1. муса̄ва̄дасиккха̄падаван̣н̣ана̄

сампаджа̄намуса̄ва̄дети еттха муса̄ти абхӯтам̣ атаччхам̣ ваттху, ва̄доти тасса бхӯтато таччхато вин̃н̃а̄панам̣, сампаджа̄насса муса̄ва̄до сампаджа̄намуса̄ва̄до, тасмим̣ сампаджа̄намуса̄ва̄дети аттхо. тена̄ха ‘‘пуббе’’тиа̄ди. со ча пана муса̄ва̄до пуббабха̄гаккхан̣е, тан̇кхан̣е ча виджа̄нантасса хоти ‘‘пуббевасса хоти ‘муса̄ бхан̣исса’нти, бхан̣антасса хоти ‘муса̄ бхан̣а̄мӣ’’’ти (па̄чи. 4) вуттатта̄ти а̄ха ‘‘пуббепи джа̄нитва̄ вачанаккхан̣епи джа̄нантасса̄’’ти. етан̃хи двайам̣ ан̇габхӯтам̣, итарам̣ пана хоту ва̄, ма̄ ва̄, ака̄ран̣аметам̣. нану четам̣ бхан̣анамева н̃а̄йатӣти а̄ха ‘‘бхан̣анан̃ча на̄ма̄’’тиа̄ди. абхӯтасса̄ти атаччхасса.

хаттхакам̣ сакйапуттанти еттха хаттхакоти тасса тхерасса на̄мам̣. сакйа̄нам̣ путтоти сакйапутто. буддхака̄ле кира сакйакулато асӣти пурисасахасса̄ни паббаджим̣су, тесам̣ со ан̃н̃атаро. аваджа̄нитва̄ пат̣иджа̄нана̄диваттхусминти еттха аваджа̄нитва̄ пат̣иджа̄нанам̣ на̄ма титтхийехи саддхим̣ катхенто аттано ва̄де кан̃чи досам̣ саллаккхенто ‘‘на̄йам̣ мама ва̄до’’ти аваджа̄нитва̄ пуна катхенто катхенто ниддосатам̣ саллаккхетва̄ ‘‘мамева айам̣ ва̄до’’ти пат̣иджа̄на̄ти. а̄дисаддена пат̣иджа̄нитва̄ аваджа̄нанам̣, ан̃н̃енан̃н̃ам̣ пат̣ичаран̣ам̣, сампаджа̄намуса̄бха̄санам̣, сан̇кетам̣ катва̄ висам̣ва̄дакаран̣ан̃ча сан̇ган̣ха̄ти. ида̄ни а̄паттибхедадассанаттхам̣ ‘‘уттаримануссадхамма̄рочанаттха’’нтиа̄ди вуттам̣.

анупадха̄ретва̄ сахаса̄ бхан̣антасса̄ти авӣмам̣ситва̄ вегена дит̣т̣хампи ‘‘адит̣т̣хам̣ ме’’тиа̄дина̄ бхан̣антасса. ‘‘ан̃н̃ам̣ бхан̣исса̄мӣ’’ти ан̃н̃ам̣ бхан̣антасса̄ти йо мандатта̄ момӯхатта̄ паккхаланто ‘‘чӣвара’’нти ваттаббе ‘‘чӣра’’нтиа̄дӣни бхан̣ати, айам̣ ‘‘ан̃н̃ам̣ бхан̣исса̄мӣ’’ти ан̃н̃ам̣ бхан̣ати на̄ма. йо пана са̄ман̣ерена ‘‘апи, бханте, майхам̣ упаджджха̄йам̣ пасситтха̄’’ти вутто кел̣им̣ курума̄но ‘‘тава упаджджха̄йо да̄русакат̣ам̣ йоджетва̄ гато бхависсатӣ’’ти ва̄ син̇га̄ласаддам̣ сутва̄ ‘‘касса̄йам̣ саддо’’ти вутто ‘‘ма̄туйа̄ те йа̄нена гаччхантийа̄ каддаме лаггачаккам̣ уддхаранта̄нам̣ айам̣ саддо’’ти ва̄ евам̣ нева дава̄, на рава̄ ан̃н̃ам̣ бхан̣ати, со а̄паттим̣ а̄паджджатийева. ан̃н̃а̄ пӯран̣акатха̄ на̄ма хоти – еко га̄ме тхокам̣ телам̣ лабхитва̄ виха̄рам̣ а̄гато са̄ман̣ерам̣ бхан̣ати ‘‘твам̣ аджджа кухим̣ гато, га̄мо екатело ахосӣ’’ти ва̄, паччхика̄йа т̣хапитам̣ пӯвакхан̣д̣ам̣ лабхитва̄ ‘‘аджджа га̄ме паччхика̄хи пӯве ча̄ресу’’нти ва̄, айам̣ муса̄ва̄дова хоти. висам̣ва̄данапуреккха̄рата̄ти висам̣ ва̄денти етена̄ти висам̣ва̄данам̣, ван̃чана̄дхиппа̄йавасаппаваттам̣ читтам̣, тасса пуреккха̄рата̄ висам̣ва̄данапуреккха̄рата̄, висам̣ва̄даначиттасса пурато каран̣анти аттхо.

муса̄ва̄дасиккха̄падаван̣н̣ана̄ нит̣т̣хита̄.