10. наччагӣтасиккха̄падаван̣н̣ана̄

наччанти нат̣а̄дайо ва̄ наччанту, сон̣д̣а̄ ва̄ антамасо морасувамаккат̣а̄дайопи, саббаметам̣ наччамева. тена̄ха ‘‘наччанти антамасо мораначчампӣ’’ти. гӣтанти нат̣а̄дӣнам̣ ва̄ гӣтам̣ хоту, арийа̄нам̣ паринибба̄нака̄ле ратанаттайагун̣ӯпасам̣хитам̣ са̄дхукӣл̣итагӣтам̣ ва̄, антамасо ‘‘дантагӣтампи га̄йисса̄ма̄’’ти пуббабха̄ге окӯджанта̄ каронти, саббаметам̣ гӣтамева. тена̄ха ‘‘гӣтанти антамасо дхаммабха̄н̣акагӣтампӣ’’ти. таттха дхаммабха̄н̣акагӣтам̣ на̄ма асан̃н̃атабхиккхӯнам̣ там̣ там̣ ваттам̣ бхиндитва̄ атидӣгхам̣ катва̄ гӣтассарена дхаммабхан̣анам̣, тампи нева бхиккхуно, на бхиккхунӣнам̣ ват̣т̣ати. татха̄ хи вуттам̣ параматтхаджотика̄йа кхуддакат̣т̣хакатха̄йа (кху. па̄. ат̣т̣ха. 2.паччхимапан̃часиккха̄падаван̣н̣ана̄) ‘‘дхаммӯпасам̣хитам̣ гӣтам̣ ват̣т̣ати, гӣтӯпасам̣хито пана дхаммо на ват̣т̣атӣ’’ти. тасма̄ дхаммам̣ бхан̣антена джа̄такаватта̄дим̣ там̣ там̣ ваттам̣ авина̄сетва̄ чатурассена (чӯл̣ава. ат̣т̣ха. 249) ваттена париман̣д̣ала̄ни падабйан̃джана̄ни дассетабба̄ни. ва̄дитанти тантибаддха̄дива̄данӣйабхан̣д̣ава̄дитам̣ ва̄ хоту, кут̣абхерива̄дитам̣ ва̄ антамасо удакабхерива̄дитампи, саббамеветам̣ ва̄дитамева. тена̄ха ‘‘ва̄дитанти антамасо удакабхерива̄дита’’нти. йам̣ пана нит̣т̣хубхантӣ ва̄ са̄сан̇ке ва̄ т̣хита̄ аччхарикам̣ ва̄ пхот̣ети, па̄н̣им̣ ва̄ пахарати, таттха ана̄патти. дассанена четтха саванампи сан̇гахитам̣ вирӯпекасесанайена. а̄лочанасабха̄вата̄йа ва̄ пан̃чаннам̣ вин̃н̃а̄н̣а̄нам̣ саванакирийа̄йапи дассанасан̇кхепасаббха̄вато ‘‘дассана̄йа’’иччева вуттанти а̄ха ‘‘етесу йам̣ кин̃чи дассана̄йа гаччхантийа̄’’ти. йаттха т̣хита̄ти евам̣ гантва̄ йасмим̣ падесе т̣хита̄.

нану ча сайам̣наччана̄дӣсу па̄читтийам̣ па̄л̣ийам̣ на вуттам̣, атха катхам̣ гахетаббанти а̄ха ‘‘саббаат̣т̣хакатха̄су вутта’’нти, имина̄ па̄л̣ийам̣ авуттепи ат̣т̣хакатха̄пама̄н̣ена гахетаббанти дассети. самут̣т̣ха̄на̄дӣни ел̣акаломасадиса̄нӣти пана ма̄тика̄гатапа̄читтийассева васена вуттам̣, саббесам̣ васена пана чхасамут̣т̣ха̄нанти гахетаббам̣. ‘‘а̄ра̄ме т̣хатва̄’’ти идам̣ нидассанаматтам̣ сесаирийа̄патхехи йутта̄йа пассантийа̄ ана̄паттийа̄ иччхитаббатта̄. итаратха̄ хи нисинна̄пи пасситум̣ на лабхеййа. ‘‘пассисса̄мӣ’’ти виха̄рато виха̄рам̣ гаччхантийа̄ а̄паттийева. а̄санаса̄ла̄йа нисинна̄ пассати, ана̄патти, ‘‘пассисса̄мӣ’’ти ут̣т̣хахитва̄ гаччхантийа̄ а̄патти. вӣтхийам̣ т̣хатва̄ гӣвам̣ париваттетва̄ пассантийа̄пи а̄паттийева. бхиккхусса̄пи есева найо, а̄паттибхедова на̄нам̣.

наччагӣтасиккха̄падаван̣н̣ана̄ нит̣т̣хита̄.

ласун̣авагго пат̣хамо.