7. бра̄хман̣асам̣йуттам̣

1. арахантавагго

1. дханан̃джа̄нӣсуттам̣

187. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена ан̃н̃атарасса бха̄радва̄джаготтасса бра̄хман̣асса дханан̃джа̄нӣ [дха̄нан̃джа̄нӣ (пӣ. сӣ. ат̣т̣ха.)] на̄ма бра̄хман̣ӣ абхиппасанна̄ хоти буддхе ча дхамме ча сан̇гхе ча. атха кхо дханан̃джа̄нӣ бра̄хман̣ӣ бха̄радва̄джаготтасса бра̄хман̣асса бхаттам̣ упасам̣харантӣ упаккхалитва̄ тиккхаттум̣ уда̄нам̣ уда̄неси –

‘‘намо тасса бхагавато арахато самма̄самбуддхасса;

намо тасса бхагавато арахато самма̄самбуддхасса;

намо тасса бхагавато арахато самма̄самбуддхасса̄’’ти.

евам̣ вутте, бха̄радва̄джаготто бра̄хман̣о дханан̃джа̄ним̣ бра̄хман̣им̣ етадавоча – ‘‘евамевам̣ пана̄йам̣ васалӣ йасмим̣ ва̄ тасмим̣ ва̄ тасса мун̣д̣акасса саман̣асса ван̣н̣ам̣ бха̄сати. ида̄ни тйа̄хам̣, васали, тасса саттхуно ва̄дам̣ а̄ропесса̄мӣ’’ти. ‘‘на кхва̄хам̣ там̣, бра̄хман̣а, пасса̄ми садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа, йо тасса бхагавато ва̄дам̣ а̄ропеййа арахато самма̄самбуддхасса. апи ча твам̣, бра̄хман̣а, гаччха, гантва̄ виджа̄ниссасӣ’’ти [гантва̄пи джа̄ниссасӣти (сйа̄. кам̣.)].

атха кхо бха̄радва̄джаготто бра̄хман̣о купито анаттамано йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо бха̄радва̄джаготто бра̄хман̣о бхагавантам̣ га̄тха̄йа аджджхабха̄си –

‘‘ким̣су чхетва̄ сукхам̣ сети, ким̣су чхетва̄ на сочати;

киссассу екадхаммасса, вадхам̣ рочеси готама̄’’ти.

‘‘кодхам̣ чхетва̄ сукхам̣ сети, кодхам̣ чхетва̄ на сочати;

кодхасса висамӯласса, мадхураггасса бра̄хман̣а;

вадхам̣ арийа̄ пасам̣санти, тан̃хи чхетва̄ на сочатӣ’’ти.

евам̣ вутте, бха̄радва̄джаготто бра̄хман̣о бхагавантам̣ етадавоча – ‘‘абхиккантам̣, бхо готама, абхиккантам̣, бхо готама! сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – чаккхуманто рӯпа̄ни даккхантӣти; евамевам̣ бхота̄ готамена анекапарийа̄йена дхаммо пака̄сито. еса̄хам̣, бханте, бхагавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. лабхеййа̄хам̣ бхото готамасса сантике паббаджджам̣, лабхеййам̣ упасампада’’нти.

алаттха кхо бха̄радва̄джаготто бра̄хман̣о бхагавато сантике паббаджджам̣, алаттха упасампадам̣. ачирӯпасампанно кхо пана̄йасма̄ бха̄радва̄джо еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана̄йасма̄ бха̄радва̄джо арахатам̣ ахосӣти.

2. аккосасуттам̣

188. екам̣ самайам̣ бхагава̄ ра̄джагахе вихарати вел̣уване каландаканива̄пе. ассоси кхо аккосакабха̄радва̄джо бра̄хман̣о – ‘‘бха̄радва̄джаготто кира бра̄хман̣о саман̣асса готамасса сантике ага̄расма̄ анага̄рийам̣ паббаджито’’ти купито анаттамано йена бхагава̄ тенупасан̇ками; упасан̇камитва̄ бхагавантам̣ асаббха̄хи пхаруса̄хи ва̄ча̄хи аккосати парибха̄сати.

