7. татуттарисиккха̄падаван̣н̣ана̄

там̣-саддо четтха пакататтхавачано. чети нипа̄таматтам̣. чети ва̄ йадӣти аттхо, тасса ‘‘пава̄реййа̄’’ти имина̄ самбандхо ведитаббо. пава̄реййа чети йади пава̄реййа̄ти аттхо. ‘‘абхӣти упасагго’’ти (са̄раттха. т̣ӣ. 2.523-524) имина̄ тасса аттхависеса̄бха̄вам̣ дассети. тена̄ха ‘‘харитунти аттхо’’ти. пава̄расаддасса иччха̄йам̣ ваттама̄натта̄ ‘‘иччха̄пеййа̄’’ти вуттам̣. иччхам̣ уппа̄деййа̄ти паччайе иччхам̣ уппа̄деййа. упанимантана̄йетам̣ адхивачанам̣. тена̄ха ‘‘йа̄ваттака’’нтиа̄ди. неккхамманти паббаджджам̣. дат̣т̣хӯти дат̣т̣хум̣. чханда̄нураккхан̣аттхан̃хеттха ануна̄сикалопо. кхематоти ниббхайато. ка̄йена ва̄ ва̄ча̄йа ва̄ абхихаритва̄ нимантеййа̄ти самбандхо. йатха̄ ча ка̄йена абхихареййа, ва̄ча̄йа ча, там̣ видхим̣ дассетум̣ ‘‘упанетва̄’’тиа̄ди вуттам̣ саантаранти антарава̄сакасахитам̣. уттаранти уттара̄сан̇гам̣. параманти аваса̄нам̣. асса чӣварасса̄ти асса самуда̄йабхӯтасса харитаббасса чӣварасса. таггун̣асам̣вин̃н̃а̄н̣о хи айам̣ ба̄хираттхасама̄со йатха̄ ‘‘ламбакан̣н̣о’’ти дат̣т̣хаббам̣. тена̄ха ‘‘нива̄санена̄’’тиа̄ди. уккат̣т̣хапариччхедена хи саббе там̣парамам̣йева гахетум̣ лабханти.

йасма̄ аччхиннасаббачӣварена тичӣвараматтакенева бхиккхуна̄ евам̣ пат̣ипаджджитаббам̣, ан̃н̃ена пана ан̃н̃атха̄пи, тасма̄ там̣ вибха̄гам̣ дассетум̣ ‘‘татра̄йам̣ виниччхайо’’тиа̄ди вуттам̣. адхит̣т̣хитачӣварасса̄ти тичӣвара̄дхит̣т̣ха̄нанайена ва̄ париккха̄рачол̣авасена ва̄ йена кеначи адхит̣т̣хитачӣварасса, идан̃ча йебхуййена адхит̣т̣хахитва̄ чӣварам̣ парибхун̃джато вуттам̣, на пана анадхит̣т̣хитачӣварасса чӣваре аччхинне айам̣ видхи на самбхаватӣти. йасса ва̄ тичӣварато адхикампи чӣварам̣ ан̃н̃аттха аттхи, таттха наттхи, тена̄пи тада̄ таттха абха̄вато две са̄дитум̣ ват̣т̣ати. пакатийа̄ва сантаруттарена чаратӣти (са̄раттха. т̣ӣ. 2.523-524) аттхатакатхинатта̄ ва̄ са̄сан̇касиккха̄падавасена ва̄ авиппава̄сасаммутивасена ва̄ татийасса ала̄бхена ва̄ чарати. ‘‘две нат̣т̣ха̄нӣ’’ти адхика̄ратта̄ вуттам̣ ‘‘две са̄дитабба̄нӣ’’ти. екам̣ са̄дийантенева само бхависсатӣти тин̣н̣ам̣ чӣвара̄нам̣ двӣсу нат̣т̣хена екам̣ са̄дийантена само бхависсати убхиннампи сантаруттарапарамата̄йа ават̣т̣ха̄нато. йасса екам̣йева хоти ан̃н̃ена кеначи ка̄ран̣ена винат̣т̣хасесачӣваратта̄.

пан̃часу нат̣т̣хесӯти тичӣварам̣ удакаса̄т̣ика̄ сам̣каччика̄ти имесу пан̃часу чӣваресу нат̣т̣хесу. ‘‘екасмим̣ ва̄ нат̣т̣хе’’ти вачанавипарин̣а̄мам̣ катва̄ йоджетаббам̣. тато уттарӣти сантаруттарапарамато уттари.

сесакам̣ а̄харисса̄мӣти две чӣвара̄ни катва̄ ‘‘сесакам̣ пуна а̄харисса̄мӣ’’ти аттхо. сесакам̣ туйхам̣йева хотӯти вуттасса̄ти да̄насамайе евам̣ вуттасса. саче пана ‘‘сесакам̣ а̄харисса̄мӣ’’ти ватва̄ гахетва̄ гаманасамайепи ‘‘сесакам̣ туйхам̣йева хотӯ’’ти ваданти, ладдхакаппийамева. на аччхиннанат̣т̣хака̄ран̣а̄ диннанти ба̄хусачча̄дигун̣авасена диннам̣. вуттанайена̄ти ‘‘н̃а̄такаппава̄рите ва̄ вин̃н̃а̄пентасса, самайе ча ан̃н̃асса ва̄ н̃а̄такаппава̄рите тассеваттха̄йа вин̃н̃а̄пентасса’’ти вуттанайена.

татуттарисиккха̄падаван̣н̣ана̄ нит̣т̣хита̄.