6. наджӣратисуттаван̣н̣ана̄

76. на̄маготтанти тиссо кассапо готамоти еварӯпам̣ на̄ман̃ча готтан̃ча. нидассанаматтаметам̣, тасма̄ саббасса пан̃н̃аттийа̄ лаккхан̣авачананти дат̣т̣хаббам̣. на джӣратӣти асабха̄вадхамматта̄ уппа̄давайа̄бха̄вато джарам̣ на па̄пун̣а̄ти. тена̄ха ‘‘джӣран̣асабха̄во на хотӣ’’ти. йасма̄ саман̃н̃а̄бха̄вато ка̄лантарепи там̣ саман̃н̃а̄йатева, тасма̄ ‘‘атӣтабуддха̄нам̣…пе… на джӣратӣти вуччатӣ’’ти а̄ха.

а̄ласийанти аласабха̄во дал̣хакосаджджам̣. тена̄ха ‘‘йена̄’’тиа̄ди. т̣хитинти бйа̄па̄рам̣. нидда̄васена памаджджанам̣ каттаббасса акаран̣ам̣. килесавасена памаджджанам̣ акаттаббасса каран̣ампи. каммасамайети каммам̣ ка̄тум̣ йуттака̄ле. каммакаран̣авӣрийа̄бха̄воти там̣каммакирийасамут̣т̣ха̄пакавӣрийа̄бха̄во. со пана аттхато вӣрийапат̣ипаккхо акусалачиттуппа̄до, на вӣрийасса абха̄ваматтам̣. сӣласан̃н̃ама̄бха̄во дуссӣлйам̣. виссат̣т̣ха̄ча̄рата̄ на̄ма ана̄ча̄ро. соппабахулата̄ти нидда̄лута̄. йато гахан̣ахаттхопи на кила̄супи пурисо нидда̄йа абхибхуййати. тена̄ха ‘‘та̄йа̄’’тиа̄ди. атиччха̄та̄дӣнӣти а̄ди-саддена абхибхуййата̄дим̣ сан̇ган̣ха̄ти. а̄гантука̄ласийам̣ на пуббе вуттаа̄ласйам̣ вийа пакатисиддхам̣. ‘‘те чхидде’’ти па̄л̣ийам̣ лин̇гавипалла̄сена вуттанти а̄ха ‘‘та̄ни чха чхидда̄нӣ’’ти. кусалачиттаппаваттийа̄ анока̄сабха̄вато чхидда̄ни. тена̄ха бхагава̄ – ‘‘йаттха виттам̣ на тит̣т̣хатӣ’’ти. сабба̄ка̄рена лесаматтам̣ асесетва̄ти адхиппа̄йо.

наджӣратисуттаван̣н̣ана̄ нит̣т̣хита̄.