евам̣ вутте, бхагава̄ аккосакабха̄радва̄джам̣ бра̄хман̣ам̣ етадавоча – ‘‘там̣ ким̣ ман̃н̃аси, бра̄хман̣а, апи ну кхо те а̄гаччханти митта̄мачча̄ н̃а̄тиса̄лохита̄ атитхийо [атитхайо (?)]’’ти? ‘‘аппекада̄ ме, бхо готама, а̄гаччханти митта̄мачча̄ н̃а̄тиса̄лохита̄ атитхийо’’ти. ‘‘‘там̣ ким̣ ман̃н̃аси, бра̄хман̣а, апи ну тесам̣ ануппадеси кха̄данӣйам̣ ва̄ бходжанӣйам̣ ва̄ са̄йанӣйам̣ ва̄’’’ти? ‘‘‘аппекада̄ неса̄хам̣, бхо готама, ануппадеми кха̄данӣйам̣ ва̄ бходжанӣйам̣ ва̄ са̄йанӣйам̣ ва̄’’’ти. ‘‘‘саче кхо пана те, бра̄хман̣а, наппат̣игган̣ханти, касса там̣ хотӣ’’’ти? ‘‘‘саче те, бхо готама, наппат̣игган̣ханти, амха̄камева там̣ хотӣ’’’ти. ‘‘евамева кхо, бра̄хман̣а, йам̣ твам̣ амхе анаккосанте аккосаси, аросенте росеси, абхан̣д̣анте бхан̣д̣аси, там̣ те майам̣ наппат̣игган̣ха̄ма. тавеветам̣, бра̄хман̣а, хоти; тавеветам̣, бра̄хман̣а, хоти’’.

‘‘йо кхо, бра̄хман̣а, аккосантам̣ паччаккосати, росентам̣ пат̣иросети, бхан̣д̣антам̣ пат̣ибхан̣д̣ати, айам̣ вуччати, бра̄хман̣а, самбхун̃джати вӣтихаратӣти. те майам̣ тайа̄ нева самбхун̃джа̄ма на вӣтихара̄ма. тавеветам̣, бра̄хман̣а, хоти; тавеветам̣, бра̄хман̣а, хотӣ’’ти. ‘‘бхавантам̣ кхо готамам̣ сара̄джика̄ париса̄ евам̣ джа̄на̄ти – ‘арахам̣ саман̣о готамо’ти. атха ча пана бхавам̣ готамо куджджхатӣ’’ти.

‘‘аккодхасса куто кодхо, дантасса самаджӣвино;

саммадан̃н̃а̄ вимуттасса, упасантасса та̄дино.

‘‘тассева тена па̄пийо, йо куддхам̣ пат̣икуджджхати;

куддхам̣ аппат̣икуджджханто, сан̇га̄мам̣ джети дуджджайам̣.

‘‘убхиннаматтхам̣ чарати, аттано ча парасса ча;

парам̣ сан̇купитам̣ н̃атва̄, йо сато упасаммати.

‘‘убхиннам̣ тикиччханта̄нам̣, аттано ча парасса ча;

джана̄ ман̃н̃анти ба̄лоти, йе дхаммасса аковида̄’’ти.

евам̣ вутте, аккосакабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. лабхеййа̄хам̣, бханте, бхото готамасса сантике паббаджджам̣, лабхеййам̣ упасампада’’нти.

алаттха кхо аккосакабха̄радва̄джо бра̄хман̣о бхагавато сантике паббаджджам̣, алаттха упасампадам̣. ачирӯпасампанно кхо пана̄йасма̄ аккосакабха̄радва̄джо еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣ на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана̄йасма̄ бха̄радва̄джо арахатам̣ ахосӣти.

3. асуриндакасуттам̣

189. екам̣ самайам̣ бхагава̄ ра̄джагахе вихарати вел̣уване каландаканива̄пе. ассоси кхо асуриндакабха̄радва̄джо бра̄хман̣о – ‘‘бха̄радва̄джаготто бра̄хман̣о кира саман̣асса готамасса сантике ага̄расма̄ анага̄рийам̣ паббаджито’’ти купито анаттамано йена бхагава̄ тенупасан̇ками; упасан̇камитва̄ бхагавантам̣ асаббха̄хи пхаруса̄хи ва̄ча̄хи аккосати парибха̄сати. евам̣ вутте, бхагава̄ тун̣хӣ ахоси. атха кхо асуриндакабха̄радва̄джо бра̄хман̣о бхагавантам̣ етадавоча – ‘‘джитоси, саман̣а, джитоси, саман̣а̄’’ти.

