2. пурисасуттаван̣н̣ана̄

113. пуримасуттети пуримасуттадесана̄йам̣. таттха хи упасан̇камантавела̄йа саттху гун̣е аджа̄нанто кевалам̣ саммоданам̣ кароти. десанам̣ сутва̄ пана саттху гун̣е н̃атва̄ саран̣ан̇гататта̄ идха имасмим̣ сама̄гаме абхива̄деси пан̃чапатит̣т̣хитена ванди. атта̄нам̣ адхи аджджхаттам̣, авиджахена атта̄нам̣ адхикичча уддисса паваттадхамма̄ аджджхаттам̣ екаджджхам̣ гахан̣авасена, бхумматтхе четам̣ паччаттавачанам̣. ка̄ман̃ча̄йам̣ аджджхаттасаддо гочараджджхаттависайаджджхаттааджджхаттаджджхаттесу паваттати. те панеттха на йуджджантӣти вуттам̣ ‘‘нийакаджджхатта’’нти, нийакасан̇кха̄тааджджхаттадхаммесӯти аттхо. тена̄ха ‘‘аттано санта̄не’’ти. луббханалаккхан̣оти гиджджханалаккхан̣о, а̄рамман̣е дал̣хаггахан̣асабха̄воти аттхо. дуссаналаккхан̣оти куджджханалаккхан̣о, бйа̄паджджанасабха̄воти аттхо. муйханалаккхан̣оти ан̃н̃а̄н̣алаккхан̣о, а̄рамман̣е сабха̄васаммохабха̄воти аттхо. вихет̣хентӣти аттхана̄санаанаттхуппа̄данехи виба̄дхенти. тато ева йатха̄ саггамаггесу на диссати, евам̣ каронтӣти а̄ха ‘‘на̄сенти вина̄сентӣ’’ти. аттани самбхӯта̄ти санта̄не ниббатта̄.

пурисасуттаван̣н̣ана̄ нит̣т̣хита̄.