9. кассакасуттаван̣н̣ана̄
155. нибба̄нам̣ ападиситва̄ти нибба̄нам̣ нисса̄йа нибба̄нагун̣е а̄раббха̄ти аттхо. хат̣ахат̣акесоти ито чито ча викин̣н̣атта̄ а̄кула̄кулакесо. чаккхусампхассавин̃н̃а̄н̣а̄йатананти еттха йатха̄ чаккхуггахан̣ена пхассо висесито, тена ева вин̃н̃а̄н̣а̄йатанам̣. татха̄ сати чаккхувин̃н̃а̄н̣асса ча гахан̣ам̣ а̄паджджеййа̄ти. нану четтха чаккхуггахан̣ена висеситатта̄ чаккхудва̄рика̄нам̣ саббесам̣ вин̃н̃а̄н̣а̄нам̣ гахан̣анти? саччаметам̣, тан̃ча кхо пат̣хамена чаккхуггахан̣ена̄ти на̄йам̣ досо. бхаван̇гачиттанти а̄ваджджана̄йа анантарапаччайабхӯтамева адхиппетанти нийаметва̄ дассетум̣ ‘‘са̄ваджджанака’’нти вуттам̣, тасма̄ тада̄рамман̣ампӣти джаваначиттена саха тада̄рамман̣ачиттампи. ‘‘вин̃н̃а̄н̣а̄йатана’’нти ча вутте ниммаламева.
‘‘чаккхӯ’’ти ависесато вуттатта̄ пана ма̄расса айампи аттхо а̄панноти дассетум̣ ‘‘йам̣ локе’’тиа̄ди вуттам̣. упаккавипакканти чаккхупа̄карогена упари хет̣т̣ха̄ ча саббасо паккам̣ кутхитам̣. есева найоти имина̄ йам̣ локе кут̣т̣хакила̄саган̣д̣акаччхуа̄дӣхи упаддутам̣ ван̣апӣл̣ака̄дивасена паггхарантам̣ асучим̣ антамасо парамаджегуччхарӯпампи, саббам̣ там̣ тавева хотӯти евама̄дим̣ ападисати.
йам̣ бхан̣д̣аканти хиран̃н̃асуван̣н̣а̄дикхеттаваттха̄диупакаран̣ам̣ гахат̣т̣ха̄, паббаджита̄ ча йам̣ паттачӣвара̄дим̣ ‘‘мама ида’’нти абхинивисанта̄ва ваданти, етесу париггахаттхесу ча тесам̣ паригга̄хакапуггалесу ча те читтам̣ йади аттхи, та̄ни а̄раббха тава читтам̣ йади бхавати, евам̣ твам̣ таттха баддхо ева хосӣти аттхо. тена̄ха ‘‘на ме саман̣а моккхасӣ’’ти.
йам̣ бхан̣д̣акам̣ вадантӣти йатха̄вуттам̣ упакаран̣ам̣ локе бахуджана̄ ‘‘мама ида’’нти ваданти. на там̣ майханти там̣ майхам̣ на хоти, на таттха мама тан̣ха̄васена маманти наттхи. на те аханти йе пуггала̄ еттха баддха̄, тепи ахам̣ на хоми, таттха ме дит̣т̣хибаддхо наттхи. на ме маггампи даккхасӣти евам̣ саббасо баддха̄бха̄вена муттасса ме гатамаггампи ма̄ра твам̣ на даккхаси на пассиссаси, йе бхава̄дайо туйхам̣ висайа̄, тесу бхавайонигатиа̄дӣсу майхам̣ гатамаггам̣ на пассиссаси бхаваниссат̣т̣хатта̄ти.
кассакасуттаван̣н̣ана̄ нит̣т̣хита̄.