‘‘джайам̣ ве ман̃н̃ати ба̄ло, ва̄ча̄йа пхарусам̣ бхан̣ам̣;

джайан̃чевасса там̣ хоти, йа̄ титиккха̄ виджа̄нато.

‘‘тассева тена па̄пийо, йо куддхам̣ пат̣икуджджхати;

куддхам̣ аппат̣икуджджханто, сан̇га̄мам̣ джети дуджджайам̣.

‘‘убхиннаматтхам̣ чарати, аттано ча парасса ча;

парам̣ сан̇купитам̣ н̃атва̄, йо сато упасаммати.

‘‘убхиннам̣ тикиччханта̄нам̣, аттано ча парасса ча;

джана̄ ман̃н̃анти ба̄лоти, йе дхаммасса аковида̄’’ти.

евам̣ вутте, асуриндакабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… аббхан̃н̃а̄си. ан̃н̃атаро ча пана̄йасма̄ бха̄радва̄джо арахатам̣ ахосӣ’’ти.

4. билан̇гикасуттам̣

190. екам̣ самайам̣ бхагава̄ ра̄джагахе вихарати вел̣уване каландаканива̄пе. ассоси кхо билан̇гикабха̄радва̄джо бра̄хман̣о – ‘‘бха̄радва̄джаготто кира бра̄хман̣о саман̣асса готамасса сантике ага̄расма̄ анага̄рийам̣ паббаджито’’ти купито анаттамано йена бхагава̄ тенупасан̇ками; упасан̇камитва̄ тун̣хӣбхӯто екамантам̣ ат̣т̣ха̄си. атха кхо бхагава̄ билан̇гикасса бха̄радва̄джасса бра̄хман̣асса четаса̄ четопаривитаккаман̃н̃а̄йа билан̇гикам̣ бха̄радва̄джам̣ бра̄хман̣ам̣ га̄тха̄йа аджджхабха̄си –

‘‘йо аппадут̣т̣хасса нарасса дуссати,

суддхасса посасса анан̇ган̣асса;

тамева ба̄лам̣ паччети па̄пам̣,

сукхумо раджо пат̣ива̄там̣ва кхитто’’ти.

евам̣ вутте, вилан̇гикабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… аббхан̃н̃а̄си. ан̃н̃атаро ча пана̄йасма̄ бха̄радва̄джо арахатам̣ ахосӣ’’ти.

5. ахим̣сакасуттам̣

191. са̄ваттхинида̄нам̣. атха кхо ахим̣сакабха̄радва̄джо бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо ахим̣сакабха̄радва̄джо бра̄хман̣о бхагавантам̣ етадавоча – ‘‘ахим̣сака̄хам̣, бхо готама, ахим̣сака̄хам̣, бхо готама̄’’ти.

‘‘йатха̄ на̄мам̣ татха̄ часса, сийа̄ кхо твам̣ ахим̣сако;

йо ча ка̄йена ва̄ча̄йа, манаса̄ ча на хим̣сати;

са ве ахим̣сако хоти, йо парам̣ на вихим̣сатӣ’’ти.

евам̣ вутте, ахим̣сакабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… аббхан̃н̃а̄си. ан̃н̃атаро ча пана̄йасма̄ ахим̣сакабха̄радва̄джо арахатам̣ ахосӣ’’ти.

6. джат̣а̄суттам̣

192. са̄ваттхинида̄нам̣. атха кхо джат̣а̄бха̄радва̄джо бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо джат̣а̄бха̄радва̄джо бра̄хман̣о бхагавантам̣ га̄тха̄йа аджджхабха̄си –

‘‘антоджат̣а̄ бахиджат̣а̄, джат̣а̄йа джат̣ита̄ паджа̄;

там̣ там̣ готама пуччха̄ми, ко имам̣ виджат̣айе джат̣а’’нти.

‘‘сӣле патит̣т̣ха̄йа наро сапан̃н̃о, читтам̣ пан̃н̃ан̃ча бха̄вайам̣;

а̄та̄пӣ нипако бхиккху, со имам̣ виджат̣айе джат̣ам̣.

