9. ма̄тупосакасуттам̣

205. са̄ваттхинида̄нам̣. атха кхо ма̄тупосако бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо ма̄тупосако бра̄хман̣о бхагавантам̣ етадавоча – ‘‘ахан̃хи, бхо готама, дхаммена бхиккхам̣ парийеса̄ми, дхаммена бхиккхам̣ парийеситва̄ ма̄та̄питаро посеми. качча̄хам̣, бхо готама, евам̣ка̄рӣ киччака̄рӣ хомӣ’’ти? ‘‘таггха твам̣, бра̄хман̣а, евам̣ка̄рӣ киччака̄рӣ хоси. йо кхо, бра̄хман̣а, дхаммена бхиккхам̣ парийесати, дхаммена бхиккхам̣ парийеситва̄ ма̄та̄питаро посети, бахум̣ со пун̃н̃ам̣ пасаватӣ’’ти.

‘‘йо ма̄тарам̣ питарам̣ ва̄, маччо дхаммена посати;

та̄йа нам̣ па̄ричарийа̄йа, ма̄та̄питӯсу пан̣д̣ита̄;

идхева нам̣ пасам̣санти, печча сагге памодатӣ’’ти.

евам̣ вутте, ма̄тупосако бра̄хман̣о бхагавантам̣ етадавоча – ‘‘абхиккантам̣ бхо готама, абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.