10. ен̣иджан̇гхасуттаван̣н̣ана̄

30. ен̣имигасса вийа̄ти ен̣имигасса джан̇гха̄ вийа. авайавӣсамбандхе хи идам̣ са̄мивачанам̣. пин̣д̣имам̣сасса парито самасан̣т̣хитатта̄ суват̣т̣ӣтаджан̇гхо. кисанти тхӯлабха̄вапат̣иккхепапара̄джотана̄, на сут̣т̣ху кисабха̄вадӣпанапара̄ти а̄ха ‘‘атхӯлам̣ самасарӣра’’нти. а̄тапена мила̄танти тапаса̄ мила̄така̄йам̣ индрийасанта̄панабха̄вато. тенева̄ха – ‘‘тапо мила̄та’’нтиа̄ди, татха̄ ча̄ха па̄л̣ийам̣ ‘‘аппа̄ха̄рам̣ алолупа’’нти. йатха̄ ‘‘вӣрасса бха̄во вӣрийа’’нти вӣрабха̄вена вӣрийам̣ лаккхӣйати, евам̣ вӣрийасамбхавена вӣрабха̄воти а̄ха ‘‘вӣранти вӣрийаванта’’нти. ‘‘чатта̄ро пан̃ча а̄лопе, абхутва̄ удакам̣ пиве’’ти (тхерага̄. 983; ми. па. 6.5.10) дхаммасена̄пативуттанийа̄мена паримитабходжита̄йа аппа̄ха̄рата̄ бходжане маттан̃н̃ута̄. ‘‘мита̄ха̄ра’’нти ватва̄ пуна париччхиннака̄лабходжита̄йапи аппа̄ха̄ратам̣ дассенто ‘‘вика̄ла…пе… паритта̄ха̄ра’’нти а̄ха. чатӯсу паччайесу лолуппавирахитам̣ бодхимӯле ева саббасо лолуппасса пахӣнатта̄. ‘‘чатӯсу паччайесӯ’’ти хи имина̄ва саббаттха лолуппавигамо дӣпитова̄ти. расатан̣ха̄пат̣иккхепо ва̄ еса ‘‘аппа̄ха̄ра’’нти ватва̄ ‘‘алолупа’’нти вуттатта̄. ‘‘сӣхам̣ ва̄’’ти еттха екачарасаддо вийа ива-саддо аттхато ‘‘на̄га’’нти еттха̄пи а̄нетва̄, самбандхитабботи а̄ха – ‘‘екачарам̣ сӣхам̣ вийа, екачарам̣ на̄гам̣ вийа̄’’ти. екачара̄ аппаматта̄ екӣката̄йа.

пан̃чака̄магун̣авасена рӯпам̣ гахитам̣ тесам̣ рӯпасабха̄ватта̄. манена на̄мам̣ гахитам̣ манасса на̄масабха̄ватта̄. авинибхуттадхаммети авина̄бха̄вадхамме гахетва̄. а̄ди-саддена а̄йатанадха̄туа̄дайо гахита̄. ка̄магун̣аггахан̣ена хеттха рӯпабха̄васа̄ман̃н̃ена пан̃ча ваттхӯни гахита̄нева хонти, маногахан̣ена дхамма̄йатанам̣, евам̣ два̄даса̄йатана̄ни гахита̄ни хонти. имина̄ найена дха̄туа̄дӣнампи гахитата̄ йоджетабба̄. тена̄ха ‘‘пан̃чаккхандха̄дивасенапеттха бхуммам̣ йоджетабба’’нти. еттха̄ти па̄л̣ийам̣. ка̄маваттху бхуммам̣.

ен̣иджан̇гхасуттаван̣н̣ана̄ нит̣т̣хита̄.

саттиваггаван̣н̣ана̄ нит̣т̣хита̄.