1. ова̄дасиккха̄падаван̣н̣ана̄

ат̣т̣хан̇гасаманна̄гатасса̄ти ‘‘сӣлава̄ хотӣ’’тиа̄дӣхи (па̄чи. 147) ат̣т̣хахи ан̇гехи саманна̄гатасса. анун̃н̃а̄та̄ти имасса сиккха̄падасса нида̄не анун̃н̃а̄та̄. ‘‘вассасатӯпасампанна̄йа̄’’тиа̄ди ваккхама̄наат̣т̣хагарудхаммадассанам̣. таттха са̄мӣчикамманти маггасампада̄набӣджанапа̄нӣйа̄пуччхана̄дикам̣ ануччхавикам̣ ваттам̣. а̄дисаддена –

‘‘на бхиккхунийа̄ абхиккхуке а̄ва̄се вассам̣ васитаббам̣, анваддхама̄сам̣ бхиккхунийа̄ бхиккхусан̇гхато две дхамма̄ пачча̄сӣситабба̄ упосатхапуччхакан̃ча ова̄дӯпасан̇каманан̃ча, вассам̣вут̣т̣ха̄йа бхиккхунийа̄ убхатосан̇гхе тӣхи т̣ха̄нехи пава̄ретаббам̣ дит̣т̣хена ва̄ сутена ва̄ парисан̇ка̄йа ва̄, гарудхаммам̣ аджджха̄панна̄йа бхиккхунийа̄ убхатосан̇гхе паккхама̄наттам̣ чаритаббам̣, две васса̄ни чхасу дхаммесу сиккхитасиккха̄йа сиккхама̄на̄йа убхатосан̇гхе упасампада̄ парийеситабба̄, на бхиккхунийа̄ кеначи парийа̄йена бхиккху аккоситаббо парибха̄ситаббо, аджджатагге оват̣о бхиккхунӣнам̣ бхиккхӯсу вачанапатхо, ановат̣о бхиккхӯнам̣ бхиккхунӣсу вачанапатхо’’ти (чӯл̣ава. 403; а. ни. 8.51) –

име сатта дхамме сан̇ган̣ха̄ти. гарудхаммети гаруке дхамме. те хи га̄равам̣ катва̄ бхиккхунӣхи сампат̣иччхитаббатта̄ ‘‘гарудхамма̄’’ти вуччанти.

ан̃н̃ена ва̄ дхаммена̄ти т̣хапетва̄ ат̣т̣ха гарудхамме ан̃н̃ена йена кеначи дхаммена. бхиккхунӣсу упасампаннаматтам̣ ва̄ овадатоти бхиккхунӣсу упасампаннаматтам̣ гарудхаммена овадато ва̄. бхиккхӯнам̣ сантике упасампанна̄йа йатха̄ваттхукамева. ‘‘адхаммакамме’’тиа̄дӣсу бхиккхунова̄дасаммутикаммам̣ ‘‘камма’’нти ведитаббанти а̄ха ‘‘самматасса̄пӣ’’тиа̄ди. вагге бхиккхунисан̇гхе овадато тикапа̄читтийанти вагге бхиккхунисан̇гхе овадато ваггасан̃н̃ивематикасамаггасан̃н̃ӣнам̣ васена тӣн̣и па̄читтийа̄ни. татха̄ вематикасса ча̄ти адхаммакамме вематикасса ча вагге бхиккхунисан̇гхе овадато тикапа̄читтийанти аттхо. еса найо дхаммакаммасан̃н̃ино ча̄ти еттха̄пи. йатха̄ ча вагге бхиккхунисан̇гхе овадато нава па̄читтийа̄ни, евам̣ адхаммакамме адхаммакаммасан̃н̃ино самагге бхиккхунисан̇гхе овадато тасмим̣ сан̇гхе ваггасан̃н̃ивематикасамаггасан̃н̃ӣнам̣ васена тикапа̄читтийам̣, татха̄ вематикасса ча дхаммакаммасан̃н̃ино ча̄ти нава па̄читтийа̄ни. тена̄ха ‘‘самаггепи бхиккхунисан̇гхе нава̄’’тиа̄ди. дхаммакамме пана адхаммакаммасан̃н̃ино ваггам̣ бхиккхунисан̇гхам̣ овадато тикадуккат̣ам̣, татха̄ вематикасса, дхаммакаммасан̃н̃ино ча̄ти нава дуккат̣а̄ни. самаггам̣ пана бхиккхунисан̇гхам̣ овадато ат̣т̣ха̄ти саттараса дуккат̣а̄ни. тена̄ха ‘‘саче пана̄’’тиа̄ди. ан̃н̃ам̣ дхамманти ан̃н̃ам̣ суттантам̣ ва̄ абхидхаммам̣ ва̄. ‘‘самагга̄мха̄ййа̄’’ти вачанена хи ова̄дам̣ пачча̄сӣсанти. тасма̄ т̣хапетва̄ ова̄дам̣ ан̃н̃ам̣ дхаммам̣ бхан̣антасса дуккат̣ам̣. ова̄дан̃ча аниййа̄тетва̄ти ‘‘есо бхагини ова̄до’’ти аватва̄. парипуччхам̣ детӣти тасса̄йева пагун̣а̄йа гарудхаммапа̄л̣ийа̄ аттхам̣ бхан̣ати. оса̄рехӣти учча̄рехи, катхехӣти аттхо. оса̄ретӣти ат̣т̣хагарудхаммапа̄л̣им̣ вадати. пан̃хам̣ пут̣т̣хоти гарудхамманисситам̣ ва̄ кхандха̄динисситам̣ ва̄ пан̃хам̣ бхиккхунийа̄ пут̣т̣хо.

ова̄дасиккха̄падаван̣н̣ана̄ нит̣т̣хита̄.