ти. абхиниббаттетӣти абхивисит̣т̣хабха̄вена ниббаттети сависесабха̄вам̣ вадати. ‘‘еке ван̣н̣айантӣ’’ти ватва̄ таттха йатха̄вуттавивекаттайато ан̃н̃ам̣ вивекадвайам̣ уддхаритва̄ дассетум̣ ‘‘те хӣ’’тиа̄ди вуттам̣. таттха джха̄наккхан̣е та̄ва киччато виккхамбханавивеканисситам̣, випассана̄ккхан̣е аджджха̄сайато пат̣иппассаддхививеканисситам̣ бха̄ветӣти. тена̄ха – ‘‘ануттарам̣ вимоккхам̣ упасампаджджа вихарисса̄мӣ’’ти. таттха таттха ниччхайата̄йа касин̣аджджха̄наггахан̣ена ануппа̄да̄нампи гахан̣ам̣ дат̣т̣хаббам̣.

химавантасуттаван̣н̣ана̄ нит̣т̣хита̄.