2. аккосасуттаван̣н̣ана̄

188. бха̄радва̄джова соти бха̄радва̄джо на̄ма ева со бра̄хман̣о. готтавасена хи тайидам̣ на̄мам̣, висесена панетам̣ джа̄танти дассетум̣ ‘‘пан̃чаматтехӣ’’тиа̄ди вуттам̣. джа̄никата̄ти н̃а̄тиваггаха̄никата̄. паккхо бхинноти тато ева н̃а̄типаккхо нат̣т̣хо. йатха̄ доманассито анаттаманоти ваттаббам̣ лабхати, евам̣ купитоти а̄ха ‘‘доманассена ча̄’’ти. дасахӣти анавасесапарийа̄да̄навасена вуттам̣ пан̃чахи га̄тха̄сатехи аккосанто татха̄ аккосеййа̄ти катва̄. таттха пана йена кеначи аккосантопи аккосатийева на̄ма. кароси мама бха̄тикасса паббаджджам̣.

самбхун̃джатӣти самбхогам̣ кароти. аккоса̄дӣхи екато бхун̃джати. вӣтихаратӣти бйатиха̄рам̣ кароти, аккосато паччаккосана̄дина̄ винимайам̣ каротӣти аттхо. тена̄ха ‘‘катасса пат̣ика̄рам̣ каротӣ’’ти. асса ануссававасена сутва̄ ‘‘сапати ма’’нти сан̃н̃ино бхайам̣ уппаджджӣти йоджана̄. асса̄ти бра̄хман̣асса. сутва̄ти падам̣ убхайаттха̄пи йоджетаббам̣ ‘‘тавеветам̣ бра̄хман̣а̄ти сутва̄, ануссававасена сутва̄’’ти ча. ка̄мам̣ кисаваччха̄дайо сапанам̣ на̄дам̣су, девата̄нам̣йева хи со аттхо, сатта̄нам̣ пана татха̄ сан̃н̃а̄ уппанна̄, сопи татха̄сан̃н̃ӣ ахоси. тена̄ха ‘‘ануссававасена̄’’ти.

дантасса саббасо даматхам̣ упагататта̄. ниббисеванасса̄ти ра̄гадоса̄дихетукавиппханданарахитасса. тассева̄ти пат̣икуджджхантассева пуггаласса тена кодхена па̄пам̣ хоти па̄пасса санта̄нантарасан̇кантийа̄ абха̄вато. кечи пана ‘‘тассева̄ти тассева пат̣икуджджхантапурисасса тена пат̣икуджджханена. па̄пийоти пат̣икуджджхантапуггаласса ла̄макатаро’’ти еваметтха аттхам̣ ваданти. сатийа̄ саманна̄гато хутва̄ пат̣исан̇кха̄не т̣хито адхива̄сети, на сахо мӯл̣хо хутва̄ти адхиппа̄йо. убхиннам̣ тикиччхантанти убхиннам̣ уппаннакодхасан̇кха̄там̣ килесабйа̄дхим̣ тикиччхантам̣ вӯпасаментам̣ там̣ пуггалам̣. йо пуггалотиа̄дина̄ пурима̄су га̄тха̄су паваттита̄ни пада̄ни самбандхитва̄ дассети. пан̃часу кхандхесу йа̄тха̄вато винӣта̄ арийадхаммасса ковида̄ на̄ма хонтӣти а̄ха ‘‘дхаммасса̄ти пан̃чаккхандхадхаммасса̄’’ти. ида̄ни таматтхам̣ парипун̣н̣ам̣ катва̄ дассенто а̄ха ‘‘чатусаччадхаммасса ва̄’’ти.

аккосасуттаван̣н̣ана̄ нит̣т̣хита̄.