6. суттавин̃н̃аттисиккха̄падаван̣н̣ана̄

чхаббидхам̣ кхомасутта̄динти ‘‘суттам̣ на̄ма чха сутта̄ни кхомам̣ каппа̄сикам̣ косеййам̣ камбалам̣ са̄н̣ам̣ бхан̇га’’нти (па̄ра̄. 638) евам̣ вуттам̣ чхаббидхам̣ кхомасутта̄дим̣. таттха кхоманти (па̄ра̄. ат̣т̣ха. 2.636-38) кхомава̄кехи катасуттам̣. каппа̄сиканти каппа̄сато ниббаттам̣. косеййанти косийам̣сӯхи кантитва̄ катасуттам̣. камбаланти ел̣акаломасуттам̣. са̄н̣анти са̄н̣ава̄кена катасуттам̣. бхан̇ганти па̄т̣еккам̣ ва̄касуттамева̄ти еке. пан̃чахипи миссетва̄ катасуттам̣ пана ‘‘бхан̇га’’нти ведитаббам̣. тесам̣ ануломанти тесам̣ кхома̄дӣнам̣ ануломам̣ дукӯлам̣ паттун̣н̣ам̣ сома̄рапат̣т̣ам̣ чӣнапат̣т̣ам̣ иддхиджам̣ девадиннанти чхаббидхам̣ суттам̣.

турӣти ва̄йанӯпакаран̣о еко дан̣д̣о, вӣтавӣтат̣т̣ха̄нам̣ йаттха сам̣харитва̄ т̣хапенти. веманти ва̄йанӯпакаран̣о еко дан̣д̣о, суттам̣ павесетва̄ йена а̄кот̣енто гханабха̄вам̣ сампа̄денти. тасса саббаппайогесу дуккат̣анти тантава̄йасса йе те туривемасаджджана̄дика̄ пайога̄, тесу саббесу пайогесу бхиккхусса дуккат̣ам̣, тасса тантава̄йасса пайоге пайоге бхиккхусса дуккат̣анти вуттам̣ хоти. туриа̄дӣнам̣ абха̄ве тесам̣ каран̣аттхам̣ ва̄сипхарасуа̄дӣнам̣ маггананиса̄наруккхаччхедана̄дисаббаппайогепи есева найо. тантӯнам̣ аттано сантакатта̄ вӣтавӣтат̣т̣ха̄нам̣ пат̣иладдхамева хотӣти а̄ха ‘‘пат̣ила̄бхена ниссаггийам̣ хотӣ’’ти, викаппанупагапаччхимачӣвараппама̄н̣е вӣте ниссаггийам̣ хотӣти вуттам̣ хоти. тенева ваккхати ‘‘дӣгхато видаттхиматте, тирийан̃ча хаттхаматте вӣте ниссаггийам̣ па̄читтийа’’нти. еттха ча ‘‘идам̣ ме, бханте, чӣварам̣ са̄мам̣ суттам̣ вин̃н̃а̄петва̄ тантава̄йехи ва̄йа̄питам̣ ниссаггийа’’нти имина̄ найена ниссаджджанавидха̄нам̣ ведитаббам̣.

тенева̄ти вин̃н̃а̄питатантава̄йенева. евам̣ идха дуккат̣анти идха̄пи тантава̄йенева дӣгхато видаттхиматте, тирийам̣ хаттхаматте вӣте дуккат̣анти аттхо. акаппийасуттамайети вин̃н̃а̄питасуттамайе. итарасминти авин̃н̃аттисуттамайе париччхеде. тато че ӯнатара̄ти вуттаппама̄н̣ато че ӯнатара̄, антамасо (па̄ра̄. ат̣т̣ха. 2.636-638) аччхиман̣д̣алаппама̄н̣а̄пӣти адхиппа̄йо. каппийатантава̄йенапи акаппийасуттам̣ ва̄йа̄пентасса йатха̄ пуббе ниссаггийам̣, евамидха дуккат̣ам̣. тенева каппийан̃ча акаппийан̃ча суттам̣ ва̄йа̄пентасса саче паччхимачӣвараппама̄н̣а̄ ва̄ ӯнака̄ ва̄ акаппийасуттапариччхеда̄ хонти, тесу париччхедаган̣ана̄йа дуккат̣ам̣. каппийасуттапариччхедесу ана̄патти. атха екантарикена ва̄ суттена, дӣгхато ва̄ каппийам̣ тирийам̣ акаппийам̣ катва̄ вӣтам̣ хоти, пама̄н̣айутте париччхеде париччхеде дуккат̣ам̣.

