9. чатучаккасуттаван̣н̣ана̄

29. ирийа̄ вуччати ка̄йена каттаббакирийа̄, тасса̄ паваттит̣т̣ха̄набха̄вато ирийа̄патхо, гамана̄ди. там̣ апара̄параппаваттийа̄ чаккам̣. тена̄ха ‘‘чатучакканти чатуирийа̄патха’’нти. навадва̄ранти караджака̄йо адхиппето. со ча кеса̄диасучипарипӯроти а̄ха ‘‘пун̣н̣анти асучипӯра’’нти. тан̣ха̄йа сам̣йуттанти тан̣ха̄сахитам̣. тена на кевалам̣ сабха̄вато ева, атха кхо нисситадхаммо ча асучим̣ дассети. ма̄тукуччхисан̇кха̄те асучипан̇ке джа̄татта̄ пан̇каджа̄там̣, кеса̄диасучипан̇каджа̄татта̄ ча пан̇каджа̄там̣. йа̄тра̄ти апагамо. тена сабха̄вато нисситадхаммато ча асучисабха̄вато ка̄йато катхам̣ апагамо сийа̄ти пуччхати. тена̄ха ‘‘етасса̄’’тиа̄ди.

наханат̣т̣хена бандханат̣т̣хена наддхӣти упана̄хо идха̄дхиппетоти а̄ха ‘‘наддхинти упана̄ха’’нти. со пана ито пуббака̄ле кодхоти а̄ха ‘‘пуббака̄ле’’тиа̄ди. па̄л̣иниддит̣т̣хети упана̄хаичча̄дике идха па̄л̣ийам̣ ниддит̣т̣хе килесе т̣хапетва̄ авасеса̄ дит̣т̣хивичикиччха̄дайо сатта килеса̄ думмочайата̄йа варатта̄ вийа̄ти варатта̄ти ведитабба̄. а̄рамман̣аггахан̣асабха̄вато еко евеса дхаммо, паватти-а̄ка̄рабхедена пана иччханат̣т̣хена паттханат̣т̣хена иччха̄, луббханат̣т̣хена гиджджханат̣т̣хена лобхоти вутто. пат̣хамуппаттика̄ти екасмим̣ а̄рамман̣е, ва̄ре ва̄ пат̣хамам̣ уппанна̄. апара̄паруппаттикоти пунаппунам̣ уппаджджама̄нако. аладдхапаттхана̄ аппат̣иладдхаваттхумхи а̄сатти лобхо. уппа̄т̣етва̄ти сасанта̄нато уддхаритва̄.

чатучаккасуттаван̣н̣ана̄ нит̣т̣хита̄.