3. пан̃хапуччхакаван̣н̣ана̄

747. саббан̃а̄н̣а̄рамман̣ата̄йа̄ти пат̣исамбхида̄пат̣исамбхида̄н̃а̄н̣а̄рамман̣ата̄йа. ‘‘суттантабха̄джанӣйе пана…пе… сийа̄’’ти идам̣ абхидхаммабха̄джанӣйена вируджджхати, тасса ва̄ са̄васесадесаната̄ а̄паджджатӣти чоданам̣ манаси катва̄ а̄ха ‘‘абхидхаммабха̄джанӣйе’’тиа̄ди. ниравасесакатхананти асесетва̄ катханам̣. тена читтуппа̄дасан̇гахите аттхе асесетва̄ десана̄ идха абхидхаммабха̄джанӣйасса бха̄ро, на саббан̃еййадхаммети дассети. йатха̄дасситависайавачанавасена̄ти дасситаппака̄рависайасса катханавасена, дхамматтхавасена дассите там̣там̣читтуппа̄де таттха дхамманирутта̄бхила̄пена н̃а̄н̣асса катханавасена̄ти аттхо. ан̃н̃а̄рамман̣атам̣ на пат̣иседхети атаппарабха̄ватоти адхиппа̄йо. на ниравасесена катханам̣ ачиттуппа̄дапарийа̄паннасса висайасса акатхитатта̄. евам̣ пат̣ибха̄напат̣исамбхида̄висайасса̄пи на ниравасесена катхананти суттантабха̄джанӣйе ависесавачанена саббан̃а̄н̣а̄рамман̣атам̣йева пат̣ибха̄напат̣исамбхида̄йа патит̣т̣ха̄пети. татха̄ тиссо пат̣исамбхида̄тиа̄дипан̃хапуччхакапа̄л̣ийа̄пи. тиссоти аттхадхаммапат̣ибха̄напат̣исамбхида̄. нируттипат̣исамбхида̄ хи ‘‘паритта̄рамман̣а̄’’тева вутта̄.

йадипи сийа̄ на тасса̄ махаггата̄рамман̣ата̄ти самбандхо. ‘‘на хи магго паччайуппанно на хотӣ’’ти имина̄ ‘‘аттхапат̣исамбхида̄ на магга̄рамман̣а̄’’ти вачанасса йатха̄вуттаттхаса̄дхакатам̣ вибха̄вети. тасса̄ти пат̣ибха̄напат̣исамбхида̄йа на махаггата̄рамман̣ата̄ самбхавати нану найам̣ ануссарантасса̄ти адхиппа̄йо. двепӣти ‘‘аттхапат̣исамбхида̄ на магга̄рамман̣а̄, тиссо пат̣исамбхида̄ сийа̄ паритта̄рамман̣а̄, сийа̄ махаггата̄рамман̣а̄, сийа̄ аппама̄н̣а̄рамман̣а̄’’ти ча двепи ета̄ па̄л̣ийо. та̄су балаватара̄йа т̣ха̄насса, итара̄йа адхиппа̄йамагганасса ча упа̄йадассанамукхена та̄сам̣ ан̃н̃аман̃н̃ам̣ авиродхам̣ дассетум̣ ‘‘кусала̄кусала̄нам̣ пана̄’’тиа̄дима̄ха. ‘‘ниппарийа̄йа̄ таттха дхаммапат̣исамбхида̄’’ти етена таттха аттхапат̣исамбхида̄йа парийа̄йабха̄вама̄ха. татха̄ випа̄какирийа̄нантиа̄ди йатха̄дхиппетасса аттхасса висадисӯда̄харан̣адассанам̣. убхайенапи ‘‘аттхапат̣исамбхида̄ на магга̄рамман̣а̄’’ти (вибха. 749) вачанам̣ суттантанайа̄нугатам̣ ниппарийа̄йаттхасса таттха адхиппетатта̄ти дӣпети. кин̃чи пана н̃а̄н̣антиа̄ди ‘‘тиссо пат̣исамбхида̄’’тиа̄дипа̄л̣ийа̄ саматтхакам̣. йатха̄дхиппетасса аттхасса пат̣ибха̄нам̣ дӣпанам̣ пат̣ибха̄нам̣. тена̄ха ‘‘н̃еййаппака̄санато’’ти. ити йа̄ ‘‘тиссо пат̣исамбхида̄’’ти па̄л̣и, тасса̄ балавабха̄вавибха̄ванена итара̄йа адхиппа̄йамагганам̣ катанти ведитаббам̣. ниппарийа̄йа̄ти парийа̄йарахита̄ уджукам̣ сарӯпенева паватта̄. ниппарийа̄йа…пе… паваттийанти екантикааттха̄рамман̣ам̣ н̃а̄н̣ам̣ аттхапат̣исамбхида̄, н̃а̄н̣а̄рамман̣ам̣ пат̣ибха̄напат̣исамбхида̄ти гахетва̄ десана̄йам̣.

со ева̄ти парасса абхила̄пасаддо ева. ануваттама̄ната̄ часса нируттипат̣исамбхида̄ паччуппаннамева саддам̣ а̄рамман̣ам̣ каронтӣ, саддам̣ сутва̄ ‘‘айам̣ сабха̄ванирутти, айам̣ на сабха̄ванируттӣ’’ти джа̄нантӣти ча а̄дивачанавасена ведитаббо.

пан̃хапуччхакаван̣н̣ана̄ нит̣т̣хита̄.

пат̣исамбхида̄вибхан̇гаван̣н̣ана̄ нит̣т̣хита̄.