8. пин̣д̣асуттаван̣н̣ана̄

154. таттха таттха̄ти тасмим̣ тасмим̣ н̃а̄тимиттакуле. па̄хунака̄нӣти пахитаббапан̣н̣а̄ка̄ра̄ни. а̄гантукапан̣н̣а̄ка̄ра̄нӣти а̄гантука̄нам̣ упагата̄нам̣ да̄таббапан̣н̣а̄ка̄ра̄ни. сайам̣чарадивасети кума̄рака̄нан̃ча кума̄рика̄нан̃ча сайам̣ аттана̄ чаритаббачхан̣адивасе. ида̄ни таматтхам̣ виттха̄рато дассенто ‘‘самавайаджа̄тиготта̄’’тиа̄дима̄ха. самавайасамаджа̄тикасамаготта̄ти паччекам̣ сама-саддо йоджетаббо. готтасамата̄ ча а̄ва̄хавива̄хайогйата̄васена дат̣т̣хабба̄, на екаготтата̄васена. тато тато га̄мато. ан̃н̃асмим̣ да̄таббе асати. чхан̣авасена пахин̣итум̣ сампа̄дитам̣ пӯвам̣ чхан̣апӯвам̣. та̄сам̣ сампаттийа̄ти та̄сам̣ да̄нам̣ дхаммассаванан̃ча̄ти тасса̄ дувидха̄йапи сампаттийа̄.

н̃а̄н̣ам̣ на̄ма а̄ваджджанапуббакам̣, тасма̄ аджа̄нанасса ‘‘ана̄ваджджаната̄йа̄’’ти ка̄ран̣ам̣ ватва̄ сесака̄ран̣ам̣ ваданто ‘‘буддха̄на’’нтиа̄дима̄ха. упача̄рабхеданти буддхам̣ дисва̄ мануссехи ка̄таббаупача̄расса бхинданам̣. бхиндитунти видхамитум̣.

бхагава̄ пана̄ти панасаддо висесаттхаджотако. тена на кевалам̣ бхагава̄ уппан̣д̣анам̣ парихаранто там̣ га̄мам̣ на пуна па̄виси, атха кхо ма̄рам̣ анукампантоти идам̣ висесам̣ джотети.

джанесӣти апун̃н̃ам̣ джанеси, джаненто ча йатха̄ тато а̄йатим̣ тхиратарам̣ махантам̣ дуккхам̣ ниппхаджджиссати, евам̣ ниппха̄деси. а̄саджджананти еттха нанти нипа̄таматтам̣. кин̃чати маддати абхибхаватӣти кин̃чананти а̄ха ‘‘маддитум̣ саматтха’’нти.

пин̣д̣асуттаван̣н̣ана̄ нит̣т̣хита̄.