2. маччхарисуттаван̣н̣ана̄

32. памаджджана̄ка̄рена паватта̄ анупаладдхи пама̄до. тена екантато сатирахита̄ хонтӣти вуттам̣ ‘‘сативиппава̄салаккхан̣ена̄’’ти. дит̣т̣хивичикиччха̄дайо четтха пама̄денева сан̇гахита̄. ида̄ни йатха̄ маччхарийанимиттан̃ча пама̄данимиттан̃ча да̄нам̣ на дӣйати, там̣ дассетум̣ ‘‘екаччо хӣ’’тиа̄ди вуттам̣. париккхайам̣ гамиссатӣти бхогапариха̄ним̣ гамиссати. кхид̣д̣а̄дӣти а̄ди-саддена ман̣д̣анавибхӯсаначхан̣анаккхаттакиччабйасана̄дим̣ сан̇ган̣ха̄ти. йасада̄йаканти киттийасасса парива̄райасасса ча да̄йакам̣. сирӣда̄йаканти собхаггада̄йакам̣. сампаттида̄йаканти кулабхогарӯпабхогасампада̄хи сампаттида̄йакам̣. пун̃н̃анти ва̄ идха пун̃н̃апхалам̣ дат̣т̣хаббам̣ ‘‘евамидам̣ пун̃н̃ам̣ павад̣д̣хатӣ’’тиа̄дӣсу (дӣ. ни. 3.80) вийа. аттхи да̄насса пхаланти еттха деййадхаммасса анават̣т̣хитатам̣ бахуласа̄дха̄ран̣атам̣, там̣ паха̄йа гаманӣйатам̣, таббисайа̄йа пӣтийа̄ са̄ваджджатам̣, да̄надхаммасса анан̃н̃аса̄дха̄ран̣атам̣ ануга̄микатам̣, таббисайа̄йа пӣтийа̄ анаваджджатам̣, лобха̄дипа̄падхамма̄нам̣ виноданам̣, сесапун̃н̃а̄нам̣ упаниссайан̃ча джа̄нантена̄ти ваттаббам̣.

там̣йева ба̄ланти йо маччхарӣ, тамева. ада̄насӣла̄ ба̄ла̄. екаччо дханасса парибхогапариккхайабхайена аттана̄пи на парибхун̃джати атилобхасет̣т̣хи вийа̄ти а̄ха ‘‘идхалокапаралокесӯ’’ти.

йасма̄ екаччо ада̄насӣло пурисо аддхике дисва̄ пассантопи на пассати, тесам̣ катхам̣ сун̣антопи на сун̣оти, сайам̣ кин̃чи на катхети, ада̄тукамйата̄тхамбхе баддхо хоти, тасма̄ таттха маталин̇га̄ни упалаббхантийева̄ти а̄ха ‘‘ада̄насӣлата̄йа маран̣ена матесӯ’’ти. ат̣т̣хакатха̄йам̣ пана да̄наматтамева гахетва̄ матенасса саматам̣ дассетум̣ ‘‘йатха̄ хӣ’’тиа̄ди вуттам̣. да̄насӣласса пана аматалин̇га̄ни вуттавипарийа̄йато ведитабба̄ни. ваджанти путхутте екавачанам̣, тасма̄ вачанавипалла̄сена вуттанти а̄ха ‘‘саха ваджанта̄’’ти. да̄насӣла̄дидхаммо пура̄тано, на аджджатаноти санантано, со етесу аттхӣти санантана̄, пан̣д̣ита̄, тесам̣ дхамма̄ти тесам̣ васенапи дхаммо санантаноти а̄ха ‘‘санантана̄нам̣ ва̄ пан̣д̣ита̄нам̣ еса дхаммо’’ти. аппасмимпи деййадхамме сати еке да̄нам̣ даданти, еке на даданти маччхарибха̄ва̄. сахассада̄насадиса̄ти ека̄пи даккхин̣а̄ паричча̄гачетана̄йа ул̣а̄рабха̄вато сахассада̄насадиса̄ хоти.

