2. паваттива̄раван̣н̣ана̄

19. паваттива̄ре сан̇кха̄ра̄нам̣ пуггала̄нан̃ча ока̄сатта̄ джха̄нам̣ бхӯми ча висум̣ ока̄сабха̄вена гахита̄ти пуггалава̄ре ча ока̄савасена пуггалаггахан̣ена тесам̣ двиннам̣ ока̄са̄нам̣ васена гахан̣ам̣ хоти, тасма̄ ‘‘вина̄ витаккавича̄рехи асса̄сапасса̄са̄нам̣ уппа̄даккхан̣е’’ти дутийататийаджджха̄нока̄савасена гахита̄ пуггала̄ висесетва̄ дассита̄ти дат̣т̣хабба̄. пуна пат̣хамаджджха̄нам̣ сама̄панна̄нанти джха̄нока̄савасена пуггалам̣ дассети, ка̄ма̄вачара̄нанти бхӯмока̄савасена. двиппака̄ра̄нампи пана тесам̣ висесанаттхама̄ха ‘‘асса̄сапасса̄са̄нам̣ уппа̄даккхан̣е’’ти. тена рӯпа̄рӯпа̄вачаресу пат̣хамаджджха̄насама̄паннаке ка̄ма̄вачаре габбхагата̄дике ча ниваттети. ка̄ма̄вачара̄нампи хи габбхагата̄дӣнам̣ вина̄ асса̄сапасса̄сехи витаккавича̄ра̄нам̣ уппатти аттхи. ат̣т̣хакатха̄йам̣ пана екантикатта̄ рӯпа̄рӯпа̄вачара̄ нидассита̄. вина̄ асса̄сапасса̄сехи витаккавича̄ра̄нам̣ уппа̄даккхан̣ети етена пана дассита̄ пуггала̄ пат̣хамаджджха̄нока̄са̄ ка̄ма̄вачара̄диока̄са̄ ча асса̄сапасса̄савирахависит̣т̣ха̄ дат̣т̣хабба̄. имина̄ найена саббаттха пуггалавибха̄го ведитаббо.

21. ‘‘пат̣хамаджджха̄не ка̄ма̄вачарети ка̄ма̄вачарабхӯмийам̣ уппанне пат̣хамаджджха̄не’’ти ат̣т̣хакатха̄йам̣ вуттам̣, етасмим̣ пана аттхе сати ‘‘чатуттхаджджха̄не рӯпа̄вачаре арӯпа̄вачаре таттха читтасан̇кха̄ро уппаджджати, но ча таттха ка̄йасан̇кха̄ро уппаджджатӣ’’ти еттха̄пи рӯпа̄рӯпа̄вачарабхӯмӣсу уппанне чатуттхаджджха̄нети аттхо бхавеййа, со ча анит̣т̣хо бхӯмӣнам̣ ока̄сабха̄вассева аггахитата̄паттито, саббачатуттхаджджха̄насса ока̄савасена аггахитата̄паттито ча, тасма̄ джха̄набхӯмока̄са̄нам̣ сан̇карам̣ акатва̄ висум̣ ева ока̄сабха̄во йоджетаббо. пат̣хамаджджха̄нока̄сепи хи ка̄йасан̇кха̄ро ча уппаджджати вачӣсан̇кха̄ро ча уппаджджати ка̄ма̄вачарока̄се ча. йадипи на саббамхи пат̣хамаджджха̄не саббамхи ча ка̄ма̄вачаре двайам̣ уппаджджати, таттха пана там̣двайуппатти аттхӣти катва̄ евам̣ вуттанти дат̣т̣хаббам̣. висум̣ ока̄сатта̄ ча ‘‘ан̇гаматтавасена четтха̄’’тиа̄дивачанам̣ на ваттаббам̣ хотӣти. имамхи ча йамаке авитаккавича̄раматтам̣ дутийаджджха̄нам̣ вича̄равасена пат̣хамаджджха̄не сан̇гахам̣ гаччхатӣти дат̣т̣хаббам̣. муддхабхӯтам̣ дутийаджджха̄нам̣ гахетва̄ итарам̣ асан̇гахитанти ва̄. йассайаттхаке ‘‘ниродхасама̄панна̄на’’нти на лаббхати. на хи те асан̃н̃асатта̄ вийа ока̄се хонтӣти.

37. суддха̄ва̄са̄нам̣ дутийе читте ваттама̄нети тесам̣ пат̣хамато авитаккаавича̄рато дутийе савитаккасавича̄репи бхаваникантиа̄ваджджане ваттама̄не убхайам̣ нуппаджджиттха̄ти дассентена тато пуримачиттаккхан̣есупи нуппаджджиттха̄ти дасситамева хоти. йатха̄ пана читтасан̇кха̄расса а̄дидассанаттхам̣ ‘‘суддха̄ва̄сам̣ упападжджанта̄на’’нти вуттам̣, евам̣ вачӣсан̇кха̄расса а̄дидассанаттхам̣ ‘‘дутийе читте ваттама̄не’’ти вуттанти дат̣т̣хаббам̣.

паваттива̄раван̣н̣ана̄ нит̣т̣хита̄.

сан̇кха̄райамакаван̣н̣ана̄ нит̣т̣хита̄.