10. бхиккхакасуттам̣

206. са̄ваттхинида̄нам̣. атха кхо бхиккхако бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо бхиккхако бра̄хман̣о бхагавантам̣ етадавоча – ‘‘ахампи кхо, бхо готама, бхиккхако, бхавампи бхиккхако, идха но ким̣ на̄на̄каран̣а’’нти?

‘‘на тена бхиккхако хоти, йа̄вата̄ бхиккхате паре;

виссам̣ дхаммам̣ сама̄да̄йа, бхиккху хоти на та̄вата̄.

‘‘йодха пун̃н̃ан̃ча па̄пан̃ча, ба̄хитва̄ брахмачарийам̣;

сан̇кха̄йа локе чарати, са ве бхиккхӯти вуччатӣ’’ти.

евам̣ вутте, бхиккхако бра̄хман̣о бхагавантам̣ етадавоча – ‘‘абхиккантам̣, бхо готама, абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.