3. са̄дхусуттаван̣н̣ана̄

33. уда̄нам̣ уда̄несӣти пӣтивегена уггиритаббата̄йа уда̄нам̣ уггири учча̄реси. тайидам̣ йасма̄ пӣтисамут̣т̣ха̄питам̣ вачанам̣, тасма̄ вуттам̣ ‘‘уда̄ха̄рам̣ уда̄харӣ’’ти. йатха̄ пана там̣ вачанам̣ ‘‘уда̄на’’нти вуччати, там̣ дассетум̣ ‘‘йатха̄ хӣ’’тиа̄ди вуттам̣. саддха̄йа̄ти еттха йа-ка̄ро хетуаттхо. паричча̄гачетана̄йа хи саддха̄ висесапаччайо ассаддхасса тадабха̄вато. пи-саддо вуттаттхасампин̣д̣анаттхо. ‘‘са̄хӯ’’ти падам̣ са̄дхусаддена сама̄наттхам̣ дат̣т̣хаббам̣. катханти да̄найуддха̄нам̣ випаккхасабха̄ва̄ти адхиппа̄йо. етам̣ убхайанти да̄нам̣ йуддханти идам̣ двайам̣. джӣвитабхӣрукоти джӣвитавина̄сабхӣруко. кхайабхӣрукоти бхогаккхайасса бхӣруко. вадантоти джӣвите са̄лайатам̣, тато ева йуджджхане асаматтхатам̣ паведенто. чхеджджанти хаттхапа̄да̄дичхедо. уссахантоти вӣрийам̣ каронто. евам̣ бхоге раккхисса̄мӣти татха̄ бхоге апариккхӣн̣е карисса̄мӣти. вадантоти идха бхогесу лобхам̣, тато ева да̄тум̣ асаматтхатам̣ паведенто. еванти евам̣ джӣвитабхоганирапеккхата̄йа да̄нан̃ча йуддхан̃ча самам̣ хоти. саддха̄дисампанноти саддха̄дхаммаджӣвита̄вӣмам̣са̄сӣла̄дигун̣асаманна̄гато. со хи деййаваттхуно париттакатта̄ аппакампи даданто аттано пана читтасампаттийа̄ кхеттасампаттийа̄ ча бахум̣ ул̣а̄рапун̃н̃ам̣ павад̣д̣хенто бахувидхам̣ лобха-доса-исса̄-маччхарийа-дит̣т̣хивичикиччха̄дибхедам̣ таппат̣ипаккхам̣ абхибхавати, тато ева ча там̣ махаппхалам̣ хоти маха̄нисам̣сам̣. ат̣т̣хакатха̄йам̣ пана ‘‘маччхерам̣ маддати’’ччева вуттам̣, тасса пана уджувипаччанӣкабха̄вато.

параттха̄ти паралоке. екаса̄т̣акабра̄хман̣аваттху анвайавасена, ан̇кураваттху бйатирекавасена виттха̄ретаббам̣.

дхаммо ладдхо етена̄ти дхаммаладдхо, пуггало. аггиа̄хитападасса вийа саддасиддхи дат̣т̣хабба̄. ‘‘ут̣т̣ха̄нанти ка̄йикам̣ вӣрийам̣, вӣрийанти четасика’’нти ваданти. ут̣т̣ха̄нанти бхогуппа̄де йуттапайуттата̄. вӣрийанти таджджо усса̄хо. йамасса а̄н̣а̄паваттит̣т̣ха̄нам̣. ветаран̣импи итаре нирайе ча атиккамма. те пана аббуда̄дӣнам̣ васена авӣчим̣ дасадха̄ катва̄ авасесамаха̄нирайе саттапи а̄йуппама̄н̣абхедена тайо тайо катва̄ екатим̣са̄ти ваданти. сан̃джӣва̄динирайасам̣ваттанасса каммасса тиккхамаджджхамудубха̄вена тасса а̄йуппама̄н̣асса тивидхата̄ вибха̄ветабба̄. апаре пана ‘‘ат̣т̣ха маха̄нирайа̄ сол̣аса уссаданирайа̄ а̄дито чатта̄ро ситанирайе екам̣ катва̄ сатта ситанирайа̄ти евам̣ екатим̣са маха̄нирайа̄’’ти ваданти. маха̄нирайаггахан̣ато а̄дито чатта̄ро ситанирайа̄ еко нирайо катоти.

тесанти вичинитва̄ гахитапаччайа̄нам̣. пан̃чанавутипа̄сан̣д̣абхеда̄ папан̃часӯданисам̣ван̣н̣ана̄йам̣ вуттанайена ведитабба̄. таттха̄ти тесу двӣсу вичинанесу. даккхин̣а̄вичинанам̣ а̄ха, упама̄на̄ни хи на̄ма йа̄вадева упамеййаттхавибха̄ванаттха̄ни. етена сукхеттагахан̣атопи даккхин̣еййавичинанам̣ дат̣т̣хаббам̣.

па̄н̣есу сам̣йамоти имина̄ дасавидхампи кусалакаммапатхадхаммам̣ дассети. йатха̄ хи ‘‘па̄н̣есу сам̣йамо’’ти имина̄ сатта̄нам̣ джӣвита̄воропанато сам̣йамо вутто, евам̣ тесам̣ са̄патеййа̄ваха̄рато парада̄ра̄масанато висам̣ва̄данато ан̃н̃аман̃н̃абхеданато пхарусавачанена сан̇гхат̣т̣анато нираттхакавиппалапанато парасантака̄бхиджджха̄нато уччхедачинтанато миччха̄бхинивесанато ча сам̣йамо хотӣти. тена̄ха ‘‘сӣла̄нисам̣сам̣ катхетума̄раддха̄’’ти. пхарусавачанасам̣йамо панеттха сарӯпенева вутто.

парасса упава̄дабхайена̄ти па̄пакирийахету парена аттано ваттаббаупава̄дабхайена. упава̄дабхайа̄ти упава̄дабхайанимиттам̣. ‘‘катхам̣ ну кхо амхе паре на упавадеййу’’нти а̄сӣсанта̄ па̄пам̣ на каронти. дхаммападамева̄ти асан̇кхатадхаммакот̣т̣ха̄со ева сеййо сет̣т̣хо. йасма̄ саббасан̇кхатам̣ аниччам̣ кхайадхаммам̣ вайадхаммам̣ вира̄гадхаммам̣ ниродхадхаммам̣, тасма̄ тададхигама̄йа усса̄хо каран̣ӣйоти дассети. пуббасаддо ка̄лависесависайоти а̄ха ‘‘пуббе ча кассапабуддха̄дика̄лепӣ’’тиа̄ди. пуна ака̄лависесо апа̄т̣ийекко бхумматтхависайова̄ти а̄ха ‘‘саббепи ва̄’’тиа̄ди. таттха саббепи ва̄ти ете саббепи кассапабуддха̄дайо локана̄тха̄ санто на̄ма вӯпасантасаббакилесасанта̄па̄ сантасаббхӯтагун̣атта̄.

са̄дхусуттаван̣н̣ана̄ нит̣т̣хита̄.