4. а̄мисасиккха̄падаван̣н̣ана̄

тан̣ха̄дит̣т̣хӣхи а̄маситаббато а̄мисам̣, чӣвара̄ди, а̄мисамева хету а̄мисахету. тена̄ха ‘‘чӣвара̄дӣнам̣ ан̃н̃атарахетӯ’’ти. а̄дисаддена пин̣д̣апа̄тасена̄санагила̄напаччайасакка̄рагарука̄рама̄нанаванданапӯджана̄нам̣ гахан̣ам̣. аван̣н̣ака̄мата̄йа̄ти айасака̄мата̄йева.

дхаммакамметиа̄дӣсу бхиккхунова̄дасаммутикаммам̣ ‘‘камма’’нти ведитаббам̣. таттха тикапа̄читтийанти дхаммакамме дхаммакаммасан̃н̃ивематикаадхаммакаммасан̃н̃ӣнам̣ васена тӣн̣и па̄читтийа̄ни. татхева адхаммакамме тикадуккат̣ам̣ ведитаббам̣. асамматанти самматена ва̄ сан̇гхена ва̄ бха̄рам̣ катва̄ т̣хапитам̣ упасампаннам̣. нану ова̄дасаммути упасампаннассева дӣйати, на са̄ман̣ерасса̄ти а̄ха ‘‘таттха̄’’тиа̄ди. самматена ва̄ сан̇гхена ва̄ т̣хапито пана бахуссуто са̄ман̣еро ‘‘асаммато’’ти ведитаббо. пакатийа̄ чӣвара̄дихету овадантам̣ пана евам̣ бхан̣антасса̄ти пакатийа̄ чӣвара̄дихету овадантам̣ ‘‘еса чӣвара̄дихету овадатӣ’’ти сан̃н̃а̄йа евам̣ бхан̣антасса. ‘‘на чӣвара̄дихету овадатӣ’’ти сан̃н̃а̄йа пана евам̣ бхан̣антасса дуккат̣ам̣. ана̄мисантарата̄ти а̄мисачитта̄бха̄во, ‘‘а̄мисахету овадисса̄мӣ’’ти евам̣ паваттааджджха̄сайа̄бха̄воти аттхо. читтапарийа̄йо хеттха антарасаддо ‘‘йассантарато на санти копа̄’’тиа̄дӣсу (уда̄. 20) вийа.

а̄мисасиккха̄падаван̣н̣ана̄ нит̣т̣хита̄.