‘‘йесам̣ ра̄го ча досо ча, авиджджа̄ ча вира̄джита̄;

кхӣн̣а̄сава̄ араханто, тесам̣ виджат̣ита̄ джат̣а̄.

‘‘йаттха на̄ман̃ча рӯпан̃ча, асесам̣ упаруджджхати;

пат̣игхам̣ рӯпасан̃н̃а̄ ча, еттхеса̄ чхиджджате джат̣а̄’’ти.

евам̣ вутте, джат̣а̄бха̄радва̄джо бхагавантам̣ етадавоча – ‘‘абхиккантам̣, бхо готама…пе… ан̃н̃атаро ча пана̄йасма̄ бха̄радва̄джо арахатам̣ ахосӣ’’ти.

7. суддхикасуттам̣

193. са̄ваттхинида̄нам̣. атха кхо суддхикабха̄радва̄джо бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо суддхикабха̄радва̄джо бра̄хман̣о бхагавато сантике имам̣ га̄тхам̣ аджджхабха̄си –

‘‘на бра̄хман̣о [на̄бра̄хман̣о (?)] суджджхати кочи, локе сӣлава̄пи тапокарам̣;

виджджа̄чаран̣асампанно, со суджджхати на ан̃н̃а̄ итара̄ паджа̄’’ти.

‘‘бахумпи палапам̣ джаппам̣, на джачча̄ хоти бра̄хман̣о;

антокасамбу сан̇килит̣т̣хо, куханам̣ упаниссито.

‘‘кхаттийо бра̄хман̣о вессо, суддо чан̣д̣а̄лапуккусо;

а̄раддхавӣрийо пахитатто, ниччам̣ дал̣хапараккамо;

паппоти парамам̣ суддхим̣, евам̣ джа̄на̄хи бра̄хман̣а̄’’ти.

евам̣ вутте, суддхикабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… ан̃н̃атаро ча пана̄йасма̄ бха̄радва̄джо арахатам̣ ахосӣ’’ти.

8. аггикасуттам̣

194. екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена аггикабха̄радва̄джасса бра̄хман̣асса саппина̄ па̄йасо саннихито хоти – ‘‘аггим̣ джухисса̄ми, аггихуттам̣ паричарисса̄мӣ’’ти.

атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа ра̄джагахам̣ пин̣д̣а̄йа па̄виси. ра̄джагахе сапада̄нам̣ пин̣д̣а̄йа чарама̄но йена аггикабха̄радва̄джасса бра̄хман̣асса нивесанам̣ тенупасан̇ками; упасан̇камитва̄ екамантам̣ ат̣т̣ха̄си. аддаса̄ кхо аггикабха̄радва̄джо бра̄хман̣о бхагавантам̣ пин̣д̣а̄йа т̣хитам̣. дисва̄на бхагавантам̣ га̄тха̄йа аджджхабха̄си –

‘‘тӣхи виджджа̄хи сампанно, джа̄тима̄ сутава̄ бахӯ;

виджджа̄чаран̣асампанно, сомам̣ бхун̃джеййа па̄йаса’’нти.

‘‘бахумпи палапам̣ джаппам̣, на джачча̄ хоти бра̄хман̣о;

антокасамбу сам̣килит̣т̣хо, кухана̄парива̄рито.

‘‘пуббенива̄сам̣ йо ведӣ, сагга̄па̄йан̃ча пассати;

атхо джа̄тиккхайам̣ патто, абхин̃н̃а̄восито муни.

‘‘ета̄хи тӣхи виджджа̄хи, тевиджджо хоти бра̄хман̣о;

виджджа̄чаран̣асампанно, сомам̣ бхун̃джеййа па̄йаса’’нти.

‘‘бхун̃джату бхавам̣ готамо. бра̄хман̣о бхава’’нти.

‘‘га̄тха̄бхигӣтам̣ ме абходжанеййам̣,

сампассатам̣ бра̄хман̣а неса дхаммо;

га̄тха̄бхигӣтам̣ пануданти буддха̄,

дхамме сати бра̄хман̣а вуттиреса̄.