йади пана (па̄ра̄. ат̣т̣ха. 2.636-638) две тантава̄йа̄ хонти еко каппийо еко акаппийо, суттан̃ча акаппийам̣, те че ва̄рена винанти, акаппийатантава̄йена вӣте пама̄н̣айутте париччхеде париччхеде па̄читтийам̣, ӯнатаре дуккат̣ам̣. итарена вӣте убхайаттха дуккат̣ам̣. саче двепи вемам̣ гахетва̄ екато винанти, пама̄н̣айутте париччхеде париччхеде па̄читтийам̣. атха суттам̣ каппийам̣, чӣваран̃ча кеда̄рабаддха̄дӣхи сапариччхедам̣, акаппийатантава̄йена вӣте париччхеде париччхеде дуккат̣ам̣, итарена вӣте ана̄патти. саче двепи екато винанти, пама̄н̣айутте париччхеде париччхеде дуккат̣ам̣. атха суттампи каппийан̃ча акаппийан̃ча, те че ва̄рена винанти, акаппийатантава̄йена акаппийасуттамайесу паччхимачӣвараппама̄н̣есу париччхедесу вӣтесу париччхедаган̣ана̄йа па̄читтийам̣, ӯнатаресу каппийасуттамайесу ча дуккат̣ам̣. каппийатантава̄йена акаппийасуттамайесу пама̄н̣айуттесу ва̄ ӯнакесу ва̄ дуккат̣амева, каппийасуттамайесу ана̄патти.

атха екантарикена ва̄ суттена, дӣгхато ва̄ акаппийам̣ тирийам̣ акаппийам̣ катва̄ винанти, убхопи ва̄ те вемам̣ гахетва̄ екато винанти, апариччхеде чӣваре пама̄н̣айутте париччхеде париччхеде дуккат̣ам̣, сапариччхеде париччхедавасена дуккат̣а̄ни. тена̄ха ‘‘етенева упа̄йена̄’’тиа̄ди.

еттха ча тантава̄йо та̄ва ан̃н̃а̄такааппава̄ритато вин̃н̃аттийа̄ ладдхо акаппийо, сесо каппийо. суттампи са̄мам̣ вин̃н̃а̄питам̣ акаппийам̣, сесам̣, н̃а̄така̄дивасена уппаннан̃ча каппийанти ведитаббам̣. тикапа̄читтийанти ва̄йа̄пите ва̄йа̄питасан̃н̃ивематикаава̄йа̄питасан̃н̃ӣнам̣ васена тӣн̣и па̄читтийа̄ни. чӣвараттха̄йа вин̃н̃а̄питасуттанти са̄мам̣ ва̄ ан̃н̃ена ва̄ чӣвараттха̄йа вин̃н̃а̄питасуттам̣. кин̃ча̄пи па̄л̣ийам̣ ‘‘са̄мам̣ суттам̣ вин̃н̃а̄петва̄’’ти вуттам̣, татха̄пи идха ‘‘чӣвараттха̄йа са̄мам̣ вин̃н̃а̄питасутта’’нти аватва̄ кевалам̣ ‘‘чӣвараттха̄йа вин̃н̃а̄питасутта’’нти ан̇гесу вуттатта̄ ан̃н̃ена чӣвараттха̄йа вин̃н̃а̄питасуттампи сан̇гахам̣ гаччхатӣти ведитаббам̣. акаппийавин̃н̃аттийа̄ти ‘‘чӣварам̣ ме, а̄вусо, ва̄йатха̄’’ти евам̣бхӯта̄йа акаппийавин̃н̃аттийа̄.

суттавин̃н̃аттисиккха̄падаван̣н̣ана̄ нит̣т̣хита̄.