6. паджджотасуттаван̣н̣ана̄

26. дива̄раттинти на а̄диччо вийа дива̄ ева, на чандима̄ вийа раттим̣ ева, атха кхо дива̄ ча раттин̃ча. таттха таттха̄ти йаттха йаттха сампаджджалито, таттха таттхева падесе, на а̄диччо вийа чандима̄ вийа сакалам̣ маха̄дисам̣ дисантара̄л̣ан̃ча. н̃а̄н̣а̄нубха̄вена уппанна̄локо н̃а̄н̣а̄локоти ваданти. ‘‘идам̣ дуккхам̣ арийасаччанти пуббе ме, бхиккхаве, анануссутесу дхаммесу чаккхум̣ удапа̄ди н̃а̄н̣ам̣ удапа̄ди пан̃н̃а̄ удапа̄ди виджджа̄ удапа̄ди а̄локо удапа̄дӣ’’ти (сам̣. ни. 5.1081; маха̄ва. 15; пат̣и. ма. 2.30) пана вачанато магго н̃а̄н̣а̄локо. ‘‘тамо вихато, а̄локо уппанно’’ти (ма. ни. 1.386; па̄ра̄. 12) ва̄ вачанато виджджаттайа̄локо н̃а̄н̣а̄локо. пат̣хама̄бхисамбодхийам̣ вийа сан̃джа̄тапӣтивиппха̄ро, висесато ратанагхаре самантапат̣т̣ха̄навичинане сан̃джа̄тапӣтивасена уппаннасарӣробха̄со ва̄ пӣтиа̄локо. таттхева уппаннапаса̄давасена сан̃джа̄таа̄локова паса̄да̄локо. дхаммачаккапаваттане ‘‘ан̃н̃а̄си вата, бхо, кон̣д̣ан̃н̃о’’ти уппаннапаса̄да̄локоти ча ваданти. саббаттхева саттху дхаммадесана̄ сатта̄нам̣ хадайатамам̣ видхамантӣ дхаммакатха̄а̄локо. саббопи буддха̄нам̣ па̄тубха̄ва̄ уппанно а̄локоти имина̄ са̄вака̄нам̣ десана̄йа сан̃джа̄тадхамма̄локопи буддха̄нубха̄воти дассети.

паджджотасуттаван̣н̣ана̄ нит̣т̣хита̄.