дуранугаманоти асаман̇гина̄ анугантум̣ дуккаро. ананугаманан̃часса дхаммасса апӯран̣амева̄ти а̄ха ‘‘дуппӯро’’ти. ‘‘дхаммам̣ чаре’’ти айам̣ дхаммачарийа̄ гахат̣т̣хасса васена а̄раддха̄ти а̄ха ‘‘дасакусалакаммапатхадхаммам̣ чаратӣ’’ти. тена̄ха ‘‘да̄ран̃ча поса’’нти. самун̃джаканти кассакехи аттана̄ ка̄таббам̣ катва̄ висат̣т̣хадхан̃н̃акаран̣ато кхале ун̃чха̄чарийавасена самун̃джаниа̄дина̄ чхад̣д̣итадхан̃н̃асам̣харан̣ам̣. тена̄ха ‘‘йо апи…пе… самун̃джакам̣ чаратӣ’’ти. етена̄ти сатасахассасахассайа̄гиггахан̣ена дасаннампи бхиккхукот̣ӣнам̣ пин̣д̣апа̄то дассито хоти. ‘‘динно’’ти падам̣ а̄нетва̄ йоджана̄. дасаннам̣ ва̄ каха̄пан̣акот̣ӣнам̣ пин̣д̣апа̄тоти дасаннам̣ каха̄пан̣акот̣ӣнам̣ винийун̃джанавасена сампа̄дитапин̣д̣апа̄то. тайидам̣ сатасахассам̣ сахассайа̄гӣнам̣ да̄нам̣ еттакам̣ хотӣти катва̄ вуттам̣. самун̃джакам̣ чарантопӣти самун̃джакам̣ чаритва̄пи, самун̃джакачаран̣ахетӯти аттхо. сесапададвайепи есева найо. да̄рам̣ посентопи дхаммам̣ чарати, аппакасмим̣ дадантопи дхаммам̣ чаратӣти йоджана̄. татха̄видхасса̄ти та̄дисасса татха̄дхаммача̄рино йа̄ дхаммачарийа̄, тасса̄ калампи наггханти ете сахассайа̄гино аттано сахассайа̄гита̄йа. йам̣ тена далиддена̄тиа̄ди тассеваттхасса виваран̣ам̣. саббесампи тесанти ‘‘сатам̣сахасса̄нам̣ сахассайа̄гина’’нти вутта̄нам̣ тесам̣ саббесампи. итаресанти ‘‘татха̄видхасса̄’’ти вуттапурисато ан̃н̃есам̣. дасакот̣исахассада̄нанти дасакот̣исан̇кха̄там̣ тато анекасахассабхедата̄йа сахассада̄нам̣.

‘‘калам̣ наггхатӣ’’ти идам̣ тесам̣ да̄нато имасса да̄насса ул̣а̄ратарабха̄вена випулатарабха̄вена випулатарапхалата̄йа вуттанти а̄ха ‘‘катхам̣ ну кхо етам̣ махаппхалатаранти джа̄нанаттха’’нти. паччайависесена махаттам̣ гатоти махаггато, ул̣а̄роти аттхо. тена̄ха ‘‘випулассетам̣ вевачана’’нти. самена̄ти н̃а̄йена, дхаммена̄ти аттхо. висамети на саме маччхарийалаккхан̣аппатте. чхетва̄ти пӣл̣етва̄. там̣ пана пӣл̣анам̣ потхананти дассенто ‘‘потхетва̄’’ти а̄ха. ассумукха̄ти тинтаассумукхасаммисса̄ парам̣ рода̄петва̄. маха̄да̄нанти йатха̄вуттам̣ бахудеййадхаммасса париччаджанена махантада̄нам̣. уппаттийа̄ апарисуддхата̄йа̄ти аджджха̄сайасса деййадхаммагавесана̄йа ча суддхата̄йа малӣнатта̄. итарам̣ дхаммачарийа̄йа ниббаттитада̄нам̣. париттада̄нанти париттасса деййадхаммасса васена париттада̄нам̣. аттано уппаттийа̄ парисуддхата̄йа̄ти аджджха̄сайасса деййадхаммагавесана̄йа ча висуддхата̄йа. евантиа̄дима̄ха̄ти ‘‘евам̣ сахасса̄нам̣ сахассайа̄гина’’нти авоча. таттха сахасса̄нанти сатам̣сахасса̄нам̣. га̄тха̄бандхасукхаттхам̣ сатаггахан̣ам̣ на катам̣. сесам̣ вуттанайамева.

маччхарисуттаван̣н̣ана̄ нит̣т̣хита̄.