8. пат̣хамаупаккхат̣асиккха̄падаван̣н̣ана̄

бхиккхум̣ панева уддисса̄ти еттха пана̄ти нипа̄таматтам̣, татха̄ ева-саддопи. тена̄ха ‘‘иттханна̄масса̄’’тиа̄ди. ападиситва̄ти катхетва̄, а̄раббха̄ти ва̄ аттхо. ан̃н̃а̄такасса гахапатисса̄ти ан̃н̃а̄такагахапатина̄ти аттхо. каран̣аттхе хи идам̣ са̄мивачанам̣. ат̣т̣хакатха̄йам̣ пана идам̣ сувин̃н̃еййанти на вича̄ритам̣. чӣварам̣ чета̄пенти париваттенти етена̄ти чӣварачета̄паннам̣ (са̄раттха. т̣ӣ. 2.528-529), чӣварамӯлам̣, на-ка̄ро панеттха а̄гамо, ‘‘чӣварачета̄пана’’нтипи пат̣ханти. там̣ пана йасма̄ хиран̃н̃а̄дӣсу ан̃н̃атарам̣ хоти, тасма̄ ‘‘хиран̃н̃а̄дика’’нти вуттам̣. таттха хиран̃н̃анти каха̄пан̣о вуччати. а̄дисаддена суван̣н̣а̄дӣнам̣ гахан̣ам̣. упаккхат̣анти упат̣т̣ха̄питам̣. там̣ упаккхаран̣ам̣ тесам̣ татха̄ саджджитанти а̄ха ‘‘упаккхат̣ам̣ хотӣти саджджитам̣ хотӣ’’ти. сам̣харитва̄ т̣хапитанти ра̄сим̣ катва̄ т̣хапитам̣. париваттанан̃ча акатасса ка̄ра̄панам̣, катасса кин̣ананти а̄ха ‘‘ка̄ретва̄ ва̄ кин̣итва̄ ва̄ти аттхо’’ти. аччха̄десса̄мӣти па̄рупесса̄мӣти вуттам̣ хоти. тена̄ха ‘‘воха̄равачанамета’’нти. воха̄равачананти ча упача̄равачананти аттхо.

‘‘татра че со бхиккхӯ’’тиа̄дӣсу ко падасамбандхоти а̄ха ‘‘йатра со гахапати ва̄’’тиа̄ди. пуббе аппава̄ритоти ‘‘дасса̄ми, кӣдисена те, бханте, чӣварена аттхо, кӣдисам̣ те чӣварам̣ чета̄пемӣ’’ти пуббе авутто. упасан̇камитва̄ти гантва̄. падабха̄джане пачуравоха̄равасена ‘‘гхарам̣ гантва̄’’ти (па̄ра̄. 529) вуттам̣. еттха ча пачуравоха̄равасена̄ти йебхуййавоха̄равасена. йебхуййена хи гхараса̄микам̣ дат̣т̣хука̄ма̄ тасса гхарам̣ гаччхантӣти татхева бахулавоха̄ро. викаппанти висит̣т̣хо каппо викаппо, ви-саддо четтха висит̣т̣хаттхо. тена̄ха ‘‘висит̣т̣хакаппа’’нти. имина̄ вачанаттхама̄ха. ‘‘адхикавидха̄на’’нти имина̄ пана адхиппа̄йаттхам̣. йатха̄ пана тама̄паджджатӣти йена̄ка̄рена там̣ викаппам̣ а̄паджджати. там̣ дассетунти там̣ а̄ка̄рам̣ дассетум̣.

‘‘са̄дхӯ’’ти айам̣ саддо сампат̣иччханасампахам̣санасундара̄йа̄чана̄дӣсу диссати. татха̄ хеса ‘‘са̄дху, бхантети кхо со бхиккху бхагавато бха̄ситам̣ абхинандитва̄ анумодитва̄’’тиа̄дӣсу (ма. ни. 3.86) сампат̣иччхане диссати, ‘‘са̄дху са̄дху са̄рипутта̄’’тиа̄дӣсу (дӣ. ни. 3.349; ма. ни. 1.340) сампахам̣сане.

‘‘са̄дху дхаммаручи ра̄джа̄, са̄дху пан̃н̃а̄н̣ава̄ наро;

са̄дху митта̄намаддуббхо, па̄пасса̄каран̣ам̣ сукха’’нтиа̄дӣсу. (джа̄. 2.18.101) –

сундаре, ‘‘са̄дху ме, бханте бхагава̄, сам̣кхиттена дхаммам̣ десетӯ’’тиа̄дӣсу (сам̣. ни. 3.64-68) а̄йа̄чане, идха̄пи а̄йа̄чанейева дат̣т̣хабботи (дӣ. ни. ат̣т̣ха. 1.189; ма. ни. ат̣т̣ха. 1.1 мӯлапарийа̄йасуттаван̣н̣ана̄; су. ни. ат̣т̣ха. 1.115 аггикабха̄радва̄джасуттаван̣н̣ана̄; бу. вам̣. ат̣т̣ха. 1.49) а̄ха ‘‘са̄дхӯтиа̄йа̄чане нипа̄то’’ти. таттха а̄йа̄чанети абхимукхам̣ йа̄чане, абхипаттхана̄йанти аттхо. паривитакке нипа̄тоти самбандхо. а̄лапатӣти а̄мантети. а̄йата̄дӣсӯти еттха а̄дисаддена виттхатааппитасан̣ха̄нам̣ гахан̣ам̣. йасма̄ пана на имасса а̄паджджанаматтенева а̄патти сӣсам̣ ети, тасма̄ ‘‘тасса вачанена̄’’тиа̄ди вуттам̣. пайогети суттапарийесана̄дипайоге.

махаггхам̣ чета̄петука̄мам̣ аппаггханти вӣсатиаггханакам̣ чӣварам̣ чета̄петука̄мам̣ ‘‘алам̣ майхам̣ тена, дасааггханакам̣ ва̄ ат̣т̣хаггханакам̣ ва̄ дехӣ’’ти вадантасса̄ти аттхо. еварӯпанти евам̣ самабха̄гам̣, имина̄ самаканти вуттам̣ хоти. тан̃ча кхо аггхавасенева, на пама̄н̣авасена. аггхавад̣д̣ханакан̃хи идам̣ сиккха̄падам̣.

пат̣хамаупаккхат̣асиккха̄падаван̣н̣ана̄ нит̣т̣хита̄.