‘‘ан̃н̃ена ча кевалинам̣ махесим̣,

кхӣн̣а̄савам̣ куккуччавӯпасантам̣;

аннена па̄нена упат̣т̣хахассу,

кхеттан̃хи там̣ пун̃н̃апеккхасса хотӣ’’ти.

евам̣ вутте, аггикабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… ан̃н̃атаро ча пана̄йасма̄ аггикабха̄радва̄джо арахатам̣ ахосӣ’’ти.

9. сундарикасуттам̣

195. екам̣ самайам̣ бхагава̄ косалесу вихарати сундарика̄йа надийа̄ тӣре. тена кхо пана самайена сундарикабха̄радва̄джо бра̄хман̣о сундарика̄йа надийа̄ тӣре аггим̣ джухати, аггихуттам̣ паричарати. атха кхо сундарикабха̄радва̄джо бра̄хман̣о аггим̣ джухитва̄ аггихуттам̣ паричаритва̄ ут̣т̣ха̄йа̄сана̄ саманта̄ чатуддиса̄ анувилокеси – ‘‘ко ну кхо имам̣ хабйасесам̣ бхун̃джеййа̄’’ти? аддаса̄ кхо сундарикабха̄радва̄джо бра̄хман̣о бхагавантам̣ ан̃н̃атарасмим̣ руккхамӯле сасӣсам̣ па̄рутам̣ нисиннам̣. дисва̄на ва̄мена хаттхена хабйасесам̣ гахетва̄ даккхин̣ена хаттхена каман̣д̣алум̣ гахетва̄ йена бхагава̄ тенупасан̇ками. атха кхо бхагава̄ сундарикабха̄радва̄джасса бра̄хман̣асса падасаддена сӣсам̣ вивари. атха кхо сундарикабха̄радва̄джо бра̄хман̣о ‘мун̣д̣о айам̣ бхавам̣, мун̣д̣ако айам̣ бхава’нти татова пуна ниваттитука̄мо ахоси. атха кхо сундарикабха̄радва̄джасса бра̄хман̣асса етадахоси – ‘мун̣д̣а̄пи хи идхекачче бра̄хман̣а̄ бхаванти; йам̣нӯна̄хам̣ там̣ упасан̇камитва̄ джа̄тим̣ пуччхеййа’нти.

атха кхо сундарикабха̄радва̄джо бра̄хман̣о йена бхагава̄ тенупасан̇ками; упасан̇камитва̄ бхагавантам̣ етадавоча – ‘ким̣джаччо бхава’нти?

‘‘ма̄ джа̄тим̣ пуччха чаран̣ан̃ча пуччха,

кат̣т̣ха̄ хаве джа̄йати джа̄таведо;

нӣча̄кулӣнопи муни дхитима̄,

а̄джа̄нӣйо хоти хирӣниседхо.

‘‘саччена данто дамаса̄ упето,

ведантагӯ вуситабрахмачарийо;

йан̃н̃опанӣто тамупавхайетха,

ка̄лена со джухати даккхин̣еййе’’ти.

‘‘аддха̄ суйит̣т̣хам̣ сухутам̣ мама йидам̣,

йам̣ та̄дисам̣ ведагумаддаса̄ми;

тумха̄диса̄нан̃хи адассанена,

ан̃н̃о джано бхун̃джати хабйасеса’’нти.

‘‘бхун̃джату бхавам̣ готамо. бра̄хман̣о бхава’’нти.

‘‘га̄тха̄бхигӣтам̣ ме абходжанеййам̣,

сампассатам̣ бра̄хман̣а неса дхаммо;

га̄тха̄бхигӣтам̣ пануданти буддха̄,

дхамме сати бра̄хман̣а вуттиреса̄.

‘‘ан̃н̃ена ча кевалинам̣ махесим̣,

кхӣн̣а̄савам̣ куккуччавӯпасантам̣;

аннена па̄нена упат̣т̣хахассу,

кхеттан̃хи там̣ пун̃н̃апеккхасса хотӣ’’ти.

‘‘атха касса ча̄хам̣, бхо готама, имам̣ хабйасесам̣ даммӣ’’ти? ‘‘на кхва̄хам̣, бра̄хман̣а, пасса̄ми садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа йассесо хабйасесо бхутто самма̄ парин̣а̄мам̣ гаччхеййа ан̃н̃атра, бра̄хман̣а, татха̄гатасса ва̄ татха̄гатаса̄вакасса ва̄. тена хи твам̣, бра̄хман̣а, там̣ хабйасесам̣ аппахарите ва̄ чхад̣д̣ехи аппа̄н̣аке ва̄ удаке опила̄пехӣ’’ти.

