5. бхӣта̄суттаван̣н̣ана̄

75. ким̣ сӯдха бхӣта̄ти еттха су-идха̄ти нипа̄таматтанти а̄ха ‘‘ким̣ бхӣта̄’’ти? магго ча нека̄йатанаппавуттоти анекака̄ран̣ам̣ на̄на̄видха̄дхигамока̄сам̣ катва̄ павутто катхито. тена̄ха ‘‘ат̣т̣хатим̣са̄рамман̣авасена̄’’тиа̄ди. евам̣ сантети евам̣ саббаса̄дха̄ран̣а̄нека̄йатанехи нибба̄нага̄мимаггасса тумхехи паведитатта̄ лаббхама̄не кхеме магге ким̣ бхӣта̄йам̣ джаната̄ уппатхабхӯта̄ випарӣтадит̣т̣хито ган̣хӣти аттхо? евам̣ девата̄ йатхиччха̄йа пуримаддхена аттана̄ йатха̄чинтитаматтхам̣ саттху паведита̄, паччхимаддхена аттано сам̣сайам̣ пуччхати. бахупан̃н̃а̄ти путхупан̃н̃а. уссаннапан̃н̃а̄ти адхикапан̃н̃а̄. т̣хапетва̄ти сам̣йаметва̄. сам̣вибха̄гӣти а̄ха̄рапарибхоге саммадева вибхаджанасӣло. тена̄ха ‘‘аччхара̄йа̄’’тиа̄ди. вуттаттхамева хет̣т̣ха̄.

манена̄ти маногахан̣ена. пуббасуддхиан̇ганти пуббабха̄гасуддхибхӯтам̣ ан̇гам̣. чатӯсӯти вуттаан̇гапарийа̄паннам̣. йан̃н̃аупаккхароти да̄насса са̄дханам̣. етесу дхаммесӯти етесу саддха̄дигун̣есу. йатха̄ хи саддхо паччайам̣ паччупат̣т̣хапетва̄ ваттхупаричча̄гасса висесапаччайо каммапхаласса паралокасса ча паччаккхато вийа паттийа̄йанато, евам̣ мудухадайо. мудухадайо хи анудайам̣ патва̄ йам̣ кин̃чи аттано сантакам̣ паресам̣ дети. йо ча сам̣вибха̄гасӣло, со аппакасмимпи аттано сантаке парехи са̄дха̄ран̣абхогӣ хоти. вадан̃н̃ӯ вада̄нийата̄йа йа̄гинова йуттам̣ йуттака̄лам̣ н̃атва̄ аттхика̄нам̣ маноратхам̣ пӯретӣти вуттам̣ ‘‘ити…пе… чатӯсӯти а̄ха̄’’ти.

ва̄чантиа̄дӣни тӣн̣и ан̇га̄ни тивидхасӣласампаттидӣпанато. сампаннасӣло хи паралокам̣ на бха̄сеййа. саддхо екам̣ ан̇гам̣ пайога̄сайасуддхидӣпанато. суддха̄сайасса самма̄пайоге т̣хитасса катхам̣ паралокато бхайанти. дукавасена чатуран̇гайоджана̄ дуканайо. етесу чатӯсу дхаммесу т̣хитоти етесу йатха̄вуттадукасан̇гахесу чатӯсу гун̣есу патит̣т̣хито.

бхӣта̄суттаван̣н̣ана̄ нит̣т̣хита̄.