атха кхо сундарикабха̄радва̄джо бра̄хман̣о там̣ хабйасесам̣ аппа̄н̣аке удаке опила̄песи. атха кхо со хабйасесо удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати. сеййатха̄пи на̄ма пха̄ло [лохо (ка.)] дивасам̣сантатто [дивасасантатто (сӣ. сйа̄. кам̣. пӣ.)] удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати; евамева со хабйасесо удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати.

атха кхо сундарикабха̄радва̄джо бра̄хман̣о сам̣вигго ломахат̣т̣хаджа̄то йена бхагава̄ тенупасан̇ками; упасан̇камитва̄ екамантам̣ ат̣т̣ха̄си. екамантам̣ т̣хитам̣ кхо сундарикабха̄радва̄джам̣ бра̄хман̣ам̣ бхагава̄ га̄тха̄хи аджджхабха̄си –

‘‘ма̄ бра̄хман̣а да̄ру сама̄даха̄но,

суддхим̣ аман̃н̃и бахиддха̄ хи етам̣;

на хи тена суддхим̣ кусала̄ ваданти,

йо ба̄хирена парисуддхимиччхе.

‘‘хитва̄ ахам̣ бра̄хман̣а да̄руда̄хам̣

аджджхаттамевуджджалайа̄ми [аджджхаттамева джалайа̄ми (сӣ. сйа̄. кам̣. пӣ.)] джотим̣;

ниччаггинӣ ниччасама̄хитатто,

арахам̣ ахам̣ брахмачарийам̣ чара̄ми.

‘‘ма̄но хи те бра̄хман̣а кха̄рибха̄ро,

кодхо дхумо бхасмани мосаваджджам̣;

дживха̄ суджа̄ хадайам̣ джотит̣ха̄нам̣,

атта̄ суданто пурисасса джоти.

‘‘дхаммо рахадо бра̄хман̣а сӣлатиттхо,

ана̄вило саббхи сатам̣ пасаттхо;

йаттха хаве ведагуно сина̄та̄,

аналлагатта̄ва [аналлӣнагатта̄ва (сӣ. пӣ. ка.)] таранти па̄рам̣.

‘‘саччам̣ дхаммо сам̣йамо брахмачарийам̣,

маджджхе сита̄ бра̄хман̣а брахмапатти;

са туджджубхӯтесу намо карохи,

тамахам̣ нарам̣ дхаммаса̄рӣти брӯмӣ’’ти.

евам̣ вутте, сундарикабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… ан̃н̃атаро ча пана̄йасма̄ бха̄радва̄джо арахатам̣ ахосӣ’’ти.

10. бахудхӣтарасуттам̣

196. екам̣ самайам̣ бхагава̄ косалесу вихарати ан̃н̃атарасмим̣ ванасан̣д̣е. тена кхо пана самайена ан̃н̃атарасса бха̄радва̄джаготтасса бра̄хман̣асса чатуддаса балӣбадда̄ нат̣т̣ха̄ хонти. атха кхо бха̄радва̄джаготто бра̄хман̣о те балӣбадде гавесанто йена со ванасан̣д̣о тенупасан̇ками; упасан̇камитва̄ аддаса бхагавантам̣ тасмим̣ ванасан̣д̣е нисиннам̣ паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. дисва̄на йена бхагава̄ тенупасан̇ками; упасан̇камитва̄ бхагавато сантике има̄ га̄тха̄йо абха̄си –

‘‘на хи нӯнимасса [наханӯнимасса (сӣ. сйа̄. кам̣.)] саман̣асса, балӣбадда̄ чатуддаса;

аджджасат̣т̣хим̣ на диссанти, тена̄йам̣ саман̣о сукхӣ.

‘‘на хи нӯнимасса саман̣асса, тила̄кхеттасми па̄пака̄;

екапан̣н̣а̄ дупан̣н̣а̄ [двипан̣н̣а̄ (сӣ. пӣ.)] ча, тена̄йам̣ саман̣о сукхӣ.